SURAT I PAULUS KON JAMAAT RUM 5:21 - Alkitab Singog In Mongondow Masa In Tanaa

²¹ Kita naa in mustibí matoi popisí in nogaid domandon kon dosa. Táe ki Allah in notabibí kon i naton bo nobogoi in daḷan kon i naton kon moyodame bui takin-Nea. Bo popisí in hubungan naton takin i Allah notompiadon bui, dá Sia in nobogoi domandon in kobiagan moitutui bo inta mononoi kon i naton inta pinongin i Yesus Kristus, ki Tuhan naton.

SURAT I PAULUS KON JAMAAT RUM 5:21 ပူးပေါင်းရင်းမြစ်များ

MATIUS 25:46

Bo mosia naa in bonuon kon tampat pohohukuman mononoi, táe intau inta mopia in mokouḻí kon kobiagan inta mononoi.”

YOHANES 1:14

Pirman ain nobaḻí intau, Sia in nogutun kon sigad naton, bo kita ain nokoontong kon kamuliaan-Nea. Kamuliaan inta sinarima-Nea saḷaku Adí tuḷong i Amá. Pinongin i-Nia tua kita mokoontong kon i Allah bo tabi-Nea kon i naton.

YOHANES 10:28

Mosia tua in ogoian-Kubí in kobiagan mononoi, bo nopasti bidon kon diábí moputu-putú. Diábí tobatúmai intau in mokoagow kon i monia nongkon ḻima-Ku.

SURAT I PAULUS KON JAMAAT RUM 4:13

Ki Allah ain nodandi kon i Abraham bo buínea kon dunia naa in mobaḻíbí kapunyaan i Abraham. Dandi tatua in deemanbí pinodoyon kon kotoindudui i Abraham kon hukum in agama Yahudi, táe popisíbí in sia mopirisaya kon i Allah, dá sinarima i Allah in sia saḷaku intau inta mokosanang kon gina-Nea.

SURAT I PAULUS KON JAMAAT RUM 5:12

Dosa in sinumuot kon dunia naa nongin intau tobatú, bo nongkon dosa tatua nomuká domandon in popatoi. Akibatnea popatoi tatua in nongawasadon kon bayongan intau, sin bayongan intau in nogaid domandon kon dosa.

SURAT I PAULUS KON JAMAAT RUM 5:14

Táe umpaka natua popatoi in nongawasa bidon kon bayongan intau nongkon sempo i Adam dapot kon sempo i Musa. Umpakabí intau mita diá nogaid kon taḷá ná inta inaidan i Adam, táe mosia in noitakin bidon kinawasa in popatoi. Ki Adam tua in gambaranbí i-Nia inta moiangoi kon singgai moiduduimai.

SURAT I PAULUS KON JAMAAT RUM 5:17

Popisí in taḷá in intau tobatú dá bayongan in intau kinawasa domandon in popatoi inta nongin intau tobatú tua. Táe moiḻiubí domandon nongkon tua in akibat nongkon onu inaidan in intau tobatú ibanea, tuata in ki Kristus. Pinongin i-Nia tua, ki Allah in nobogoi in totabi-Nea inta totok in moḷoben kon intau mobayong, bo tongábí pinonotabi-Nea kon i monia, sahingga in mosia in noyodamedon bui takin i Allah; mosia in mongawasa kon dunia naa pinongin i Kristus.

SURAT I PAULUS KON JAMAAT RUM 6:12

Dika pomayá mako in kobiaganmu inta diá mononoi kon dunia naa in kawasaan dosa, sinbá diádon iko dumudui kon ibognea inta moraat.

SURAT I PAULUS KON JAMAAT RUM 6:14

Dosa in diá bidon mongawasa kon i monimu, sin moiko in diádon nobiag kon bonu in kawasa in hukum agama in Yahudi, táe kon bonu bidon kawasa in totabi Allah.

SURAT I PAULUS KON JAMAAT RUM 6:16

Bá kotaauan monimu, kon aka moiko bo moposarakan in awakmu kon tobatú intau sin mogaid kon onu inta kinoibognea, yo moiko in mobaḻí bidon ata in intau inta dinuduian monimu tatua. Ata in dosa in modia kon i monimu mayá in popatoi, táe aka ata inta motoindudui kon i Allah yo tua in modiabí kon i monimu mayá in kobiagan.

SURAT I PAULUS KON JAMAAT RUM 6:23

Sin aka bungai in dosa tua in popatoibí, táe kobiagan mopia bo mononoi in moyotakin i Kristus Yesus, Tuhan naton, tua in inogoibí i Allah pinomorosen.

SURAT I PAULUS KON JAMAAT RUM 8:10

Aka ki Kristus bo nobiagdon kon bonu in gina monimu, dá umpakabí awakmu matoi popisí in dosa, táe Roho i Allah mobogoibí in kobiagan kon inimu, sin hubunganmu takin i Allah in notompiadon.

TITUS 2:11

Sin ki Allah ain nopoontong in totabi-Nea sin moposaḷamat kon bayongan in umat kon dunia naa.

IBRANI 4:16

Tuamai, koḻigai in kita dika moondo-ondok in mayá kon tayowon i Allah inta nomarenta takin pia in gina. Motabibí in ki Allah kon i naton bo ogoian-Neabí in barakat, sahingga motarimabí in kita kon totuḷung-Nea aka kon wakutuneadon.

PETRUS 1 5:10

Táe naonda in moiko nokorasa kon roriga motoyong, yo ki Allah tontaní in moposompurna kon i monimu. Potorindogon-Nea bo iropotan in moiko. Sin Sia in Allahbí inta totok mopia in gina, inta ain nogoiní kon i monimu sinbá moitakin doman mokorasa kon kopia-Nea inta mononoi pongin i Kristus.

PETRUS 2 1:1

Utat mita inta totu-totuudon nopirisaya ná doman kami naa! Ki Yesus Kristus, inta Allah bo Datu Mopoposaḷamat naton in nobogoidon in kasampatan kon i naton mopirisaya kon i-Nia, sin Sia ain nogaid kon onu inta mobanar. Surat tanaa in nongkon i Simon Petrus, tobatú mogogundoi bo rasul i Yesus Kristus.

YOHANES 1 2:25

Bo naa in pinodandi i Kristus tontaní kon i naton: kobiagan motompia bo mononoi.