SURAT I PAULUS KON JAMAAT RUM 3:21 - Alkitab Singog In Mongondow Masa In Tanaa

²¹ Ki Allah ain nobogoi in daḷan kon naonda in intau moyopia bui takin-Nea; bo aid tatua in diábí in hubungannea takin hukum in agama Yahudi. Tongá buk mita i Musa bo buk in nabi mita noponiatadon kon soaḷ tatua,

SURAT I PAULUS KON JAMAAT RUM 3:21 ပူးပေါင်းရင်းမြစ်များ

KINOBAḺIAN 15:6

Ki Abram in nopirisaya kon i Tuhan, dá tuamai sia in sinarima i Tuhan nobaḻí intau inta mokosanang kon gina-Nea.

YESAYA 46:13

Akuoi in mopodiug bidon kon singgai popoḷuatan, kasaḷamatan inta ogoi-Ku in diá bidon mobaḷui. Akuoi in moposaḷamatbí kon Yerusalem, bo mobogoi in kahoromatan kon Israel.”

YESAYA 51:8

Mosia in moyopúbí bo mobuḻi naonda bo pakeang kinaan in anoi bo kaeng bubuḷ in domba kinaan in sisik. Táe kasaḷamatan inta inogoi-Ku in mononoibí, kountungan-Ku in umuranbí oyúon modapot in adí bo ompu.”

YESAYA 54:17

Táe batúan in sonjata inta sinontaḷ sin moḷawang kon inimu, in diábí motuoi. Bo bayongan in inta pinonapud kon bonu in pongadilan in poniatamubí kon diá totuu. Akuoi in mobogoibí in tombuinag kountungan kon mogogundoi-Ku mita,” natuata in singog i Tuhan.

YESAYA 61:10

Yerusalem in noguman, “Moḷunganga in ginaku popisí in ki Tuhan, ginaku in mosanang sin ki Allah. Naonda bo nonikaan ḷoḷaki bo bobay nopogiḷambá in inta mongogaga, natuata in pinopopaké i Tuhan kon inakó ḷambung kasaḷamatan bo kountungan.

YEREMIA 33:16

Intau in Yohuda bo intau inta nogutun kon Yerusalem in posaḷamatonbí bo mobiag moaman. Kotá in Yerusalem in tangoian ‘Tuhan Mopoposaḷamat Naton’.

DANIEL 9:24

Pitu pokali kon pitu nopuḷú notaong in sempo inta ain sinantú i Allah sin mopoḷuat kon bangusamu bo kotámu inta motusi tatua nongkon dosa bo aid moraat. Bayongan in dosa in ampunganbí bo kooadil inta mononoi in posindogonbí, dá oontongon bo toḻindap tatua in moniatadon, bo Baḷoi Tuhan inta motusi tatua in posumba bui kon i Tuhan.

LUKAS 24:44

Onda intua Sia in noguman kon i monia, “Naadon in soaḷ mita inta ain pinoguman-Ku kon i monimu kon wakutu in kotaki-takinpa monimu in Akuoi: kon bayongan inta ain pinais soaḷ Akuoi kon bonu in buk i Musa bo buk in nabi mita, bo buk Mazmur, tua in mustibí mobaḻí.”

YOHANES 1:45

Bo ki Pilipus in noyodungkuḷ i Natanael bo poḷat noguman kon inia, “Nouḻídon nami in intau inta sinangoi i Musa kon bonu in buk hukum i Allah, bo inta ain pinotaau muna in nabi mita. Sia tua in ki Yesus, intau in Nazaret, ki adí i Yusup.”

OUMAN IN RASUL MITA 10:43

Bayongan in nabi komintan bidon nongonguman kon soaḷ Sia tua. Mosia in noguman, kon bayongan intau inta mopirisaya kon i Yesus, komintan ampungan in dosanea takin kawasa inta nongkon i Yesus.”

OUMAN IN RASUL MITA 15:11

Kita komintan in nonotaau bo nopirisaya bidon kon kita in posaḷamaton pinodoyonbí kon tabi i Tuhan Yesus; ná doman tua in mosia.”

OUMAN IN RASUL MITA 26:22

Táe tantúpabí sinotabi i Allah in akuoi dá notaaupabí sinimindog kon naa in tanaa mako bo mongonguman kon bayongan inta ain kinorasaanku kon bayongan intau – moḷoben andeka mointok. Onu in inoumanku naa in diábí noyoposi in onu inta ain muna pinoguman in nabi mita bo i Musa;

OUMAN IN RASUL MITA 28:23

Dá mosia bo ki Paulus in nonantú kon tobatú singgai poyodungkuḷan monia. Bo kon singgai inta ain sinantú tatua nobayongdon intau in namangoi kon baḷoi inta pinogutunan i Paulus. Bo nongkon doḷo-doḷompa dapot in ḷoḷabungnea ki Paulus noginsilang bo nopotaau kon i monia soaḷ naonda in ki Allah momarenta saḷaku Datu. Sia in nobaca kon tontagá inta pinais kon buk i Musa, bo buk i nabi mita sinbá mosia in mopirisayadon kon i Yesus inta ain pinotaa-taaunea mako tua.

SURAT I PAULUS KON JAMAAT RUM 1:17

Sin pinongin Habar Mopia tatua ki Allah in nopoontongdon kon naonda in pogogaid sinbá hubungan in intau bo i Allah in moyoguḻitdon bui: aidnea kon tua in tongábí mopirisaya kon i Allah nongkon pinomangkoianpamai modapot in pangabisan. Tua in ná inta ain pinais kon bonu in Buk Motusi, nanaa, “Intau in nopirisayadon kon i Allah, sahingga in hubungannea takin i Allah notompiadon bui, bo intau tatua in mobiagbí!”

SURAT I PAULUS KON JAMAAT RUM 1:2

Habar Mopia tatua aindon pinodandi i Allah kon tungkuḷ intua inta pinongin nabi-Nea mita bo inta pinaisdon kon bonu in Buk Motusi.

SURAT I PAULUS KON JAMAAT RUM 16:26

Táe masai naa, podudui in parenta i Allah inta mononoi, tomayá tatua ain pinoniata bo ain pinotaau kon bayongan intau, inta pinongin onu inta ain pinais in nabi mita, sinbá mosia komintandon mopirisaya bo motoindudui kon i Allah.

SURAT I PAULUS KON JAMAAT RUM 3:28

Sin nanaabí in simpod in singog: Intau in sinangoian noyopiadon bui i Allah, deemanbí popisí in nogaid kon onu inta pinais kon hukum in agama Yahudi, táe popisíbí in pirisayanea kon i Yesus Kristus.

SURAT I PAULUS KON JAMAAT RUM 5:19

Dá notongkai doman in naa, bayongan intau in nobaḻí binaradosa popisí in intau tobatú inta diá motoindudui. Ná doman tua in mobayong intau inogoian in kasampatan moyodame bui takin i Allah popisí in intau tobatú inta motoindudui kon i Allah.

SURAT I PAULUS KON JAMAAT RUM 5:21

Kita naa in mustibí matoi popisí in nogaid domandon kon dosa. Táe ki Allah in notabibí kon i naton bo nobogoi in daḷan kon i naton kon moyodame bui takin-Nea. Bo popisí in hubungan naton takin i Allah notompiadon bui, dá Sia in nobogoi domandon in kobiagan moitutui bo inta mononoi kon i naton inta pinongin i Yesus Kristus, ki Tuhan naton.

SURAT I PAULUS KON JAMAAT RUM 9:30

Dá, nanaa in kasimpulannea: Bangusa mita ibanea inta deeman Yahudi in diábí moramuji konbá motompia bui in hubungan monia takin i Allah. Táe popisí in mosia mopirisaya, dá sinompiadon bui i Allah in hubungan monia takin-Nea.

KORINTUS 1 1:30

Sin lantaranbí ki Allah, dá notobatúdon in moiko i Kristus. Bo lantaran doman kita nopirisayadon kon i Kristus dá kita in nonotaaudon kon bayongan in yagi-yagi. Siabí doman tua in nopoyotutui, nomiḻí bo notobut kon bayongan oaid naton inta diá mopia.

KORINTUS 2 3:9

Sin aka dodandian inta mobogoi in hukuman kon intau bo totok in mobayag, yo tantú moiḻiubí totok kon tua in bayag mopia kon dodandian inta monompia bui kon hubungan in intau bo i Allah.

KORINTUS 2 5:21

Sin Sia inta nodarit kon bayongan in oaid inta diá mopia, pinaké domandon i Allah mobaba kon bayongan in dosa naton, sinbá kita in buidon mobiag motompia takin i Allah sin notobatúdon i Kristus.

GALATIA 3:8

Bo kon Buk Motusi aindon pinais muna kon ki Allah in moposaḷamatbí kon intau mita inta deeman Yahudi, sin pirisaya monia kon i-Nia. Habar Mopia tatua aindon pinotaau muna kon i Abraham, tua inta mangaḻe in singog tanaa, “Barakat i Allah kon bayongan intau kon dunia naa in moponag mongin inimu.”

GALATIA 5:5

Táe aka kon i nami, kami in tongábí moharap mako kon totabi i Allah sin pinodoyon kon pirisaya kon i Kristus, ki Allahbí in mobogoi in kasampatan mobiag moyodame bui takin-Nea.

PILIPI 3:9

bo akuoi in totu-totuudon notobatú takin-Nea. Hubungan mopia takin i Allah in diábí nouḻíku sin popisí in dinumudui kon hukum in agama, táe tua in nouḻíkubí sin akuoi in nopirisayadon kon i Kristus. Dá tuamai hubungan mopia tua in namangoibí nongkon i Allah sin pinodoyon kon pirisaya kon i Kristus Yesus.

PETRUS 1 1:10

Kasaḷamatanbí tanaa inta ain pinirikisa kinopia totok in nabi mita inta nopoyaput in koyow i Allah soaḷ totabi bo barakat inta inogoi i Allah kon i monimu.

PETRUS 2 1:1

Utat mita inta totu-totuudon nopirisaya ná doman kami naa! Ki Yesus Kristus, inta Allah bo Datu Mopoposaḷamat naton in nobogoidon in kasampatan kon i naton mopirisaya kon i-Nia, sin Sia ain nogaid kon onu inta mobanar. Surat tanaa in nongkon i Simon Petrus, tobatú mogogundoi bo rasul i Yesus Kristus.