PETRUS 1 4:2 - Alkitab Singog In Mongondow Masa In Tanaa

² Manangka intua, kobiagdon in moiko kon singgai moiduduimai podudui in onu inta kinoibog i Allah, bo deemanbí dumudui kon ibog in intau.

PETRUS 1 4:2 ပူးပေါင်းရင်းမြစ်များ

MAZMUR 143:10

Tundúdon in akuoi mogaid kon onu in kinoibog-Mu, sin Ikobí in ki Allahku. Iko in mopia in gina, bo modia kon inakó mayá mongindaḷan notondodai.

HOSEA 6:7

Táe naonda bo kon Adam, moiko in nonaḷámai kon dodandianmu takin-Ku.

MATIUS 12:50

Sin ki inekabí inta mogaid kon inta kinoibog i Amá-Ku kon soroga, yo sia tua in ki utat-Ku mita ḷoḷaki, bo ki utat-Ku bobay, bo sia in ki iná-Ku doman.”

MATIUS 20:4

Dá sia in noguman kon i monia, ‘Bayádon in moiko bo pogaid kon gobá in anggurku, bain uboḻianku in moiko, podudui onu in kon ibogku ogoi kon inimu.’ Bo mosia tua in minayá doman bo nogaid.

MATIUS 21:31

Yo ki ine in kon sigad nayadua tua in nogaid kon inta kinoibog i amánea?” Tubag monia, “Inta guya-guyang.” “Poguman-Ku kon i monimu: Intau inta mononagi kon pajak bo bobay mita inta sundaḷ in moiuna kon i monimu tumuot mobaḻí anggota in umat i Allah. “Inta induanea,” tubag in imang mita tongguḷunea bo itoi mita in Yahudi tatua.

MATIUS 7:21

“Diábí komintan intau inta mogoiní kon i-Nakó, ‘Tuhan, Tuhan,’ in mobaḻí umat-Ku, táe tongábí mosia inta dinumudui kon koibog i Amá-Ku inta kon soroga.

MARKUS 3:35

Intau inta dinumudui kon ibog i Allah, siabí tua in ki utat-Ku ḷoḷaki bo ki utat-Ku mita bobay bo ki iná-Ku.”

MARKUS 7:21

Sin inta nongkon bonubí in gina, inta nomuká nongkon raian mita inta moraat in mokopopisí kon intau mogaid kon inta mokooyá ná, monakow, moḻimod,

YOHANES 1:13

inta pinononggadí deeman nongkon intau, sin kobiagan mobagu tua in nongkon i Allahbí in pangkoinea.

YOHANES 7:17

Intau mita inta moibog dumudui kon i Allah, kotaauanneabí mongo nongkon i Allah in totundú-Ku naa andeka nongkon i-Nakó tontaní.

SURAT I PAULUS KON JAMAAT RUM 12:2

Donaai in moiko dumudui kon ibog in dunia naa. Pomayádon mako in ki Allah in monoimbagu kon i monimu, sinbá mobaḷui in moiko. Sahingga in kotaauandon monimu onu kinoibog i Allah, tuata inta mopia bo inta mokosanang kon gina-Nea bo inta mosompurna.

SURAT I PAULUS KON JAMAAT RUM 14:7

Kon sigad naton naa diábí in mobiag tongá kon kopontingannea tontaní; bo diábí doman in tobatúmai in matoi kon inia tontaní.

SURAT I PAULUS KON JAMAAT RUM 6:11

Natua doman in moiko, musti monganggap minatoidon kon bonu in dosa bo mobiagdon motompia takin i Allah inta pinongin i Kristus Yesus.

SURAT I PAULUS KON JAMAAT RUM 6:2

Tantú diábí natua! Dosa in diá bidon nongawasa kon i naton, manangka intua kita diá bidon in motaau aka dongka umuran mogaid kon dosa?

SURAT I PAULUS KON JAMAAT RUM 7:4

Natua domandon in moiko utatku mita. Kon hukum agama in Yahudi, moiko ain minatoi, sin moiko ain sinobatú takin awak i Kristus bo nobaḻídon kapunyaan-Nea inta ain biniag bui nongkon kinopatoian. Sia biniag nongkon popatoi sinbá kita in mobaragunadon kon i Allah kon dodai in mobiagpa.

KORINTUS 2 5:15

Bo ki Kristus in minatoi sin popisí in motobut kon taḷá in bayongan intau, sinbá intau mita inta nobiag diádon tongá asaḷ bo nobiag bo motayak kon kopontingannea tontaní, táe pounabí in kopontingan i Kristus inta ain minatoi bo biniagdon bui sin kopontingan monia.

EPESUS 2:3

Koḻipod, kita komintan in ná doman mosia tua; kita nobiag dinumudui doman kon tabiat in awak naton bo nogaid kon onu inta mokosanang kon awak bo raian naton. Wakutu intua kita naa in intaubí doman inta kinotugatan in torú i Allah, ná doman mosia tua.

EPESUS 4:17

Tuamai in podoyon kon tangoi i Tuhan, naa in singogku bo ponoropku: donaai in mobiag naonda bo intau inta diá nonotaau kon i Allah bo tongá morai kon inta diá in mangaḻenea.

EPESUS 5:17

Dika mokopobodok, táe tayakdon kopira mongo onu in kinoibog i Tuhan.

EPESUS 6:6

Tua inaidan monimu, deemanbí tongá kon wakutu in koonto-ontongnea mako, sinbá dayowonnea in moiko. Táe aidaibí monimu intua saḷaku mogogundoi i Kristus inta dinumudui kon koibog i Allah takin gina motuḻid.

KOLOSE 1:9

Manangka intua umurandon sambayangan nami in moiko naonda in kinodongogandon nami in habar soaḷ moiko. Kami in mopoigum kon i Allah sinbá moiko in mobijaksana bo mopandoi popisí in kawasa in Roho i Tuhan, sahingga in kotaauandon totok monimu onu in kinoibog i Allah.

KOLOSE 3:3

Sin moiko ain minatoi bo kobiaganmu noibuni noyotakin i Kristus inta notobatú i Allah.

KOLOSE 4:12

Salam doman nongkon i Epapras. Sia naa intau doman nongkon sigad monimu. Mosia naa in mogogaid doman kon oaidan i Kristus inta umuran mosatia in mosambayang sin kopontingan monimu. Sia totok in mopoigum kon i Allah sinbá mobaḻídon moropot in koyakinan monimu, bo totu-totuudon moguyang in moiko sinbá totu-totuu domandon dumudui kon ibog i Allah.

TESALONIKA 1 5:18

Naondakabí in kaadaan monimu, yo tantúbí posukur, sin tuata in kinoibog i Allah aidan monimu saḷaku intau mita inta ain nobiag notobatú i Yesus Kristus.

IBRANI 13:21

Poigum mako, ki Allah inta nobaḻí pangkoi in kobiagan motompia, umuran mobogoi in bayongan inta mopia inta paraḷu pakéon monimu mogaid kon onu inta koibog i Allah. Bo poigumon doman mako takin totuḷung i Yesus Kristus, popoaidon i Allah kon i naton in onu inta kinoibog-Nea. Tantúbí dayow in ki Kristus dapot in kopaḷutannea! Amin.

YAKOBUS 1:18

Ibog-Neabí tontaní in nopobaḻí kon i naton ki adí-Nea mita pinongin Pirman-Nea inta nobanar. Tua komintan in pinomia-Nea sinbá kita in mokouḻí kon tampat inta moponting kon sigad in bayongan mahaḷuk inta pinomia-Nea.

PETRUS 1 1:14

Kotoinduduidon kon i Allah, bo donaaidon mobiag podudui in ibogmu koḻipod, wakutu i moiko diápa nonotaau kon i Allah.

PETRUS 1 2:1

Manangka intua, ḷumbúdon in bayongan inta moraat; kon i monimu, bo donaaidon umuran monguboḷ, momunapik. Dikadon mointoi, bo dikadon mohojat kon intau ibanea.

YOHANES 1 2:17

Dunia naa bo bayongan tombonunea inta kinoibog in intau koyogotdon in moyoyang. Táe intau inta dinumudui kon ibog i Allah, i mobiagbí mononoi.