SAMUEL 1 12:17 - Alkitab Singog In Mongondow Masa In Tanaa

¹⁷ Akuoi in mokuani kon i Tuhan, bo umpaka tanaa sempo in poninggai, ki Tuhan in mopoangoibí in gotup bo uyan saḷaku tubag kon sambayangku. Bain tua bo kotaauandon monimu kon totuubí moḷoben in dosamu kon i Tuhan sin noigum kon datu tobatú.”

SAMUEL 1 12:17 ပူးပေါင်းရင်းမြစ်များ

MAZMUR 99:6

Ki Musa bo ki Harun noitakin doman in imang-Nea mita, ki Samuel in intau tobatú inta nosambayang kon i-Nia. Mosia in nokuani kon i Tuhan, bo sinubagan-Nea.

IḶUAIAN 32:30

Nopoikoḷomai kon singgai ki Musa noguman kon bangusa tatua, “Moiko ain nogaid kon dosa moḷoben. Táe tanaa akuoi in motakod bui kon buḷud tatua sin mayá tumayow kon i Tuhan; igumon mako akuoi mokouḻí kon totabi bo ampungandon in taḷá monimu.”

AMSAL 26:1

Ná uyan kon sempo in pononinggai, bo salju kon dodai in singgai mopatú, natua doman in dodayow kon intau bodok diá in maanannea.

YEREMIA 15:1

Ki Tuhan in noguman kon inakó, “Diá bidon in Akuoi motabi kon bangusa tanaa, umpakabí ki Musa bo ki Samuel in simindog kon naa mopoigum in totabi-Ku kon i monia. Potabádon mayá in bangusa tanaa, doídon in Akuoi moindoi kon i monia!

YOSUA 10:12

Kon singgai tatua kon tungkuḷ in ki Tuhan nopountung kon intau mita in Israel nongkon intau mita in Amori, ki Yosua noyosingog i Tuhan. Bo kon tayowon in intau Israel, ki Yosua noguman, “Ei mata in singgai! Pogogaipa kon tombutung in Gibeon. Bo iko buḷan! Dikapa momamping nongkon tombutung in Ḷopá in Ayalon.”

SAMUEL 1 12:13

“Tanaa, indoiai, naadon in sia, datu inta piniḻí monimu. Ain inigum monimu in sia, bo inogoidon i Tuhan in sia kon inimu.

SAMUEL 1 12:19

Bo nogumandon in mosia kon i Samuel, “Tuḷungaipa, Amá, posambayangaipa in kami kon i Tuhan Allahmu, sinbá diá in kami matoi. Tanaa in kinotaauandon nami kon koḻikud in dosa nami koḻipod, kami in dinosadon bui sin kami ain noigum kon datu tobatú.”

SAMUEL 1 2:10

Musung mita i Tuhan in morimumud motontopong, mosia in moondok; nongkon ḷangit in Sia monggotup. Ki Tuhan in mohakim kon bayongan in dunia naa, bo mobogoi in kawasa inta momulia kon i datu inta piniḻí-Nea.”

SAMUEL 1 7:5

Nopaḷut mako kon tua ki Samuel noguman, “Sipundon in bayongan bangusa Israel kon Mizpa, sinbá akuoi mosambayang sin kopontingan monimu.”

SAMUEL 1 8:6

Táe diábí nosanang in gina i Samuel in nokodongog kon onu inta pinoigum monia tua. Bo nosambayang in sia kon i Tuhan,

SAMUEL 1 8:7

bo ki Tuhan in noguman, “Duduiaidon in bayongan inta pinoigum in bangusa tatua kon inimu. Sin deemanbí iko in kinodoí monia, táe Akuoibí. Doídon in mosia aka Akuoi in mobaḻí datu monia.