SURAT I PAULUS KON JAMAAT RUM 12:9 - Alkitab Singog In Mongondow Masa In Tanaa

⁹ Kotabibí takin gina motuḻid. Poyayú inta moraat bo kadai kon onu inta mopia.

SURAT I PAULUS KON JAMAAT RUM 12:9 ပူးပေါင်းရင်းမြစ်များ

MAZMUR 101:3

aid moraat in diábí pomayáku mako. Kodoí-Kubí in dodia in intau inta nomaḻidawan, bo doíbí in akuoi mopandungmai kon i monia.

MAZMUR 119:104

Hukum-Mu mita in nobogoi kon inakó in pomomangaḻe, dá doíbí in akuoi kon aid motombogá.

MAZMUR 119:163

Bayongan in uboḷ kinodoíku, táe hukum-Mu in kinoibogku.

MAZMUR 34:14

Dika mosingog kon inta mongoraat, bo dika moibog kon tompobaḻik.

MAZMUR 36:4

Tosingogonnea mita in moraat bo nopuḻing in tompobaḻik, sia in diá bidon mogaid kon inta mopia bo mobijaksana.

MAZMUR 45:7

Ki Allah in nobogoi in kawasa kon inimu momarenta, kawasa-Mu in modapotbí in mononoi; pinodoyon kon inta moadil iko in momarenta kon rayatmu.

MAZMUR 55:21

Yobayatku dungkuḷmai monubu kon yobayatnea mita, iḻimimpatdon in sia kon dodandiannea.

MAZMUR 97:10

Ei moiko inta moibog kon i Tuhan, kodoídon in inta moraat! Sin ki Tuhan in noḷukad kon kobiagan in umat-Nea, Sia in nopoḷuat kon i monia nongkon kawasa in intau inta diá mopirisaya.

AMSAL 26:25

Umpaka mobahasa mako in sia, yo dikabí pirisayaan; sin yaatnea ain nongawasa kon ginanea.

AMSAL 8:13

Mohoromat kon i Tuhan tua in mangaḻenea in mondoí kon inta moraat; akuoi in doíbí kon aid moḷoḷatú bo mododia. Kodoíkubí in dodia inta moraat bo tosingogon mita inta monguboḷ.

YEHEZKIEL 33:31

Mosia in namangoi moyo-moyokapung bo saḷaku umat-Ku ḻimitú in mosia mokidongog kon tosingogonmu mita, táe onu in pokiaidmu diábí duduian monia. Bibig monia in moguman kon tosingogon mita motabi, táe gina monia in tongábí morai kon kauntungan.

AMOS 5:15

Kodoídon in inta moraat, kotabidon inta mopia, bo posindogdon in inta moadil. Dika-dika bo ki Tuhan in motabidon kon intau mita inta kiagatneapa nongkon bangusa in Israel.

MATIUS 26:49

Noiyaputmai intua Sia inumuna nokipodungkuḷ kon i Yesus bo noguman, “Salam, Pak Guru!” Bodongka nongayok kon i-Nia.

YOHANES 12:6

Ki Yudas noguman natua, deemanbí popisí sia moibog monarukira kon intau bogá táe popisíbí in sia mononakow. Sia mokakitdon in mogamá kon doit nongkon kas in doit inta pinoki kadai kon inia.

OUMAN IN RASUL MITA 11:23

Naonda in noiyaput kon tua in ki Barnabas, bo nokoontong kon naonda in Allah nomarakat kon i monia, nopia totok in ginanea. Bo sia in nopoigum domandon kon bá mosia in totu-totuudon mopirisaya bo motoindudui kon i Tuhan.

KORINTUS 2 6:6

Takin gina motuḻid, mobijaksana, mosabar bo mopia in gina, pinoniatadon nami kon kami in mogogundoibí i Allah. Bo takin kinumadai kon totuḷung in Roho i Allah, bo takin tabi inta noiḷuai nongkon gina inta motuḻid,

KORINTUS 2 8:8

Naa in potaauku kon i monimu deemanbí saḷaku parenta. Táe moponorop kon nobayongdon totok intau moramuji motuḷung kon tumpaḷa intau, tuamai moibog doman in akuoi monotaau mongo nodapot domandon onda in tabi monimu kon tumpaḷa intau.

TESALONIKA 1 2:3

Totundú nami in noitutuibí. Deemanbí makusud inta diá mopia andeka monombodok.

TESALONIKA 1 5:15

Ḷukadai sinbá diá in mosituḻían intau kon soaḷ mita inta moraat. Umuran poramuji in mogaid kon inta mopia kon intau mita.

TESALONIKA 1 5:21

Bayongan in yagi-yagi musti ujionpa muna, onda in mopia, tua in aidan.

TIMOTIUS 1 1:5

Akuoi in mononggina nanaa sinbá intau kopakéandon in gina modarit motuḻid bo totu-totuudon mopirisaya kon i Tuhan, sahingga in oyúondon in totabian kon tumpaḷa intau.

IBRANI 1:9

Inta moadil in koibog-Mu bo inta motombogá in kodoí-Mu; Manangka intua ki Allah, Allah-Mu in nomiḻí kon ini-Mu; bo nobogoi in kahoromatan inta mokopoangoi kon ḷunganga in gina inta moiḻiu kon yobayat-Mu mita.”

IBRANI 12:14

Poramuji umuran mobiag motompia takin bayongan intau. Poramuji doman mobiag mokudus takin i Tuhan. Sin diábí in tobatúmai intau mokoontong kon i Tuhan aka diá mobiag natua.

YAKOBUS 3:17

Táe intau inta nokouḻí kon kabijaksanaan nongkon i Allah, yo sia in muna-munamai totok modarit, onda intua moibog in sia kon dodamean, mobahasa mako, bo motoindudui. Moḷoben in tabinea bo oaidnea mongopia. Diábí in sia momiḻí kon intau bo diábí tongá ki ubo-uboḷmai mopia.

PETRUS 1 1:22

Popisí in moiko bo umuran dinumudui kon onu inta sinundú i Allah, dá tabidon in nondarit kon i monimu sahingga in totu-totuudon in moiko motabi kon intau mita inta tumpaḷa mopirisaya kon i Kristus. Pogumanku bui, totu-totuudon positabian in moiko kon tobatú bo tobatú takin gina motuḻid.

PETRUS 1 4:8

Tongá soaḷ tanaa inta totok in moponting, moiko in musti totu-totuu mositabian tobatú bo tobatú, sin aka moiko bo mositabian dá mangaḻenea kon tua moiko in moibog doman mosiampungan.