SURAT I PAULUS KON JAMAAT RUM 9:27 - Alkitab Singog In Mongondow Masa In Tanaa

²⁷ Ki Nabi Yesaya nosingog nanaa kon soaḷ intau in Israel, “Umpakabí kobayong in intau Israel ná kobayong in bungaion kon dagat, táe tongábí topiḻik in mosaḷamat;

SURAT I PAULUS KON JAMAAT RUM 9:27 ပူးပေါင်းရင်းမြစ်များ

KINOBAḺIAN 22:17

Akuoi mobogoi in barakat kobarongon totok kon inimu bo baḻíon-Ku in buímu moantó naonda bo tundi kon ḷangit bo ná kobayong in bungayon kon bingkí in dagat. Ki adí bo ki ompumu in monaḷowdon kon musung mita monia.

EZRA 9:14

Dá, naondabí kon kami in musti monaḷámai bui kon parenta-Mu mita bo bui motonibuḷoi moyotakin in intau mita inta moraat tatua? Aka aidan nami intua, yo notantú bidon kon totokdon in tumorú in Iko dá rimumudon-Mudon in kami komintan diádon tobatúmai in bióon-Mu mako mobiag.

EZRA 9:8

Táe tanaa, o Tuhan Allah nami, Iko in bagubí nonotabi kon inami. Pinoḷuat-Mu in tongonumai in intau nongkon sigad nami nongkon pinononggataan sinbá mobiag motompia kon tampat inta sinondí tanaa. Inogoian-Mudon in kami in kobiagan mobagu.

YESAYA 1:1

Buk tanaa tombonunea in koyow mita kon Yohuda bo Yerusalem inta pinoniata i Allah kon i Yesaya, ki adí i Amos, kon tungkuḷ in ki Uzia, ki Yotam, ki Ahas bo ki Hizkia in nomarenta kon Yohuda.

YESAYA 1:9

Aka ki Tuhan Inta Totok in mokawasa diá noposaḷamat kon tongonumai in intau kon i naton, yo kita in noyopú bidon komintan, naonda bo Sodom bo Gomora.

YESAYA 11:11

Kon singgai tatua ki Tuhan in buipa doman momaké kon kawasa-Nea bo modia mobui kon umat-Nea inta kinotaḷáan kon Asyur bo kon Mesir, kon butá mita in Patros, Sudan bo Elam, kon Babel, Hamat bo ḻibuton mita inta mongoyayú.

YESAYA 24:13

Tuata in mobaḻí kon sinangkub in dunia kon batúan in bangusa. Notongkai ná kon sempo in posipunan kon bungai in boyó, kon dodai in bungai in zaitun ginamá nodapot in nodait bo bungai in anggur inta imbuitnea sinipú nongkon pangkoinea.

YEREMIA 44:14

Bo intau in Yohuda inta ki agatnea, inta ain minayá in Mesir sin mogutun kon tua, diábí tobatúmai in mokoḷagui andeka mobiag. Diábí tobatúmai in kon sigad monia in mobuipa mangoi kon Yohuda, umpakabí tua in totok in koibog monia. Totuu, diábí in mobui koḻikudbí in inta moḷoḷagui.”

YEREMIA 5:10

Akuoi in mopotabábí kon musung sin momoguyaat kon gobá in anggur monia, táe deemanbí makusud moyopú. Akuoi in mopotabábí kon musung tatua momongkó kon tanga mita in pangkoi mita in anggur monia, sin tanganea mita tatua in deemanbí Akuoi in kitogi.

YEHEZKIEL 6:8

Topiḻik nongkon i monia in posaḷamaton-Kubí nongkon ponotadan tatua táe mosia in poraritonbí kon sigad in bangusa mita;

HOSEA 1:10

Bangusa in Israel in mobaḻíbí ná kobayong in bungaion kon dagat, nodapot in diá koukuran andeka diá koiyapan. Tanaa in ki Allah in noguman kon i monia, “Moiko in deemanbí Umat-Ku,” táe moiangoibí in wakutunea Sia in moguman kon i monia, “Akuoibí in ki Allah inta nobiag bo moiko in ki adí-Ku mita!”

YOËL 2:32

Táe ki ine in mokituḷung kon i Tuhan, in posaḷamatonbí. Ki Tuhan in noguman, “Kon Yerusalem intau mita inta piniḻí-Ku in mosaḷamatbí.”