PETRUS 1 5:10 - Alkitab Singog In Mongondow Masa In Tanaa

¹⁰ Táe naonda in moiko nokorasa kon roriga motoyong, yo ki Allah tontaní in moposompurna kon i monimu. Potorindogon-Nea bo iropotan in moiko. Sin Sia in Allahbí inta totok mopia in gina, inta ain nogoiní kon i monimu sinbá moitakin doman mokorasa kon kopia-Nea inta mononoi pongin i Kristus.

PETRUS 1 5:10 ပူးပေါင်းရင်းမြစ်များ

MAZMUR 119:28

Dimukudku in morumbun sin kinoantugan in susa, iropotaidon in akuoi podudui in dandi-Mu.

MAZMUR 138:7

Kon tungkuḷ in akuoi kinoantugan in susa, Iko in noḷukad kon kobiaganku. Iko in nonayow kon musungku inta koyogot in sinumorú bo pinosaḷamat-Mu in akuoi pinongin kawasa-Mu.

MAZMUR 86:15

Táe Iko, o Tuhan, ki Allah inta motabi bo mopia in gina, mosabar, nopuḻing in tabi bo mosatia.

MAZMUR 86:5

Iko in mopia, o Tuhan, bo moibog mongampung, intau inta mosambayang kon ini-Mu umuranbí kotabi-Mu takin tabi inta moiḻiu.

ZAKHARIA 10:12

Akuoi in moginropotbí kon umat-Ku, mosia in tumoḷutuibí in mosumba kon i-Nakó. Akuoi, ki Tuhan, ain nosingog.”

ZAKHARIA 10:6

“Intau in Yohuda in iropotan-Kubí, umat in Israel in posaḷamaton-Ku. Diaan-Ku in mosia mobui mangoi kon butánea popisí in Akuoi motabi kon i monia. Popoaid-Kubí kon i monia naonda bo bangusa inta diá kon dodai in onda in iḻiong-Ku. Akuoibí in ki Tuhan Allah monia, bayongan in sambayangnea in indongogan-Kubí bui.

LUKAS 22:32

Táe iko Simon, aindon sinambayangan-Ku, sinbá motantú in pirisayamu. Bo aka iko mobuidon mangoi kon i-Nakó, yo mustimubí doman iropotanmu in gina in bayongan ginaḷummu.”

SURAT I PAULUS KON JAMAAT RUM 15:13

Poigumon mako kon i Allah, inta tampat pohoharapan monimu, sinbá Sia in mobogoi kon i monimu in gina mosanang bo kobiagan motompia sin moiko in mopirisaya kon i-Nia. Poigumon doman mako sinbá moiko in umuran kawasaan in Roho i Allah, sahingga in modugangdon moḷoben in harapan monimu kon i Allah.

SURAT I PAULUS KON JAMAAT RUM 15:5

Poigumon mako ki Allah inta nobogoi in kasabaran bo ropot kon intau, umuran doman motuḷung kon i monimu, sinbá moiko in mobiag motobatú kon gina bo dumudui kon onu inta ain inaidan i Yesus Kristus.

SURAT I PAULUS KON JAMAAT RUM 16:25

Dinayo-dayowdon in ki Allah! Sia in mongawasa moginrigon kon pirisaya monimu podudui in Habar Mopia nongkon i Allah inta pinotaauku soaḷ ki Yesus Kristus. Habar inta pinotaauku tua in notongkai in onu inta pinoontong i Allah kon inakó; tuata in soaḷ tomayá i Allah inta noonggotdon totok in kinotaauan intau.

SURAT I PAULUS KON JAMAAT RUM 9:11

Wakutu in adí doyowa tatua in diápa pinononggadí, sinantúdon muna i Allah ki ine in piḻíon-Nea kon singgai moiduduimai. Onu in piniḻí i Allah, deemanbí noidoyon kon onu inta komampuan aidan in intau, táe pinodoyonbí kon ibog i Allah tontaní. Sin kon wakutu in ki adí i Ribka doyowa tatua diápa motaau mogaid kon onu inta mopia ande inta moraat,

SURAT I PAULUS KON JAMAAT RUM 9:24

Kitabí naa inta ain inoiní-Nea. Deemanbí tongá intau in Yahudi, táe bangusabí doman mita ibanea.

KORINTUS 1 1:10

Utatku mita! Podoyon kon tangoi i Tuhan naton ki Yesus Kristus, poigumonku sinbá moiko umuran mosiduduian bo mokokidongogan; donaai umuran mobobayowan. Tantúbí kotobatúon in gina bo raian.

KORINTUS 1 1:9

Ki Allah nogoiní kon i monimu sinbá moiko motobatúdon i Adí-Nea ki Yesus Kristus, Tuhan naton. Bo Siabí doman tua inta tantú mobogoi kon onu inta ain pinodandi-Nea.

KORINTUS 2 13:11

Naa in tongginaku pangabisan kon i monimu utatku mita, mokoposanangdon kon gina bo poramujidon sinbá umuran mobiag mosompurna. Umuran kon gina-gina mako in tongginaku mita naa. Umuran motobatú kon gina bo kon raian bo umuran mototabian. Sin ki Allah inta nobaḻí dodoyonan totabi bo kobiagan inta mopia, umuran kotaki-takin monimu.

KORINTUS 2 4:17

Sin yoyiga inta diá mobogat totok naa, inta tantú korasaan nami tanaa in mobogoibí in kopiaan mononoi, moiḻiu kon rupa-rupa roriga inta kinorasaan nami tontaní.

PILIPI 4:13

Kawasa inta inogoi i Kristus kon inakó umuran mobogoi in ropot kon inakó in tumayow kon kaadaan noyagi-yagimai.

KOLOSE 2:7

bo monguakat kon bonu i Kristus Yesus. Moiko in musti moposindogdon in kobiaganmu bo ki Kristus in dodoyonanmu. Mustidon modugang in pirisaya monimu kon i Kristus, podudui in onu inta ain sinundú kon i monimu. Bo ginamu in umurandon moibo-ibog mopoyaput in sukur moantó.

TESALONIKA 1 2:12

Kami umuran mononggina bo mobogoi in moginrigon kon gina monimu bo mondodak sinbá moiko in moidudui kon inta kinoibog i Allah. Inoiní-Nea in moiko sinbá mobaḻí umat kon Dunia-Nea inta Mobagu bo mokorasa kon kawasa-Nea inta moḷoben.

TESALONIKA 2 2:14

Tuata in mangaḻe pinogoinían i Allah kon i monimu inta pinodoyon kon pirisaya kon habar mopia inta pinoyaput nami kon i monimu. Ki Allah in nogoiní kon i monimu sin ibogon-Nea mokorasa in moiko kon kokokawasa i Tuhan naton ki Yesus Kristus.

TESALONIKA 2 3:3

Táe ki Tuhan in umuranbí mosatia. Moginrigon kon gina bo moḷukad kon i monimu nongkon Inta Moraat.

TIMOTIUS 1 6:12

Poramujidon totu-totuu mobiag saḷaku intau inta mopirisaya kon i Kristus. Mobiag mobanar bá mouḻímu in kobiagan mononoi. Sin tuabí in mangaḻe in pinogoinían i Allah kon inimu bo tua doman komintan inta umuran inakumu kon tayowon in intau moantó.

TIMOTIUS 2 1:9

Ki Allah in noposaḷamat bo nogoiní kon i naton bá mobaḻí umat inta kinotabi-Nea. Tua in inaidan-Nea, deemanbí pinodoyon kon oaid naton mopia, táe pinodoyon-Neabí kon makusud-Nea tontaní bo totabi-Nea inta pinongin i Kristus Yesus kon wakutupa in dunia naa diápa pinomia.

TIMOTIUS 2 2:10

Tuamai akuoi in notababí in notanggung kon tua komintan lantaran kopontingan in intau mita inta ain piniḻí i Allah, sinbá mosia in mokouḻí doman kon kasaḷamatan inta inaidan i Kristus Yesus bo takin kamuliaan inta mononoi.

IBRANI 9:15

Tuamai ki Kristus in nobaḻí tonsigad kon tobatú dodandian inta nobagu, sinbá intau inta inoinídon i Allah in motarimadon kon barakat mita mononoi inta ain pinodandi i Allah. Tua komintan in mobaḻíbí sin oyúon in minatoi; Siata in ki Kristus. Kinopatoian-Nea tatua in nopobebasbí kon intau mita nongkon taḷá mita inta pinomia monia wakutu in dodandian inta muna pinaképa.

PETRUS 1 1:15

Táe aidaibí in naa, kotusidon in moiko kon bayongan in yagi-yagi inta inaidan monimu, ná ki Allah inta ain nogoiní kon i monimu tua in motusibí totok.

PETRUS 1 4:10

Moiko in komintan bidon nokouḻí kon totabi mita inta noyo-noyoposi nongkon i Allah. Tuamai saḷaku mogogaid mita inta mopia pakédon kopira in onu inta ain pinonotabi i Allah tatua sin pogaid kon kopontingan moyotakin.

PETRUS 1 4:11

Intau inta mopoyaput in habar, sia mustibí mopoyaput in habar nongkon i Allah, intau inta mobantung kon intau ibanea, mustibí pakéonnea in ropot inta nongkon i Allah, sinbá kon bayongan in yagi-yagi ki Allah in dayowon pongin i Yesus Kristus. Sia tua in kitogi kamuliaan bo kawasa inta mononoi. Amin.

PETRUS 2 1:3

Ki Allah in nomakédon kawasa-Nea sin mobogoi kon i naton in bayongan yagi-yagi inta paraḷu pakéon kon kobiagan sinbá motoindudui kon i-Nia. Tua in inaidan-Nea pinongin onu inta kinotaauan naton soaḷ ki Yesus Kristus, inta ain nogoiní kon i naton sinbá mobiag moyotakin-Nea kon tampat-Nea inta mopia bo moonow.

YOHANES 1 2:25

Bo naa in pinodandi i Kristus tontaní kon i naton: kobiagan motompia bo mononoi.

YUDAS 1:24

Ki Allah, inta mokosanggup moḷukad sinbá moiko diá moḷabú, bo inta mokosanggup modia kon i monimu mayá in tampat pomomarentaannea inta momulia takin gina mosanang bo modarit.