SURAT I PAULUS KON JAMAAT RUM 16:25 - Alkitab Singog In Mongondow Masa In Tanaa

²⁵ Dinayo-dayowdon in ki Allah! Sia in mongawasa moginrigon kon pirisaya monimu podudui in Habar Mopia nongkon i Allah inta pinotaauku soaḷ ki Yesus Kristus. Habar inta pinotaauku tua in notongkai in onu inta pinoontong i Allah kon inakó; tuata in soaḷ tomayá i Allah inta noonggotdon totok in kinotaauan intau.

SURAT I PAULUS KON JAMAAT RUM 16:25 ပူးပေါင်းရင်းမြစ်များ

MAZMUR 78:2

Akuoi in moibog mopoyaput in tangkí bo poumpamaan, bo moginsilang kon tangkí dungkuḷmai,

DANIEL 2:22

Siabí doman inta nobuká kon onu inta noibuni totok. Kinotaauan-Nea in bayongan inta nobaḻí kon bonu in sindip. Sia in binakut in sindar inta mobayag.

AMOS 3:7

Ki Tuhan Inta Totok in moḷantud in diábí kon dodai in onda in mogaid kon oaidan-Nea aka diápa muna moponiata in tomayá-Nea kon nabi mita, mogogundoi-Nea.

MATIUS 13:17

Sin poguman-Ku kon i monimu, “Mobarong in nabi bo intau inta mobanar in moibog mokoontong kon onu inta inontongdon monimu, táe mosia in diá nokoontong, bo mosia in moibog doman mokidongog kon onu inta aindon dinongog monimu, táe mosia in diá nokodongog.”

MATIUS 13:35

Makusud-Nea, bá motompodon Pirman inta pinoguman in nabi nanaa, “Akuoi in moibog motundú táe momaké in poumpamaan; Akuoi in moibog mongonguman kon inta nongoibuni pinangkoipamai kon dunia naa binaḻí.”

MATIUS 20:7

Mosia in notubag kon inia, ‘Kakaa diá onda intau mogoiní kon inami mogaid.’ Dá sia in noguman doman kon i monia, ‘bayádon moiko pogaid kon gobá in anggurku.’

OUMAN IN RASUL MITA 20:32

Bo tanaa mako in posarakankudon moiko kon i Tuhan sinbá Sia in moḷukad kon i monimu bo bá moiko in umuran kumadai mako kon totabi-Nea. Ki Allah in nopuḻing kawasa inta mokorigon kon i monimu bo Sia in mobogoi kon i monimu in barakat mita inta ain sinadia-Nea kon bayongan umat-Nea.

OUMAN IN RASUL MITA 9:20

Ki Saulus in nogutunpa kon Damsyik tongonumai nosinggai noyotakin in dumodudui mita i Yesus kon tua.

SURAT I PAULUS KON JAMAAT RUM 11:25

Utat mita! Haraponku mako moiko in diá monganggap kon ain nonotaau kon bayongan in yagi-yagi. Sin oyúon in soaḷ inta kinoibog i Allah, táe diápa kinotaauan in intau. Bo ibogonku in kotaauan monimu intua; nanaa: tongobotak intau in Yahudi mokopotogat kon gina, táe cara monia tua in tongábí modapot in motompodon in kobayong in intau inta deeman Yahudi in mamangoi kon i Allah.

SURAT I PAULUS KON JAMAAT RUM 14:4

Ki inebí in iko utat, sahingga in musti mopotaḷá kon ata intau ibanea? Moibanting ande moisindog in ata tatua, tua in urusanbí i tuangnea. Bo totuubí kon ata tatua in moisindogbí motorindog, sin mokomampubí in ki Tuhan in moḷukad sahingga in sia tantú simindog motorindog.

SURAT I PAULUS KON JAMAAT RUM 16:24

Poigumondon mako, ki Tuhan naton ki Yesus Kristus in momarakat kon i utat mita. Amin.]

SURAT I PAULUS KON JAMAAT RUM 2:16

Natuata in mobaḻí kon singgai inta ain sinantú tua. Kon Singgai tatua, podudui in Habar Mopia inta pinoyaputku naa, ki Allah pongin i Yesus Kristus mohakim kon bayongan inta noibuni kon bonu in gina bo raian in bayongan intau.

KORINTUS 1 1:23

Kami naa in tongábí mopoyaput in habar soaḷ ki Kristus inta minatoi pinopopakú kon kayu pinoyotaḻempang. Habar tatua in nokotersinggung kon intau mita in Yahudi, dá inanggap monia diá totuu in habar tatua.

KORINTUS 1 2:7

Kabijaksanaan inta poyaputku naa in nongkon i Allahbí. Kabijaksanaan tatua in diápa kinotaauan in bayongan intau kon dunia naa, táe munadon sinadia i Allah wakutu in diápa inaidan-Nea in dunia, sinbá mosanang in kita.

KORINTUS 1 4:1

Anggapbí in kami naa mogogaid mita kon oaidan i Kristus inta motanggung jawab mopotaau in tomayá mita i Allah inta diápa kinotaauan in bayongan intau kon dunia naa.

KORINTUS 2 4:3

Aka Habar Mopia inta pinoyaput nami tua bo diápa doman komangaḻean, yo dongka bidon intau mita inta tantú mongin daḷan popatoi in diá momangaḻe kon tua.

KORINTUS 2 4:5

Sin habar inta pinoyaput nami tua in deemanbí habar soaḷ oaidan nami tontaní. Táe habarbí soaḷ ki Yesus Kristus inta Tuhan; bo kami naa in tongábí simpaḷmu mita popisí in ibog i Tuhan.

GALATIA 2:2

Akuoi in minayá in Yerusalem sin ki Allahbí in nopotabá. Bo kon tobatú pinoyodungkuḷan takin itoi mita kon tua, akuoi noginsilang kon Habar Mopia inta pinoyaputku kon intau mita inta deeman Yahudi. Sin doíbí in akuoi aka usahaku koḻipod bo masa in tanaa, tongá mobaḻí diá baraguna.

EPESUS 1:9

Ibog-Neabí tontaní in nopotaau kon i naton in tomayá-Nea inta noibunipa tatua; Sinantú-Neadon kon tomayá-Nea tatua in iḷapatan-Neadon pongin i Yesus Kristus.

EPESUS 3:11

Tua in inaidan i Allah podudui in tomayá-Nea inta mononoi, inta inaidan-Nea pinongin i Kristus Yesus, Tuhan naton.

EPESUS 3:9

bo akuoi in pinaké doman i Allah mogaid kon oaidan tatua sinbá bayongan in intau monotaau kon naonda in pinogogaid i Allah inta nomia kon dunia naa, mogaid kon tomayá-Nea inta binuni-Nea kon dunia naa nongkon tungkuḷ intua.

EPESUS 6:19

Bo sambayangai doman in akuoi, sinbá wakutu in akuoi mosingog ogoian i Allah in singog mita inta moitutui, bo bá mobarani totok in akuoi mopotaau in onu inta noibunipa kon Habar Mopia tua.

KOLOSE 2:2

Naa komintan inaidanku sinbá moropotdon in gina monia bo mositabian poḷat mobiag motobatú, sahingga in mosia totu-totuudon momangarti bo moyakin poḷat monotaau kon onu inta binuni i Allah, tuata in ki Kristus tontaní.

KOLOSE 4:3

Sambayangai doman in kami sinbá ogoian i Allah in kasampatan mopia kon mopotaa-taau mako in habar soaḷ inta noibuni kon i Kristus. Inta lantaran soaḷ tatuata dá tanaa mako akuoi binonu kon ponjara.

TESALONIKA 1 3:13

Aka natua yo irigonan i Tuhan in gina monimu, sahingga in modaritdon totok in kobobiag monimu bo diá bidon in inta diá mopia in aidan monimu kon tayowon i Allah, ki Amá naton, kon wakutu in ki Tuhan naton ki Yesus mamangoi bui moyotakin in bayongan intau inta ain nobaḻí umat-Nea.

TESALONIKA 2 2:14

Tuata in mangaḻe pinogoinían i Allah kon i monimu inta pinodoyon kon pirisaya kon habar mopia inta pinoyaput nami kon i monimu. Ki Allah in nogoiní kon i monimu sin ibogon-Nea mokorasa in moiko kon kokokawasa i Tuhan naton ki Yesus Kristus.

TESALONIKA 2 3:3

Táe ki Tuhan in umuranbí mosatia. Moginrigon kon gina bo moḷukad kon i monimu nongkon Inta Moraat.

TIMOTIUS 2 1:9

Ki Allah in noposaḷamat bo nogoiní kon i naton bá mobaḻí umat inta kinotabi-Nea. Tua in inaidan-Nea, deemanbí pinodoyon kon oaid naton mopia, táe pinodoyon-Neabí kon makusud-Nea tontaní bo totabi-Nea inta pinongin i Kristus Yesus kon wakutupa in dunia naa diápa pinomia.

TIMOTIUS 2 2:8

Torop in naa: Habar Mopia inta pinoyaputku tua in habarbí soaḷ ki Yesus Kristus inta ain nobiag kon sigad in intau minatoi, inta pinolahir saḷaku buí i Daud.

TITUS 1:2

Totundú tatua in pinodoyonbí kon harapan kon kita in motarimabí kon kobiagan inta mopia bo mononoi. Kobiagan tatua in pinodandi bidon i Allah kon tungkuḷ in dunia naa diápa pinomia. Ki Allah in diábí monguboḷ.

IBRANI 7:25

Manangka intua ki Yesus in umuranbí motaau moposaḷamat kon intau mita inta namangoi kon i Allah inta mongin i-Nia. Sin Sia in nobiag mononoi bo umuran mopoyaput in mintahang kon i Allah sin kopontingan intau mita tatua.

PETRUS 1 1:20

Ki Kristus in piniḻídon i Allah kon wakutupa in dunia naa diápa pinomia. Bo kon singgai mita tumi naa, sia namangoi in dunia naa sinbá posaḷamaton in moiko.

PETRUS 1 5:10

Táe naonda in moiko nokorasa kon roriga motoyong, yo ki Allah tontaní in moposompurna kon i monimu. Potorindogon-Nea bo iropotan in moiko. Sin Sia in Allahbí inta totok mopia in gina, inta ain nogoiní kon i monimu sinbá moitakin doman mokorasa kon kopia-Nea inta mononoi pongin i Kristus.

WAHYU 10:7

Táe aka malaekat impitunea in mogirupdon kon torompetnea, yo aidandon i Allah in tomayá inta binuni-Nea, ná inta ain pinotaau muna kon intau mita inta nogaid kon oaidan-Nea bo kon nabi mita.”