SAMUEL 1 10:25 - Alkitab Singog In Mongondow Masa In Tanaa

²⁵ Noiduduimai kon tua ki Samuel noginsilang kon bangusa tatua soaḷ hak bo kowajiban in datu, bo pinaisnea kon bonu in buk inta sinagúnea kon tampat inta motusi. Nopaḷut mako kon tua ki Samuel nopotabá kon bayongan in bangusa tatua nobui kon baḷoinea-baḷoinea.

SAMUEL 1 10:25 ပူးပေါင်းရင်းမြစ်များ

DATU MITA 2 11:17

Ki Imang Yoyada in nopotabá kon i Datu Yoas bo rayat nomia kon dodandian takin i Tuhan kon mosia in mobaḻíbí umat i Tuhan. Sia in nokiaid doman kon i datu in dodandian takin rayat.

ULANGAN 31:26

“Gamádon in buk hukum i Allah tanaa, bo ukatdon kon diug in Poti Dodandian i Tuhan Allahmu sinbá umuran kon tua nobaḻí tomponiata kon bangusa tatua.

TIMOTIUS 1 2:2

bo sambayangai doman in datu mita bo intau mita inta inogoian in kawasa momarenta sinbá moaman bo motompia in kobiagan naton kon tayowon i Allah inta umuran mogaid kon inta mopia.

TITUS 3:1

Ponorop kon bayongan in jamaat, bá mosia in umuran kodu-kodudui kon itoi mita bo pomarenta, diá momaḷawang bo tantú mogaid kon inta mopia.

YOSUA 22:6

Onda intua ki Yosua nomarakat bo poḷat nopotabá kon i monia nobui minayá kon butá monia takin koyow, “Tanaa in moiko nobiagdon nooyúon bo moiko nobui takin nodia kon bobiagon nobarong, saḷaka, buḷawan, bitú, uatoi bo pakeang. Silai-silaidon doman in onu inta inagowmu tua kon parang kon intau mita tongosukumu ibanea.” Dá suku i Ruben, i Gad, bo suku i Manasye inta kon pomukaan kon Yordan tatua nonaḷámaidon kon intau in Israel ibanea, bo nobuat nongkon Silo kon Kanaan nopobayá in butá monia tontaní kon Gilead. Mosia nogutun kon butá tatua podudui in parenta i Tuhan pinongin i Musa. (Tongosilai in suku Manasye ain notarima kon butá nongkon i Musa, butá inta kon ḷoḷan in Ongkag in Yordan, bo tongosilai in suku Manasye ibanea in notarima nongkon i Yosua butá kon dotá in toyopan kon Ongkag in Yordan noyotakin in suku mita ibanea.)

SAMUEL 1 11:14

Bo nogumandon in ki Samuel kon i monia, “Koḻigai in kita komintan mayá in Gilgal bo baḻíondon in Saul datu naton.”

SAMUEL 1 8:9

Tuamai in duduiaidon onu inta pinoigum monia; táe ogoiaidon in mosia in tompoingat totu-totuu, bo potaau kon i monia naonda in popoaid i datu kon i monia.”