SURAT I PAULUS KON JAMAAT RUM 8:34 - Alkitab Singog In Mongondow Masa In Tanaa

³⁴ Oyúon degá in intau moibog mopotaḷá kon i naton? Bain ki Kristus in mobela kon i naton! Siabí tua inta ain minatoi, táe Siabí doman tua inta ain biniag bui nongkon kinopatoian bo kon tampatdon i Allah inta mokawasa.

SURAT I PAULUS KON JAMAAT RUM 8:34 ပူးပေါင်းရင်းမြစ်များ

AYUB 33:24

Takin tabi in malaekat tatua in moguman, ‘Buḻiaidon in sia, diábí motaau in sia moponag kon dunia in intau minatoi. Naa in doit potobut, sinbá moiḷuatdon bui in sia.’

AYUB 34:29

Aka ki Allah in monantúdon kon tongá kibio-biómai, diábí tobatúmai in intau mokobaḻí mosingog kon i-Nia. Aka mogadop in Sia, diábí tobatúmai intau in mokouḻí kon i-Nia.

MAZMUR 109:31

Sin Sia in moduḷu bo moposaḷamat kon intau bogá nongkon i monia inta mopoḷabú in hukuman matoi kon inia.

MAZMUR 37:33

Táe diábí pinomayá mako i Tuhan in sia moḷabú kon bonu in kawasa in musung, andeka hukumon kon dodai in sisigan.

YESAYA 50:8

Sin ki Allah in nodiug, Sia in noponiata kon akuoi in diá kotaḷá. Ki ine in moibog mobobayowan takinku? Igai mayá simindog moyotakin. Ki ine in moḷawang kon inakó? Potabádon mangoi dimiug kon inakó.

YESAYA 53:12

Nobayagbí in ginanea in nobogoi in kobiagannea bo pinoyoiap intau moraat. Sia in nomotaan kon dosa in intau mobayong bo nosambayang sinbá mosia in ampungan. Dá inogoian-Ku in sia in intau mobayong nobaḻí tombuinag, bo sia in nokouḻí kon tonsilai noyotakin in intau mita mobanar.”

YEREMIA 50:20

Kon tungkuḷ intua Israel bo Yohuda in modarit bidon nongkon dosa, sin ampungan-Kubí in intau mita inta ain pinosaḷamat-Ku. Akuoi, ki Tuhan, ain nosingog.”

MATIUS 20:28

Ná ki Adí Intau namangoi deemanbí mokibantung, táe mamangoibí mobantung bo mobogoi in nyawa-Nea potobut kon dosa in intau mobarong.”

MARKUS 16:19

Naonda in ki Yesus nopaḷut nongonguman monia, Sia sinintakdon minayá in soroga. Kon tua, Sia momarenta takin i Allah.

YOHANES 14:19

Diádon moonggot bo diádon ontongon in dunia naa in Akuoi. Táe moiko in mokoontongbí kon i-Nakó. Bo lantaran in Akuoi nobiag, dá moiko in mobiagbí doman.

YOHANES 16:23

Kon singgai tatua, moiko diá bidon moḻibó kon onu bo onu kon i-Nakó. Poguman-Kudon kon i monimu: Onukabí in igumon monimu kon i Amá podoyon kon tangoi-Ku, ogoibí i Amá intua kon i monimu.

OUMAN IN RASUL MITA 2:24

Táe Sia in biniag bui i Allah. Sia in pinilatan nongkon roriga in popatoi, sin diábí motaau aka Sia in umuran kon bonu in kawasa in popatoi.

SURAT I PAULUS KON JAMAAT RUM 14:13

Manangka intua donaaidon mosipotaḷáan in kita. Táe aidai in naa, poramuji sinbá moiko in diá mogaid kon onukadon inta mokopopisí kon i utatmu inta tumpaḷa Keresten in mogaid kon inta moitaḷá.

SURAT I PAULUS KON JAMAAT RUM 14:9

Ki Kristus ain minatoi, táe buidon nobiag. Manangka intua sia in nobaḻídon Tuhan kon intau mita inta nobiag bo kon intau mita doman inta ain minatoi.

SURAT I PAULUS KON JAMAAT RUM 4:25

Ki Yesus tua in pinosarakandon kon intau mita sin ḻimodon sin potobut kon bayongan dosa naton. Tongá Sia in biniagdon bui i Allah sinbá kita in buidon moyodame takin i Allah.

SURAT I PAULUS KON JAMAAT RUM 8:1

Tanaa in diá bidon in hukuman kon i monia inta nobiag notobatú i Kristus Yesus.

SURAT I PAULUS KON JAMAAT RUM 8:27

Dá ki Allah, inta nonotaau kon bonu in gina intau, nonotaaubí kon makusud in Roho tatua; sin Roho tatua mopoigum kon i Allah sin kopontingan in umat-Nea, bo tua in pinoduduibí kon ibog i Allah.

KOLOSE 3:1

Moiko ain bidon biniag bui noyotakin i Kristus. Tuamai poramujidon in moiko mokouḻí kon soaḷ mita inta kon soroga, kon tampat kon onda in ki Kristus nomarenta noyotakin i Allah.

IBRANI 1:3

Sia doman naa in moponiata in kamuliaan i Allah inta diá in poḻiuan tua. Bo noniatadon totok kon i-Nia in rupa i Allah tontaní. Singog-Nea inta mokawasa totok tua in pinaké-Nea moḷukad kon dunia naa. Bo naonda in sinobut-Neadon in dosa mita in intau, iḻimitúdon in Sia kon ḷoḻitúan pomomarentaan kon soroga moyotakin i Allah Pongawasa inta totok in moḷantud.

IBRANI 7:25

Manangka intua ki Yesus in umuranbí motaau moposaḷamat kon intau mita inta namangoi kon i Allah inta mongin i-Nia. Sin Sia in nobiag mononoi bo umuran mopoyaput in mintahang kon i Allah sin kopontingan intau mita tatua.

IBRANI 9:24

Sin ki Kristus in diábí sinumuot kon Yuang Motusi inta pinomia in intau, inta nobaḻí lambang in yuang Motusi inta totokea. Ki Kristusbí tontaní in sinumuot kon soroga; tanaa Sia in minayá kon tayowon i Allah sin lantaran kopontingan naton.

PETRUS 1 3:18

Sin ki Kristus tontaní in tongábí doman komintan minatoi popisí in dosa mita intau. Tobatú intau inta diá kotaḷá; minatoi popisí in intau inta kotaḷá. Ki Kristus in nogaid kon tua sinbá kita in motaau-Nea diaan mayá kon i Allah. Sia in iḻimod kon kaadaan saḷaku intau, táe biniag bui kon bonu in Roho.

PETRUS 1 3:22

bo ain namonik in soroga. Bo tanaa mako Sia ain nongawasa noyotakin i Allah bo nomarenta doman kon bayongan malaekat, bayongan mongongawasa bo bayongan ropot kon dunia naa.

WAHYU 1:18

Akuoi naa in Sia inta nobiag tua! Akuoi ain minatoi, táe indoiaika, Akuoi in nobiagbí bo diá bidon mato-matoi. Popatoi bo dunia in intau minatoi kon bonu bidon in kawasa-Ku.