SURAT I PAULUS KON JAMAAT RUM 14:20 - Alkitab Singog In Mongondow Masa In Tanaa

²⁰ Ḷukadaibí sinbá diá tongá soaḷ kokaanon, iko momoguyaat kon onu inta ain inaidan i Allah. Komintan kaanon diábí in pinoton, motaaubí modait kaanon, táe aka onu in kinaanmu tua mokopopisí kon intau ibanea baradosaan, dá iko in kotaḷá.

SURAT I PAULUS KON JAMAAT RUM 14:20 ပူးပေါင်းရင်းမြစ်များ

MATIUS 15:11

Deemanbí inta kinaan in haram; táe inta siningogbí, tuatabí inta mokonajis kon intau.”

MATIUS 18:6

“Táe ki ine in mokopopisí kon tobatú nongkon sigad in mongoadí mita tanaa in diádon mopirisaya kon i-Nakó, yo mopia-piabí aka gantung bo popotogot kon sigogownea bodongka taḷomon kon dagat.

OUMAN IN RASUL MITA 10:15

Táe bui oyúon in singog in dinongog noguman, “Onu inta aindon sinantú i Allah motaau kaanon, dikabí anggapon monimu haram intua.”

SURAT I PAULUS KON JAMAAT RUM 14:2

Oyúon in intau kopendirian kon sia in motaaubí mokaan kon bayongan in yagi-yagi. Táe intau inta diápa moyakin kon onu inta pinirisayanea tatua; kinotaauannea in tongábí kuyat in motaau kaanonnea.

SURAT I PAULUS KON JAMAAT RUM 14:21

Maníka dikadon mokaan kon ponoyá ande monginum kon anggur, ande mogaid kon onukabí inta mokopopisí kon i utatmu tumpaḷa Keresten tua, mogaid kon mokobaradosa.

EPESUS 2:10

Ki Allahbí in nomia kon i naton, bo pinongin i Kristus pinomia-Nea in kita, sinbá kita in mogaid kon soaḷ mita inta mopia inta ain sinadia-Nea kon i naton.

PILIPI 1:6

Ki Allahbí in nomangkoi kon oaidan mopia tatua kon inimu, bo moyakinbí in akuoi, kon tantú-Neabí ingguputan in oaidan-Nea tatua modapot kon singgai ki Kristus Yesus in mamangoidon bui.

TITUS 1:15

Bayongan in yagi-yagi in nodaritbí aka kon intau mita inta nodarit in raian. Táe aka kon i monia inta raian mokotor bo inta diá mopirisaya kon i Tuhan, yo diábí in tobatúmai in modarit, sin raian bo gina monia in komintan domandon mokotor!