SURAT I PAULUS KON JAMAAT RUM 8:19 - Alkitab Singog In Mongondow Masa In Tanaa

¹⁹ Bayongan in mahaḷuk mogoḷat bo moibogdon totok mokoontong kon wakutu i Allah moponiata kon i adí-Nea mita.

SURAT I PAULUS KON JAMAAT RUM 8:19 ပူးပေါင်းရင်းမြစ်များ

YESAYA 65:17

Ki Tuhan in noguman, “Akuoi in momiabí kon ḷangit inta mobagu bo butá inta mobagu. Onu inta nobaḻí mita koḻipod in koḻionganbí bo diá bidon toropon bui.

HOSEA 1:10

Bangusa in Israel in mobaḻíbí ná kobayong in bungaion kon dagat, nodapot in diá koukuran andeka diá koiyapan. Tanaa in ki Allah in noguman kon i monia, “Moiko in deemanbí Umat-Ku,” táe moiangoibí in wakutunea Sia in moguman kon i monia, “Akuoibí in ki Allah inta nobiag bo moiko in ki adí-Ku mita!”

MATIUS 5:9

Pia in kamang in intau inta moibog in dodamean; sin mosia tua in tangoion ki adí mita i Allah!

YOHANES 1:12

Tongá oyúon doman in notarima kon i-Nia bo nopirisaya kon i-Nia; mosia tua in inogoian hak mobaḻí ki adí i Allah,

OUMAN IN RASUL MITA 3:21

Sia in mustipabí mogutun kon soroga modapot in ki Allah monoimbagu kon bayongan yagi-yagi ná inta ain pinoguman-Nea kon nabi-Nea mita tungkuḷ intua.

SURAT I PAULUS KON JAMAAT RUM 8:14

Intau mita inta kinawasa in Roho i Allah, mosia tua in ki adí mita i Allah.

SURAT I PAULUS KON JAMAAT RUM 8:16

Roho i Allah tatua in noyotakin in roho naton in moguman kon kita naa in ki adí mita i Allah.

SURAT I PAULUS KON JAMAAT RUM 8:18

Podudui in raianku, bayongan in roriga inta korasaan naton tanaa mako, diábí tugat in poyobandingonmai in kamuliaan inta poponiata kon i naton.

SURAT I PAULUS KON JAMAAT RUM 8:23

Bo deemanbí tongá mosia in mogamui; táe kitabí doman inta ain notarima kon Roho i Allah. Tua in oogoi i Allah inta muna, tongá kita in umuranpabí doman mogoḷat mako kon i Allah mopoḷuat kon bayongan in awak naton bo baḻíon-Nea in kita ki adí-Nea mita.

SURAT I PAULUS KON JAMAAT RUM 9:26

Bo kon tampat inta pinonangoian kon intau, ‘Moiko in deeman umat-Ku,’ kon tampat tatuata intau mita in tangoiondon ki adí mita i Allah inta nobiag.”

KORINTUS 1 1:7

Tuamai barakat kon i monimu in diábí modai-dait kon dodai in moiko mogoḷat mako kon koangoian i Tuhan naton ki Yesus Kristus.

KORINTUS 1 1:8

Bo ki Kristusbí doman tua inta tantú moginrigon kon gina monimu modapot kon singgai pangabisan; sahingga aka mamangoidon bui in Sia yo diá kouḻían-Nea in moiko kon taḷá tobatúmai.

KORINTUS 2 6:18

Akuoi in mobaḻíbí ki Amá monimu, bo moiko in mobaḻíbí ki adí-Ku mita, natua in singog i Tuhan Inta totok in Mokawasa.”

GALATIA 3:26

Moiko bo ain nopirisaya kon i Yesus Kristus, dá moiko ain notobatú takin-Nea; sahingga in moiko nobaḻídon ki adí mita i Allah.

PILIPI 1:20

Inta totok in kinoibogku bo iharapku mako in bá diá mokoimontanmai in akuoi in diá mokopogaid kon oaidanku. Táe haraponku bá pomuḷoi mako, torutama totok in tanaa mako mobaranidon totok in akuoi sahingga in bayongan onu inta kon inakó – mobiag andeka matoi – ki Kristus in pomuliaan.

KOLOSE 3:4

Aka ki Kristus inta nobaḻí pangkoi in kobiagan naton, koontongandon bui yo moiko doman in koontongan moyotakin-Nea kon bonu in kamuliaan-Nea!

IBRANI 12:27

Tosingogon “komintanpa doman” mogumanbí kon bayongan in dunia inta ain pinomia naa in dandúon bo ḷumbúon, sinbá dongkadon inta diá modandú in kotaḷáan.

PETRUS 1 1:13

Tuamai moiko in musti umuran mobasadia. Pokoingat bo totu-totuu poharap kon barakat inta bain ogoi kon i monimu kon wakutu in ki Yesus Kristus mamangoi bui.

PETRUS 1 1:7

Tujuan intua komintan in mogujibí kon i monimu mongo totuudon mopirisaya kon i Tuhan andeka diá. Buḷawanpa inta mogogu-goguyaatbí, mustibí ujionpa muna in tuḷu. Pirisayabí monimu in momaha-mahaḷ nongkon buḷawan mita tatua, tuamai mustibí doman ujion sinbá moiko in mobaḻídon totok in moroton. Aka natua yo moiko in dayowonbí bo horomaton poḷat diaan mayá in soroga aka ki Yesus Kristus buidon mamangoi.

YOHANES 1 3:1

Indoiaika dá ki Allah totokbí in motabi kon i naton, sahingga ináku-Neadon in kita saḷaku ki adí-Nea mita. Bo totuu kon kita naa in ki adíbí mita i Allah. Tuamai dunia inta moraat naa in diá nonotaau kon i naton, lantaran dunia diá nonotaau kon i Allah.

YOHANES 1 3:2

Utat mita inta kinotabiku! Tanaa mako kita ain nobaḻí ki adí i Allah, táe kaadaan naton kon singgai moiduduimai in diápa notarang.Tongá kinotaauan naton kon aka ki Kristus in mamangoi, kita naa in mobaḻí ná Sia, sin kita in mokoontong kon i-Nia kon bonu in kaadaan-Nea inta sabanarnea.

WAHYU 21:7

Intau mita inta mountung, mokouḻí kon soaḷ mita natua nongkon i-Nakó, bo Akuoi in mobaḻí ki Allahnea, bo sia in mobaḻí ki adí-Ku.