SURAT I PAULUS KON JAMAAT RUM 14:18 - Alkitab Singog In Mongondow Masa In Tanaa

¹⁸ Intau inta nobantung natua kon i Kristus, sia tua inta mokosanang kon gina i Allah, bo sia in horomaton doman in intau ibanea.

SURAT I PAULUS KON JAMAAT RUM 14:18 ပူးပေါင်းရင်းမြစ်များ

KINOBAḺIAN 4:7

Aka iko mogaid kon inta mopia, yo pasti pogotmu in diábí morongut mako; táe aka iko mogaid kon inta moraat, dá dosa in dongka mogoḷat mako sin tumuot kon ginamu. Dosa in moibog mongawasa kon inimu, táe musti ḷawangonmu in sia.”

MOHOHUTUBA 9:7

Pongaanbí bo pobarasanang, inumdon in anggurmu takin ḷunganga in gina. Diábí mobogat in gina i Allah, sin kinoibog-Neabí intua.

MARKUS 13:34

Kaadaannea in ibarat tobatú intau inta nonaḷámai kon baḷoinea bo minayá in tampat moyayú. Sia nopotabá in bobantungnea mita noḷukad kon baḷoinea bodongka nosilai kon oaidan kon i monia kon batúannea. Bo sia in nongoyow kon intau inta pinoki ḷukadan in ngara sinbá umuran moḷukad mokopopia.

YOHANES 12:26

Intau inta moibog mogaid kon oaidan-Ku musti dumudui kon i-Nakó kon ondakabí in bayáan-Ku; sinbá kon onda in bayáan-Ku yo kon tua doman in sia. Intau inta mogaid kon oaidan-Ku horomatonbí i Amá-Ku.”

OUMAN IN RASUL MITA 10:35

Intau kabí nongkon onda, asaḷ bo moibog in mogaid kon inta kinoibog-Nea, yo tuabí in kinosanang in gina-Nea.

SURAT I PAULUS KON JAMAAT RUM 12:11

Tantú mokoporajing in mogaid, donaai mokopomaḷat. Pogaid kon oaidan i Tuhan takin ibog moḷoben inta nongkon Roho i Allah.

SURAT I PAULUS KON JAMAAT RUM 14:4

Ki inebí in iko utat, sahingga in musti mopotaḷá kon ata intau ibanea? Moibanting ande moisindog in ata tatua, tua in urusanbí i tuangnea. Bo totuubí kon ata tatua in moisindogbí motorindog, sin mokomampubí in ki Tuhan in moḷukad sahingga in sia tantú simindog motorindog.

SURAT I PAULUS KON JAMAAT RUM 16:18

Sin intau mita inta momia kon natua, deemanbí mogaid sin kopontingan i Kristus inta Tuhan naton, táe tongábí motayak kon kasanangan in gina monia tontaní. Dondouḷug bo singog monia moaḷus inta kodongogan tua in tongábí pakéon monia monguboḷ kon intau mita inta diápa nonotaau in onu bo onu.

SURAT I PAULUS KON JAMAAT RUM 6:22

Táe tanaa in moiko ain pinilatan nongkon kawasa in dosa bo nobaḻídon mogogaid mita kon oaidan i Allah. Kauntungannea kon tua moiko in nobiagdon umuran kon i Allah, bo bungainea kon tua in mokouḻí in moiko kon kobiagan inta mopia bo mononoi.

KORINTUS 1 7:22

Sin ata inta mopirisaya kon i Tuhan, nobaḻí bidon intau i Tuhan inta nobebas. Bo intau nobebas inta nopirisayadon kon i Tuhan, nobaḻí bidon mogogaid kon oaidan i Tuhan Yesus Kristus.

KORINTUS 2 4:2

Kami in doíbí tongá umuni-uni sin mokooyábí in natua. Bo kami in doíbí mogaid takin gina inta diá motuḻid bo poḷat doman mopotaḷá in singog i Allah. Kami in nogaid kon oaidan i Allah takinbí gina motuḻid ná inta kinoibog-Nea. Tuamai in harapon mako tua, kopiaan in monilai kon i nami.

KORINTUS 2 5:11

Kotaauanbí in nami mangaḻe in moondok kon i Tuhan. Manangka intua kami moramuji sinbá pirisayaan in bayongan intau. Totokbí in kinotaauan i Allah in kami naa. Tuamai in haraponku in kotaauan doman monimu in kami.

KORINTUS 2 5:9

Tuamai kami in totok moramuji moposanang kon gina i Allah, kon wakutu in mobiagpa kon dunia naa ande kon baḷoi inta ain sinantú i Tuhan.

KORINTUS 2 6:4

Táe naabí in popoontong nami kon bayongan in intau, onukabí in aidan nami, yo pinoniatabí nami kon kami in totu-totuubí mogogaid mita kon oaidan i Allah. Sin bayongan in yoyiga ain bidon nodait nami sinarima takin gina moonow:

KORINTUS 2 8:21

Sin kami in moibogbí mogaid kon inta mopia, deemanbí tongá kon tayowon i Allah táe kon tayowonbí doman in intau.

PILIPI 4:18

Bayongan inta paraḷuonku inogoidon monimu kon inakó, sedang bo noiḻiudon kon tugat! Bayongan inta inogoi monimu inta pinoki dia kon i Epaproditus aindon sinarimaku. Dá tanaa mako komintandon oyúon in onu inta paraḷuku. Bayongan inta inogoi monimu kon inakó tua naonda bo kobondu in kuruban inta pinosumba kon i Allah bo inta sinarima domandon i Allah takin pia in gina.

PILIPI 4:8

Naa in simpod in singogku utat mita, porai kon onu inta oyúon in baragunanea, bo onu inta motaau dayowon, ná soaḷ mita inta moitutui, inta horomatonmai, inta moadil, modarit, inta moromimit bo inta mopia.

KOLOSE 3:24

Sinbá kotaauan monimu, tarimaanbí monimu in tontuḻínea nongkon i Tuhan. Onu in sinadia i Tuhan kon umat-Nea, tuabí in ogoi kon inimu. Sin tuang sabanarnea inta yogot bantungan monimu tua in ki Kristusbí tontaní.

TIMOTIUS 1 2:3

Sin natuabí in mopia bo kinoibog i Allah inta mopoposaḷamat naton.

TIMOTIUS 1 5:4

Táe aka intau boba-bobay tatua kogadípa ande kogompupa, yo ki adínea andeka ki ompuneapa tatua in muna tongginaan kon bá umuran tarukiraan in guyanga monia tatua, bo motuḻí kon tabi i iná ande i baay monia tua, sin tuabí in kinoibog i Allah.

PETRUS 1 2:12

Kopiaan in oaidmu kon sigad in intau mita inta diápa nonotaau kon i Tuhan, sahingga in aka singogon monia kon iko in intau moraat, yo koontongandon monia in oaidmu inta mopia, dá modayowdon in mosia kon i Allah kon singgai koangoian-Nea.

PETRUS 1 2:20

Sin onubí in istimewanea aka moiko in motarima kon hukuman inta patus tarimaan monimu popisí in moiko nogaid kon inta noitaḷá? Táe aka moiko bo nogaid kon inta mopia táe sinambok doman, yo barakatanbí i Allah in moiko.

PETRUS 1 2:5

Moiko nion in batu mita inta nobiag. Tuamai moiko in musti moibog pakéon pobaḷoi kon baḷoi i Allah inta kon soroga. Takin natua moiko in mobaḻí imang mita inta nobiag tongádon kon i Allah, bo inta pinongin i Yesus Kristus noposumba kon i Allah in kuruban inta mokosanang kon gina-Nea.

PETRUS 1 3:16

Táe koaḷusbí in pototubag takin horomat. Ginamu in musti totu-totuu motuḻid, sinbá aka poponapudan uboḷ in moiko lantaran nobiag notompia saḷaku dumodudui i Kristus, dá intau inta noponapud in uboḷ tatua kon inimu buibí mooyá tontaní.