PETRUS 1 3:3 - Alkitab Singog In Mongondow Masa In Tanaa

³ Dikabí tongá koontongan kon ḷuai i moḷunat, ná umpama moḷambá kon buok andeka momaké in ḷambá ibanea mako, andeka mogiḷambung doman inta mongomahaḷ.

PETRUS 1 3:3 ပူးပေါင်းရင်းမြစ်များ

KINOBAḺIAN 24:22

Naonda in unta nonginumdon dapot in nooropdon totok, bobantung i Abraham in nogamádon kon ḷambá mita buḷawan inta nongo mahaḷ, bodongka pinopopakénea kon ngiung in mongodeaga tatua. Bo kon poguḻingkitannea pinopoḷutudannea doman ḻingkit in buḷawan togapang.

KINOBAḺIAN 24:47

Onda intua akuoi in noḻibó, ‘Ki ine in ki amámu?’ Bo sia in notubag, ‘Ki amáku ki Betuel, ki adí i Nahor bo i Milka.’ Bo pinopopakéankudon in ḷambá buḷawan kon ngiungnea bo iḷutudanku domandon in ḻingkit kon ḻimanea.

KINOBAḺIAN 24:53

Bo sia nopoḷuai in pakeang, ḷambá saḷaka bo buḷawan, bo inogoi in tua komintan kon i Ribka. Ki guya-guyangnea bo ki inánea inogoiannea doman in tombuinag inta mongomahaḷ.

DATU MITA 2 9:30

Noiyaputdon in ki Yehu kon Yizreel. Naonda in kinodongogan i Izebel onu inta ain nobaḻí, nonoguḷanoi in sia kon buoknea bo nomaké in cilá, bo iḷumongow monag nongkon jandela in komaḻig.

ESTER 5:1

Kon singgai intoḷunea kon pinopuasaannea, ki Ester in nogiḷambung in ḷambung bokí, bo minayá in palas kon bonu in komaḻig bo sinimindog kon tayowon in ngara in bobakidan. Ki Datu in ḻimitú mako kon ḷoḻitúannea sinumayow in ngara tatua.

MAZMUR 45:9

Ḷambungmu nobó in taḷong mobondu, gaharu, bo sondana; mopogogitog in musik kon komaḻig nokopia kon ginamu.

IḶUAIAN 3:22

Bayongan bobay Israel in moigumbí kon topodiugneamai inta intau in Mesir bo nongkon bobay in Mesir inta nogutun tobaḷoian, pakeang takin ḷambá saḷaka bo buḷawan. Moiko in mopopaké intua kon i adímu mita. Natuata in pogogagow monimu kon intau Mesir.”

IḶUAIAN 32:2

Bo ki Harun in noguman kon i monia, “Gamádon in nganti-nganting buḷawan inta pinaké i buḷoi bo i adí mita monimu, bo diádon mangoi kon inakó.”

IḶUAIAN 33:4

Onda intua ki Tuhan nopotabá kon i Musa nopotaau in tosingogon tanaa kon bangusa Israel, “Moiko in bangusa inta motogat in gina. Aka Akuoi moyotakin monimu umpaka tongá motoyong, yo notantú bidon kon yopúon-Kudon komintan in moiko. Ḷongkutdon in bayongan ḷambámu, dá tantúon-Kudon onu in pomiaan-Ku kon i monimu.” Naonda in mosia nokodongog kon toboḷow i Tuhan tatua, norukorom totok in gina monia nádon intau inta bagu kinopatoian. Bo mosia in noḷongkutdon kon ḷambá monia. Dá naonda in nonaḷámaidon kon Buḷud in Sinai, bangusa in Israel diádon nomaké in ḷambá.

IḶUAIAN 35:22

Ki inekabí in moibog, pinomayá ḷoḷaki ande bobay, mamangoi modia kon tomot ḷambá, nganti-nganting, sising, boboḷ bo bayongan yagi-yagi ḷambá buḷawan sin makusud poposumba kon i Tuhan.

IḶUAIAN 38:8

Ki Bezaleel nomia kon tampat in tubig nongkon porunggu inaipan in porunggu doman. Porunggu tatua nongkon posilag mita kapunyaan in bobay mita inta mogogundoi kon tayowon ḷoḻingkop in Ḷoḷaigan i Tuhan.

YESAYA 52:1

Pobangondon, ei Yerusalem, pobangondon! Korigon in ginamu! Paké in ḷambung kahoromatanmu! Ei Yerusalem, kotá inta motusi, intau nonajis in diá bidon tumuot mongin bonawangmu.

YESAYA 61:10

Yerusalem in noguman, “Moḷunganga in ginaku popisí in ki Tuhan, ginaku in mosanang sin ki Allah. Naonda bo nonikaan ḷoḷaki bo bobay nopogiḷambá in inta mongogaga, natuata in pinopopaké i Tuhan kon inakó ḷambung kasaḷamatan bo kountungan.

YEREMIA 2:32

Oyúon degá in mongodeaga inta mokoḻiong kon ḷambánea, andeka nonikaan bobay inta mokoḻiong kon ḷambung nonikaannea? Táe moiko in noonggotdon totok in nokoḻiong kon i-Nakó – nongkon tungkuḷpabí inta diádon koiapan in koonggotnea.

YEREMIA 4:30

Ei Yerusalem, iko in sinaḷáandon bo diádon mokopongonu! Onubí in mangaḻenea in mogiḷambung in ḷambung nopura bo moḷambá kon awak mopomaké in buḷawan bo saḷaka, poḷat moponggares in cilá kon mata? Diábí in mangaḻenea in iko in mopogaga in pogotmu, sin intau mita inta kinotabimu in doí bidon kon inimu, nodapotbí in mosia in moibogbí morabut kon nyawamu.

YEHEZKIEL 23:40

Nodapotbí in mosia nokidia in sonsoma kon ḷoḷaki mita kon ḻipú mita inta nongoyayú, bo namangoi doman in mosia. Popisí in motomu kon intau mita tatua, dá taya dua mogutat tua in noinggú, nogicilá bo nopomaké in noyagi-yagimai in ḷambá.

SURAT I PAULUS KON JAMAAT RUM 12:2

Donaai in moiko dumudui kon ibog in dunia naa. Pomayádon mako in ki Allah in monoimbagu kon i monimu, sinbá mobaḷui in moiko. Sahingga in kotaauandon monimu onu kinoibog i Allah, tuata inta mopia bo inta mokosanang kon gina-Nea bo inta mosompurna.

PETRUS 1 3:2

sin koontongan bidon monia kon oaidmu inta motuḻid bo motoindudui.