SAMUEL 1 12:19 - Alkitab Singog In Mongondow Masa In Tanaa

¹⁹ Bo nogumandon in mosia kon i Samuel, “Tuḷungaipa, Amá, posambayangaipa in kami kon i Tuhan Allahmu, sinbá diá in kami matoi. Tanaa in kinotaauandon nami kon koḻikud in dosa nami koḻipod, kami in dinosadon bui sin kami ain noigum kon datu tobatú.”

SAMUEL 1 12:19 ပူးပေါင်းရင်းမြစ်များ

KINOBAḺIAN 20:7

Táe tanaa, pobuidon in sia kon i buḷoinea. Ki buḷoinea in tobatúbí nabi, bo sambayangannea in iko sinbá diá matoi. Táe aka diá pobuimu in sia, yo pokotaaudon, iko bo bayongan rayatmu in matoi!”

AYUB 37:13

Ki Allah in nobogoi in uyan sin momuntad kon butá, andeka doman mohukum kon umat intau; degá mopoontong doman kon i monia, kon totuu moḷoben in tabi-Nea inta mononoi.

AYUB 42:8

Dá, gamádon in tanaa sapi koḷakian pitu bo domba koḷakian pitu, bo bayádon kon i Ayub. Bo posumbadon intua komintan mobaḻí kuruban payongon kon inimu. Sambayangan i Ayub in moiko bo tarimaan-Ku in sambayangnea. Moiko in diábí pokopooyáan-Kumai, umpakabí patus in moiko motarima kon hukuman. Diá inouman monimu kino banar ki ine in Akuoi, ná inta inouman i Ayub.”

IḶUAIAN 10:17

Ampungaipa in dosaku in komintan tanaa, bo posambayangdon kon i Tuhan Allahmu, sinbá poḷuat-Neadon kon inakó in hukuman inta mokopatoi tanaa.”

IḶUAIAN 32:30

Nopoikoḷomai kon singgai ki Musa noguman kon bangusa tatua, “Moiko ain nogaid kon dosa moḷoben. Táe tanaa akuoi in motakod bui kon buḷud tatua sin mayá tumayow kon i Tuhan; igumon mako akuoi mokouḻí kon totabi bo ampungandon in taḷá monimu.”

IḶUAIAN 9:28

Posambayangdon kon i Tuhan; totokdon in moyoyiga in kami popisí in gotup bo uyan eis tanaa. Pomayákudon mako in moiko mayá. Donaaidon mogutun kon naa in moiko.”

YESAYA 26:16

Iko ain nohukum kon i nami; kon bonu in roriga kami in nobui mangoi kon ini-Mu, bo nosambayang kon ini-Mu, Tuhan.

YEREMIA 15:1

Ki Tuhan in noguman kon inakó, “Diá bidon in Akuoi motabi kon bangusa tanaa, umpakabí ki Musa bo ki Samuel in simindog kon naa mopoigum in totabi-Ku kon i monia. Potabádon mayá in bangusa tanaa, doídon in Akuoi moindoi kon i monia!

YEREMIA 27:18

Aka mosia bo totuu kon nabi, bo ain notarima kon koyow nongkon i-Nakó, yo notantú bidon kon tanaa in mosia in moigumbí kon i-Nakó, Tuhan Inta Totok in mokawasa, sinbá pakakat mita inta oyúonpa kon Baḷoi-Ku bo kon komaḻig in datu kon Yerusalem in diádon akuton pobayá in Babel.

YEREMIA 37:3

Ki Datu Zedekia in nopotabá kon i Yukhal ki adí i Selemya, bo ki Imang Zepanya ki adí i Maaseya sin mopoigum sinbá akuoi in mosambayang kon i Tuhan Allah sin kopontingan in bangusa.

YEREMIA 42:2

kon inakó bo noguman, “Amá, ná inta inontong tontaní i Amá, kami naa dungkuḷmai in nobayong, tanaa in dongkadon topiḻik. Poigumon nami kaasí sambayanganpa i Amá in kami kon i Tuhan Allah inta sinumba i Amá. Sambayangaipa in kami inta ki agatneapa naa,

MALEAKHI 1:9

Tanaa, ei imang mita, ponungkuḷka mopoigum kon i Allah sinbá totabion-Nea in kita. Diábí tubagan-Nea in sambayangmu, bo tua in taḷámubí tontaní.

PINOGIAPAN 21:7

Bo bangusa tatua namangoi kon tayowon i Musa bo noguman, “Binaradosadon in kami sin ain nongunsingog kon i Tuhan bo kon inimu. Posambayangpa kon i Tuhan sinbá uḷag mita tanaa poyayúdon kon inami.” Dá sinambayangandon i Musa in bangusa tatua.

OUMAN IN RASUL MITA 8:24

Dá ki Simon in noguman kon i Petrus bo kon i Yohanes, “Dá aka natua yo tuḷungaipa poigum kon i Tuhan sinbá diá tobatúmai in siningog monimu nion in mobaḻí kon i nakó.”

YAKOBUS 5:15

Aka sambayang monia pinoyaput takin noyakin, yo undamanbí i Tuhan in intau inta notakit tatua, bo ampungan-Nea doman in dosa mita inta ain inaidannea.

YOHANES 1 5:16

Aka moiko bo mokoontong kon tobatú intau inta tumpaḷa Keresten nogaid kon dosa inta diá mokopopisí kon intau tatua kobuḻiandon in kobiagan inta mopia bo mononoi, yo moiko in musti mosambayang kon i Allah; bo ki Allah in mobogoibí in kobiagan tatua kon inia. Naa in tongábí kon i monia inta nogaid kon dosa inta diá mokopopisí kon i monia kobuḻian in kobiagan tatua. Táe oyúon in dosa inta mokopopisí kon intau kobuḻian in kobiagan tatua. Aka kon soaḷ tanaa yo akuoi in diábí moguman kon i monimu kon moiko in musti mosambayang kon i Allah.

SAMUEL 1 12:13

“Tanaa, indoiai, naadon in sia, datu inta piniḻí monimu. Ain inigum monimu in sia, bo inogoidon i Tuhan in sia kon inimu.

SAMUEL 1 12:17

Akuoi in mokuani kon i Tuhan, bo umpaka tanaa sempo in poninggai, ki Tuhan in mopoangoibí in gotup bo uyan saḷaku tubag kon sambayangku. Bain tua bo kotaauandon monimu kon totuubí moḷoben in dosamu kon i Tuhan sin noigum kon datu tobatú.”

SAMUEL 1 12:20

Ki Samuel in notubag domandon, “Dika moondok, umpakabí moiko ain nomia kon inta moraat tatua táe dikadon monoḻikud kon i Tuhan, táe umurandon pogundoi kon i-Nia takin ḻimbatú in ginamu.

SAMUEL 1 12:23

Soaḷ akuoi, poigumon mako akuoi in diá modapot in mogaid kon dosa kon i Tuhan sin diádon nosambayang kon kopontingan monimu. Táe akuoi in umuranbí motundú kon inimu kon soaḷ mita inta mopia bo inta noitutui.

SAMUEL 1 7:5

Nopaḷut mako kon tua ki Samuel noguman, “Sipundon in bayongan bangusa Israel kon Mizpa, sinbá akuoi mosambayang sin kopontingan monimu.”

SAMUEL 1 7:8

Mosia in noguman kon i Samuel, “Dikadon mogoga-gogai in mosambayang kon i Tuhan Allah naton sinbá posaḷamaton-Nea in kita nongkon intau in Pilistin.”

SAMUEL 1 8:6

Táe diábí nosanang in gina i Samuel in nokodongog kon onu inta pinoigum monia tua. Bo nosambayang in sia kon i Tuhan,