SURAT I PAULUS KON JAMAAT RUM 11:36 - Alkitab Singog In Mongondow Masa In Tanaa

³⁶ Ki Allah in nomia kon bayongan yagi-yagi. Komintanbí nongkon i Allah bo pinomakusudbí doman kon i-Nia. Dinayo-dayowdon in ki Allah nodapot in kopaḷutan dunia naa! Amin.

SURAT I PAULUS KON JAMAAT RUM 11:36 ပူးပေါင်းရင်းမြစ်များ

MAZMUR 115:1

Deemanbí kami, o Tuhan, deemanbí kami, táe tongábí Iko in musti dayowon, sin Iko in mosatia bo umuran motabi.

MAZMUR 33:6

Ki Tuhan in nomarenta, dá nobaḻí in ḷangit; mata in singgai, buḷan bo tundi pinomia-Nea pinongin tosingogon-Nea.

AMSAL 16:4

Bayongan yagi-yagi inta inaidan i Tuhan oyúonbí in makusudnea; bo makusud in intau moraat tuata in bodito.

YESAYA 42:12

Yo mosia in mohoromatdon kon i Tuhan, bo mopotaaudon in tangoi-Nea kon ḻipú mita moyayú.

DANIEL 4:3

Totuu moḷoben in mujizat inta pinomia-Nea! Totuu motoyang in inta mokoherang inta inaidan-Nea! Ki Allah in mobaḻíbí datu modapot in mononoi. Sia in mongawasa modapot in kopaḷutannea.”

DANIEL 4:34

Naonda in pitu notaong inta sinantú tatua noitaḻibdon, iḷumangag in akuoi kon ḷangit, bo nosadardon bui in ginaku. Dá dinayowku in ki Allah Inta Totok in moḷantud. Inuntu bo pinomuliaku in Sia inta nobiag mononoi tua. “Ki Allah in mobaḻí datu modapot in mononoi. Sia in nongawasa modapot in kopaḷutannea.

MATIUS 6:13

Donaaidon pomayá mako in kami kobuḻian in pirisaya kon dodai in kami koantugan in totungkuḷ, táe pilataidon in kami nongkon kawasa i inta Moraat! [Sin Ikobí in Datu inta mokawasa bo momulia dapot in mononoi. Amin.]’

LUKAS 19:38

Mosia in nomaḷú nanaa, “Binarakatan in Datu inta namangoi kon bonu in tangoi Tuhan! Dodamean kon soroga, bo dinayo-dayowdon in ki Allah!”

LUKAS 2:14

“Dinayo-dayowdon in ki Allah kon tampat inta Totok in Moḷantud! Bo dodamean umuran kotaki-takin monimu, intau inta umuran mogaid kon mokosanang kon gina i Tuhan!”

OUMAN IN RASUL MITA 17:28

Sin ná inta kain singog in intau, ‘Kita naa in nobiag bo motaau mamagí mamako modapot in oyúon kon dunia, lantaranbí kawasa-Nea.’ Ná doman kain momomantun monimu, ‘Kita naa in komintanbí ki adí-Nea mita.’

SURAT I PAULUS KON JAMAAT RUM 16:27

Tongábí Sia-sia mita in Allah, mobijaksana totok in Sia. Poigumondon mako Sia in umuran duíon bo dayowon pomuḷoi mako pongin i Yesus Kristus! Amin. Horomat nami, Ki Paulus, mogogaid kon oaidan i Kristus Yesus

KORINTUS 1 11:12

Sin umpaka inaidan nongkon ḷoḷaki in bobay inta muna, táe noiduduimai kon tua ḷoḷaki in noilahir bidon nongkon bobay; sin bayongan in yagi-yagi komintanbí nongkon i Allah.

KORINTUS 1 8:6

Táe kita in nopirisayabí kon tongábí tobatú in ki Allah. Inta nomaḻí kon bayongan bonu in dunia naa. Bo tongábí mobiag kon kopontingan-Nea in kita. Ki Tuhan in tongábí doman tobatú, tuata in ki Yesus Kristus. Pinongin i-Nia tua bayongan in yagi-yagi binaḻí, bo lantaran doman Sia dá nobiag in kita.

GALATIA 1:5

Dinayo-dayowdon in ki Allah nodapot in koyoyangan dunia naa! Amin.

EPESUS 3:21

Ki Allah in musti umuran dayowon, modapot kon adí bo ompu kon bonu in jamaat, pongin i Yesus Kristus. Dinayo-dayowdon in ki Allah modapot in kopaḷutannea! Amin.

PILIPI 4:20

Dinayo-dayowdon in ki Allah, ki Amá naton modapot in kopaḷutan dunia naa. Amin.

TIMOTIUS 1 1:17

Ki Allahbí tua in Datu inta nongkon pinomangkoianmai modapot in kopaḷutan in dunia naa, inta patus horomaton bo dayowon sin tongábí Sia in Allah inta mononoi, inta diá koontongan bo inta totobatú! Amin.

TIMOTIUS 1 6:16

Tongábí Sia in diá kokawasaan in popatoi bo inta nobiag kon sindar inta diá motaau diugan i inekabí. Diábí in tobatúmai intau mokoontong kon i-Nia, bo totuubí kon diábí ontongon intau in Sia. Tongábí Sia in patus horomaton sin kawasa-Nea in noiḻiu kon bayongan kawasa kon dunia naa modapot in kopaḷutan dunia naa! Amin.

TIMOTIUS 2 4:18

Totuubí kon ki Tuhan in momilatbí kon inakó nongkon bayongan tomayá moraat, sahingga in diaan-Neabí in akuoi tumuot kon dodatuan-Nea kon soroga takin saḷamat. Tuamai in tantúbí dayow in Sia modapot in kopaḷutan dunia naa! Amin.

IBRANI 13:21

Poigum mako, ki Allah inta nobaḻí pangkoi in kobiagan motompia, umuran mobogoi in bayongan inta mopia inta paraḷu pakéon monimu mogaid kon onu inta koibog i Allah. Bo poigumon doman mako takin totuḷung i Yesus Kristus, popoaidon i Allah kon i naton in onu inta kinoibog-Nea. Tantúbí dayow in ki Kristus dapot in kopaḷutannea! Amin.

IBRANI 2:10

Totuu kon patus bidon in ki Allah inta nomia kon bayongan in yagi-yagi mopobayá in onu inta imakusud-Nea tontaní. Binaḻí-Nea in ki Yesus mopoposaḷamat inta nosompurna pinodoyon kon daḷan inta totok in moyoyiga. Tua in daya i Allah sinbá mobayong intau in motaau oiníon-Nea mayá in tampat inta mopia totok takin i Yesus. Sin Siabí in nobuká kon daḷan kon i monia sinbá mosia in motaau posaḷamaton.

PETRUS 1 4:11

Intau inta mopoyaput in habar, sia mustibí mopoyaput in habar nongkon i Allah, intau inta mobantung kon intau ibanea, mustibí pakéonnea in ropot inta nongkon i Allah, sinbá kon bayongan in yagi-yagi ki Allah in dayowon pongin i Yesus Kristus. Sia tua in kitogi kamuliaan bo kawasa inta mononoi. Amin.

PETRUS 1 5:11

Siabí doman tua inta mongawasa modapot in kopaḷutan in yagi-yagi! Amin.

PETRUS 2 3:18

Umurandon kobiag in moiko kon bonu in totabi i Tuhan Yesus Kristus, Tuhan bo Mopoposaḷamat naton. Poramuji totok sinbá moiko modugangdon monotaau kon soaḷ Sia. Dinayo-dayowdon in ki Allah nongkon tanaa mako modapot in kopaḷutannea! Amin. Horomat nami, Ki Petrus

YUDAS 1:25

Tongábí Sia tua in ki Allah, Mopoposaḷamat naton pongin i Yesus Kristus Tuhan naton. Siata in ki Allah inta momulia, Moḷoben, mokawasa bo inta mokobangkaḷ nongkon tungkuḷpa intua, masai naa bo modapot kopaḷutan in dunia naa! Amin.

WAHYU 19:1

Nopaḷut mako kon tua, akuoi in nokodongog kon naonda bo giow in intau mobayong inta nongkon soroga, noguman, “Dayowdon in ki Allah! Ki Allah naton inta mopoposaḷamat; Sia in Allah inta Moḷoben bo Mokawasa!

WAHYU 21:6

Bo Sia in noguman, “Komintandon nobaḻí! Akuoi naa in ki Alpa bo ki Omega, ki Inta muna-munamai bo ki Inta tumi-tumimai, Akuoibí naa in ki Tuhan nongkon pinomangkoian nodapot in pangabisan. Intau inta moyogang in poinumon-Ku, bo tongábí ogoi pomorosen nongkon bokaká inta mobogoi in kobiagan.

WAHYU 7:10

Mosia in nomaḷú noropot nanaa: “Kasaḷamatan naa in tongábí nongkon i Allah naton inta iḻimitú kon tudu in tampat pomomarentaan bo nongkon i Adí in Domba tatua!”

WAHYU 7:12

Mosia in nosingog nanaa: “Amin! Dinayo-dayowdon in ki Allah naton inta momulia bo mobijaksana. Sia patus motarima kon sukur mita bo horomat. Sia in mokawasa bo moropot modapot in kopaḷutannea! Amin.”