SURAT I PAULUS KON JAMAAT RUM 9:11 - Alkitab Singog In Mongondow Masa In Tanaa

¹¹ Wakutu in adí doyowa tatua in diápa pinononggadí, sinantúdon muna i Allah ki ine in piḻíon-Nea kon singgai moiduduimai. Onu in piniḻí i Allah, deemanbí noidoyon kon onu inta komampuan aidan in intau, táe pinodoyonbí kon ibog i Allah tontaní. Sin kon wakutu in ki adí i Ribka doyowa tatua diápa motaau mogaid kon onu inta mopia ande inta moraat,

SURAT I PAULUS KON JAMAAT RUM 9:11 ပူးပေါင်းရင်းမြစ်များ

MAZMUR 51:5

Sin inakukubí in bayongan in taḷáku, dosaku in umurankubí toro-toropon.

YESAYA 14:24

Ki Tuhan Inta Totok in mokawasa in nongibot: “Inta ain sinomayá-Ku tua in notantú bidon kon aidanbí.

YESAYA 23:9

Ki Tuhan Inta Totok in mokawasa, Siabí inta ain nonantú tatua. Sia in nonantú kon momaḷutdon kon kaḷakuang in intaunea kon bayongan inta bungai in oaidan inta ain nouḻí monia, bo mopoompá kon intau mita inta ihoromat kon dunia.

YEREMIA 51:29

Butá in moḷundan bo modandú popisí in Akuoi koyogot mopobayá in tomayá-Ku sin mopobaḻí kon Babel tampat moḷogat inta diádon inutunan in intau.

SURAT I PAULUS KON JAMAAT RUM 4:17

Sin ki Allah in nogumandon kon i Abraham nanaa, “Iko ain binaḻí-Ku ki amá in bayongan intau inta mopirisaya.” Tua in dandi inta inogoi i Allah kon i Abraham. Bo ki Abraham in nopirisaya kon i-Nia. Sia tua in ki Allah inta nomiag kon intau minatoi, Siabí doman tua in ki Allah inta tongá takin singog in mogaid kon bayongan yagi-yagi inta diápa, mobaḻí oyúondon.

EPESUS 2:3

Koḻipod, kita komintan in ná doman mosia tua; kita nobiag dinumudui doman kon tabiat in awak naton bo nogaid kon onu inta mokosanang kon awak bo raian naton. Wakutu intua kita naa in intaubí doman inta kinotugatan in torú i Allah, ná doman mosia tua.

EPESUS 3:11

Tua in inaidan i Allah podudui in tomayá-Nea inta mononoi, inta inaidan-Nea pinongin i Kristus Yesus, Tuhan naton.

TESALONIKA 1 1:4

Utat mita, kinotaauan bidon nami kon motabibí in ki Allah kon i monimu bo piniḻí-Neadon in moiko mobaḻí umat inta kinotabi-Nea.

TESALONIKA 1 2:12

Kami umuran mononggina bo mobogoi in moginrigon kon gina monimu bo mondodak sinbá moiko in moidudui kon inta kinoibog i Allah. Inoiní-Nea in moiko sinbá mobaḻí umat kon Dunia-Nea inta Mobagu bo mokorasa kon kawasa-Nea inta moḷoben.

TIMOTIUS 2 1:9

Ki Allah in noposaḷamat bo nogoiní kon i naton bá mobaḻí umat inta kinotabi-Nea. Tua in inaidan-Nea, deemanbí pinodoyon kon oaid naton mopia, táe pinodoyon-Neabí kon makusud-Nea tontaní bo totabi-Nea inta pinongin i Kristus Yesus kon wakutupa in dunia naa diápa pinomia.

TITUS 3:5

Sia in noposaḷamat kon i naton, táe deemanbí popisí in kita ain nogaid kon inta mopia, táe popisíbí in tabi-Nea kon i naton. Sia in noposaḷamat kon i naton takin Roho i Allah inta ain nobogoi kon i naton in kolahiran bo kobiagan mobagu takin cara nondarit kon i naton.

PETRUS 1 5:10

Táe naonda in moiko nokorasa kon roriga motoyong, yo ki Allah tontaní in moposompurna kon i monimu. Potorindogon-Nea bo iropotan in moiko. Sin Sia in Allahbí inta totok mopia in gina, inta ain nogoiní kon i monimu sinbá moitakin doman mokorasa kon kopia-Nea inta mononoi pongin i Kristus.

PETRUS 2 1:10

Tuamai utatku mita, poramuji totok, sinbá moiko inta ain inoiní bo piniḻí i Allah in morotondon totok in pirisayamu. Aka aidan monimu intua komintan, yo diá bidon mobaḷui in pirisayamu.

WAHYU 17:14

Mosia in noyopakat kon moparang kon i Adí in Domba tatua. Táe ki Adí in domba tatua takin dumodudui-Nea mita inta mosatia bo inta ain inoiní bo piniḻí-Nea tatua in monaḷow kon datu mita tatua, sin Siata in Tuang in bayongan tuang, bo Datu in bayongan datu.”