PETRUS 1 4:16 - Alkitab Singog In Mongondow Masa In Tanaa

¹⁶ Táe aka moiko bo rorigaan popisí in mopirisaya kon i Kristus, dá dikabí in moiko mooyá. Posukurdon kon i Allah, sin moiko in nodia kon tangoi i Kristus.

PETRUS 1 4:16 ပူးပေါင်းရင်းမြစ်များ

YESAYA 24:15

bo intau mita kon dotá in toyopan in modayowbí kon i-Nia. Intau mita inta kon bingkí in dagat in mopoḷantudbí kon i Tuhan Allah in Israel.

YESAYA 50:7

Sin ki Tuhan Allah in notuḷung kon inakó, dá akuoi in diá pinokopo oyámai. Akuoi in noginrigon kon ginaku sinbá mokoigon; kinotaauanku kon akuoi in diábí pokopooyáanmai.

YESAYA 54:4

Dika moondok, iko in diábí pokopooyáanmai: diábí singkuḻeon bo oyáon. Iko in mokoḻiong bidon kon aidmu inta diá motoindudui kon tungkuḷ noguodpa; diá bidon mokotorop bui kon kaadaanmu saḷaku boba-bobay.

OUMAN IN RASUL MITA 11:26

Naonda in noyodungkuḷnea in ki Saulus, dinianea minayá in Antiokhia nogutun totaong kon tua bo noyobiag takin jamaat kon tua poḷat doman notundú kon mobarong in intau. Kon Antiokhia tuata in intau mita inta mopirisaya kon i Yesus muna-munamai sinangoian Keresten.

OUMAN IN RASUL MITA 26:28

Dá ki Agripa in noguman kon i Paulus, “Kainimu kamai dá mogampangbí in akuoi mobaḻí intau Keresten?”

OUMAN IN RASUL MITA 28:22

Táe kami in moibogbí doman mokidongog nongkon inimu tontaní kon onu inta pinirisaya bo sinundúmu tua sin ain dinongog nami komintan, kon bayongan inta sinundúmu bo inta pinirisayamu nion tatapbí bayowan monia kon ondakabí in bayáanmu.”

OUMAN IN RASUL MITA 5:41

Rasul mita tatua in nobuidon nongkon sidang agama tatua takin pia in gina, sin kinotaauan bidon monia kon natuabí in mobaḻí dumodudui i Yesus. Patusbí in mosia motarima kon singkuḻe lantaran ki Yesus.

PILIPI 1:20

Inta totok in kinoibogku bo iharapku mako in bá diá mokoimontanmai in akuoi in diá mokopogaid kon oaidanku. Táe haraponku bá pomuḷoi mako, torutama totok in tanaa mako mobaranidon totok in akuoi sahingga in bayongan onu inta kon inakó – mobiag andeka matoi – ki Kristus in pomuliaan.

PILIPI 1:29

Sin moiko inogoian bidon i Allah in totabi inta deemanbí tongá mopirisaya kon i Kristus, táe poḷatbí doman motanggung kon roriga-Nea.

TIMOTIUS 2 1:12

Tuamai akuoi in nokorasa kon bayongan roriga tatua, táe akuoi in umuranbí moyakin sin kinotaauankubí totok ki ine in pinirisayaku tua. Moyakinbí in akuoi kon onu inta ain inogoi-Nea pinoki aid kon inakó tantúbí koḷukadan-Nea modapot in Singgai Pangabisan.

YAKOBUS 2:7

Mosiabí tuata inta nohina kon tangoi mopia inta sinarima monimu nongkon i Allah!

PETRUS 1 2:12

Kopiaan in oaidmu kon sigad in intau mita inta diápa nonotaau kon i Tuhan, sahingga in aka singogon monia kon iko in intau moraat, yo koontongandon monia in oaidmu inta mopia, dá modayowdon in mosia kon i Allah kon singgai koangoian-Nea.

PETRUS 1 4:11

Intau inta mopoyaput in habar, sia mustibí mopoyaput in habar nongkon i Allah, intau inta mobantung kon intau ibanea, mustibí pakéonnea in ropot inta nongkon i Allah, sinbá kon bayongan in yagi-yagi ki Allah in dayowon pongin i Yesus Kristus. Sia tua in kitogi kamuliaan bo kawasa inta mononoi. Amin.

PETRUS 1 4:14

Kopiabí in gina monimu aka singkuḻeon sin popisí in mopirisaya kon i Kristus, tua in mangaḻenea Roho momulia inta Roho i Allah in umuranbí kotaki-takin monimu.

PETRUS 1 4:19

Manangka intua intau inta iroriga podudui in ibog i Allah, kobiagbí mokopotoḷutui in sia, bo posarakaidon in kobiagannea kon i-Nia inta nomia kon i monia, sin Sia in umuranbí mogaid kon onu inta ain pinodandi-Nea.