PETRUS 1 1:12 - Alkitab Singog In Mongondow Masa In Tanaa

¹² Ki Allah ain noguman kon nabi mita tatua, kon onu in pinomia monia tatua, deemanbí inaidan monia sin kopontingan monia tontaní, táe kopontinganbí monimu, tua in soaḷ mita inta tanaa mako ain dinongog monimu notarang nongkon intau mita inta nopoyaput in Habar Mopia soaḷ ki Yesus Kristus. Mosia in nopoyaput intua komintan kon i monimu takin kawasa in Roho i Allah inta pinotabá-Nea mangoi nongkon soroga. Bo umpakabí malaekat mita yo moibogbí doman totok monotaau kon habar inta pinoyaput monia tua.

PETRUS 1 1:12 ပူးပေါင်းရင်းမြစ်များ

IḶUAIAN 25:20

bo poyogintayowon takin koḻikip inta mosongká kon ḻimonik in poti tatua.

AMSAL 1:23

Indongogai in akuoi aka monoboḷow kon inimu, sinbá poniataku kon inimu onu inta kon bonu in ginaku bo tundúonku onu inta sinotaauku.

YESAYA 32:15

Táe komintanpa doman ki Allah in mamangoibí takin kawasa-Nea. Dá padang gurun in mobaḻídon gobá mita inta moḷumbá, bo gobá mita in mobaḻídon naonda bo kayuon.

YESAYA 53:1

Bangusa tatua in notubag, “Ki ine in mopirisaya kon onu inta ain dinongog nami? Kon i ine in pinoponiataan in kawasa i Tuhan?

DANIEL 10:1

Kon taong intoḷunea kon pinomarentaan i Datu Koresh kon Persia, koyow tobatú pinoniata kon i Daniel inta dinonoi doman ki Beltsazar. Koyow tatua in totuubí, táe mororiga totok komangaḻean. Kon dodai in moḷongasi momangaḻe kon tua ki Daniel in notarima kon insilang soaḷ mangaḻe in koyow tatua kon bonu in tobatú oontongon.

DANIEL 12:13

Iko Daniel, kotoinduduidon modapot in kopaḷutannea. Iko in matoibí, táe mobiagbí bui sin motarima kon tondan in pinogaidanmu kon singgai tumi.”

DANIEL 12:9

Sia in notubag, “Bayádon in tanaa mako, Daniel, sin tosingogon mita tanaa in mustibí bunion bo diá motaau poguman modapot kon singgai tumi.

DANIEL 2:19

Kon doḷom doman tatua ki Allah in nopotaau kon onu in togoindop i datu tatua kon i Daniel kon bonu in oontongon tobatú. Dá ki Daniel nodayow kon i Allah kon soroga,

DANIEL 2:22

Siabí doman inta nobuká kon onu inta noibuni totok. Kinotaauan-Nea in bayongan inta nobaḻí kon bonu in sindip. Sia in binakut in sindar inta mobayag.

DANIEL 2:47

Ki Datu in noguman, “Totuu, Daniel, ki Allahmu tua in moḷobe-ḷobenbí kon bayongan in allah. Sia in nongawasa kon bayongan in datu, bo nopotaau in bayongan inta noibuni. Kinotaauanku intua sin iko in nokomampudon noginsilang kon mangaḻe in inta noibuni tanaa.”

DANIEL 8:13

Onda intua dinongogku in malaekat tobatú in noguman kon malaekat ibanea mako, “Modapot degá in toonu in bayongan inta inontong kon oontongon tatua mobaḻí? Modapot in toonu in dosa moḷoben tatua monoḻiu kon sosumba muḷoi in singgai? Modapot in toonu in tontara in soroga bo baḷoi pooibadaan tatua runtaion?”

DANIEL 9:24

Pitu pokali kon pitu nopuḷú notaong in sempo inta ain sinantú i Allah sin mopoḷuat kon bangusamu bo kotámu inta motusi tatua nongkon dosa bo aid moraat. Bayongan in dosa in ampunganbí bo kooadil inta mononoi in posindogonbí, dá oontongon bo toḻindap tatua in moniatadon, bo Baḷoi Tuhan inta motusi tatua in posumba bui kon i Tuhan.

YOËL 2:28

“Kon singgai moiduduimai bayongan in intau in ogoian-Kudon in roho-Ku. Dá ki adímu ḷoḷaki bo bobay in mopotaaudon in koyow-Ku mita; intau mita inta noguyangdon mita kon yuakmu in tumogoindopdon oontongon in ogoidon kon tayowmobiag bo mongodeaga.

AMOS 3:7

Ki Tuhan Inta Totok in moḷantud in diábí kon dodai in onda in mogaid kon oaidan-Nea aka diápa muna moponiata in tomayá-Nea kon nabi mita, mogogundoi-Nea.

ZAKHARIA 12:10

Onda intua buí i Daud takin intau mita inta nogutun kon Yerusalem ogoian-Kudon in gina inta kototabi bo moibog mosambayang. Mosia in imindoibí kon inia inta ain sinumbuk monia bo ombaḷan monia naonda bo intau mongombaḷ kon kinopatoian i adínea tuḷong. Mosia in mongombaḷbí imibo-ibog, naonda bo intau inta ain kinobuḻian i adínea guya-guyang.

MATIUS 11:25

Kon wakutu intua nosambayang in ki Yesus kai-Nia: “Akuoi in mopoyaput in sukur kon ini-Mu, Amá, Tuhan in ḷangit bo butá, sin bayongan intua binuni-Mu kon intau mita inta mobijaksana bo kon intau mopandoi, táe pinoponiata-Mu kon intau inta moyangkó.

MATIUS 11:27

Bo ki Yesus in noguman, “Bayongan yagi-yagi inogoi i Amá kon i-Nakó, bo diá doman tobatúmai in nonotaau kon Adí koḻikudbí in ki Amá, bo diá doman tobatúmai intau in nonotaau kon i Amá kuḻikudbí in Adí bo intau inta kinoibog in Adí popoontongan.

MATIUS 16:17

Dá ki Yesus in noguman kon inia, “Pia in kamang iko Simon inta buí i Yunus, sin deemanbí intau in noguman kon singog tatua kon inimu, táe ki Amámubí inta kon soroga.

MARKUS 16:15

Guman i Yesus kon i monia, “Bayádon in bayongan dunia naa bo potaaudon in Habar Mopia nongkon i Allah kon bayongan intau.

LUKAS 15:10

Natua doman in malaekat mita i Allah, mopia in gina monia aka oyúon tobatú intau inta moraat in mogogaidon in mogaid kon dosa. Tuamai, popirisayabí!”

LUKAS 2:26

Roho i Allah ain noguman muna kon inia kon sia in diápabí matoi aka diápa mokoontong kon Datu Mopoposaḷamat inta pinodandi i Tuhan.

LUKAS 9:6

Dá minayádon in murí i Yesus mopuḷú bodoyowá tatua bo sindaḷan nopoyaput in Habar Mopia poḷat doman mongundam kon intau mita inta nongotakit kon ḻipu mita inta kinobayáan monia.

YOHANES 15:26

Potabá-Kubí mangoi kon i monimu in Mototuḷung tobatú inta nongkon i Amá. Tuata in Roho inta moponiata kon kobobanar soaḷ ki Allah. Aka Sia in mamangoidon, yo Sia in mobogoibí in kosakusian soaḷ Akuoi.

OUMAN IN RASUL MITA 10:44

Koyogotpa in nongonguman in ki Petrus, indoianmai noponagdon in Roho i Allah kon bayongan intau kon tua inta mongindongogmai kon onu in pinoyaputnea tatua.

OUMAN IN RASUL MITA 16:10

Naonda in nokouḻí kon oontongon tatua, baya-bayá nobasadia in kami sin mayá in Makedonia. Sin nopirisayabí totok in kami kon ki Allahbí in nopotabá kon inami mayá intua mopoyaput in Habar Mopia kon bayongan in intau kon tua.

OUMAN IN RASUL MITA 2:33

Sia biningkat bo inogoian in tampat pomomarentaan inta moḷantud, bo inogoian i Allah in kawasa, bo notarima kon Roho i Allah inta ain pinodandi tua, bo Roho doman tatua in inogoi-Nea kon inami naa, tuata inta inontong bo dinongog monimu kon naa,

OUMAN IN RASUL MITA 4:31

Bo naonda in mosia nosambayang, tampat pinoyosipunan monia tatua in nodandú bo mosia komintan in kinawasa in Roho i Allah, dá mosia in diádon inangoian ondok in nopotaau in Pirman i Allah.

OUMAN IN RASUL MITA 4:8

Bo takin kawasa in Roho i Allah, ki Petrus in notubag, “Tuang mita inta nobaḻí itoi mita in bangusa bo tuang mita inta anggota mita in sidang!

OUMAN IN RASUL MITA 8:25

Naonda in nopaḷutdon nobogoi in kosakusian bo nopotaau in pirman i Tuhan, ki Petrus bo ki Yohanes in nobuidon kon Yerusalem. Kon bonu in binayáan monia tatua, mosia in sindaḷan mopotaau in Habar Mopia kon bayongan ḻipú kon Samaria tua.

SURAT I PAULUS KON JAMAAT RUM 1:15

Tuabí manangka i moibogdon totok in akuoi mopoyaput in Habar Mopia tatua kon i monimu inta nogutun kon Rum.

SURAT I PAULUS KON JAMAAT RUM 1:17

Sin pinongin Habar Mopia tatua ki Allah in nopoontongdon kon naonda in pogogaid sinbá hubungan in intau bo i Allah in moyoguḻitdon bui: aidnea kon tua in tongábí mopirisaya kon i Allah nongkon pinomangkoianpamai modapot in pangabisan. Tua in ná inta ain pinais kon bonu in Buk Motusi, nanaa, “Intau in nopirisayadon kon i Allah, sahingga in hubungannea takin i Allah notompiadon bui, bo intau tatua in mobiagbí!”

SURAT I PAULUS KON JAMAAT RUM 10:15

Bo naondabí intau mayá mopotaau in habar tatua, aka mosia in diá potabá? Ain doman pinais kon Buk Motusi nanaa, “Mopiadon totok in koangoian in intau mita inta nodia kon Habar Mopia nongkon i Allah!”

SURAT I PAULUS KON JAMAAT RUM 15:19

inta mokoherang totok kon intau bo diá in poporupaan. Tua mita in nobaḻí sin kawasa in Roho i Allah. Habar Mopia soaḷ ki Kristus aindon pinohabarku komintan kon intau mita, pinangkoipamai kon Yerusalem nodapot in Ilirikum.

KORINTUS 1 2:10

Táe komintan bidon pinotaau i Allah kon i naton pinotonsigad kon Roho-Nea. Bo Roho tatua doman in moindoi kon bayongan in yagi-yagi nodapot in tomayá mita i Allah inta nongoibuni.

KORINTUS 2 1:22

Tuamai totu-totuu bidon binaḻí-Nea umat-Nea in kita poḷat inogoian-Nea in Roho, pinogonú kon gina naton saḷaku jaminan kon totu-totuubí ogoi-Nea onu inta ain pinodandi-Nea.

KORINTUS 2 6:6

Takin gina motuḻid, mobijaksana, mosabar bo mopia in gina, pinoniatadon nami kon kami in mogogundoibí i Allah. Bo takin kinumadai kon totuḷung in Roho i Allah, bo takin tabi inta noiḷuai nongkon gina inta motuḻid,

GALATIA 1:12

Sin tua in deemanbí inogoi in intau kon inakó, bo deemanbí doman intau in notundú kon inakó, táe tua in nouḻíku sin ki Yesusbí tontaní in nobogoi kon inakó.

GALATIA 1:16

Pinoontong-Nea kon i nakó in ki Adí-Nea sinbá Habar Mopia soaḷ ki Adí-Nea bayáanku poyaputon kon intau mita inta deeman Yahudi. Bo wakutu intua akuoi in diábí minayá kon i ineka sin noigum kon tonggina.

EPESUS 3:10

Makusud i Allah tua in bá tanaa mako jamaat-Nea, mopotaau in bayongan yagi-yagi soaḷ kabijaksanaan i Allah kon pomarenta mita bo kon bayongan inta nongawasa kon soroga.

TESALONIKA 1 2:9

Tantú kinotoropanpabí monimu uḻe utat mita naonda in pinogogaid bo pinororamuji nami. Doḷom bo singgai kami in mogaid sinbá diá tobatúmai in kon sigad monimu in mororiga wakutu in kami nopoyaput in Habar Mopia inta nongkon i Allah kon i monimu.

TIMOTIUS 1 3:16

Diábí tobatúmai in motaau momayow, kon moḷobenbí totok in onu inta noibunipa kon agama naton naa: Sia namangoi in dunia naa sinumon rupa intau, bo inakubí in Roho i Allah, bo inontong in malaekat mita. Habarnea pinowayadon kon sigad in bayongan bangusa, bo Sia in pinirisaya in bayongan intau kon dunia naa poḷat sinintak namonik in soroga.

IBRANI 11:13

Bayongan in intau tatua in umuran nopirisaya umaai in minatoi. Mosia in diábí notarima kon onu inta pinodandi i Allah, táe tongá nokoontong bo notamad nongkon noyayú. Aid monia tua in noponiata kon mosia tua in tongábí intau mokokiangoi inta tongá doman noiandupmai kon dunia naa.

IBRANI 2:4

Koḻikud intua, iniropotan doman i Allah in bayongan inta ain inouman in intau mita tatua takin nopoontong in noyagi-yagimai aid inta mokoherang totok kon intau bo soaḷ mita inta diá in poḻiuan bo poḷat nosila-silai mako kon onu inta pinonotabi in Roho i Allah podudui in ibog-Nea tontaní.

IBRANI 4:2

Sin habar tatua in pinotaaudon doman kon i naton notongkai ná kon i monia. Táe habar tatua diá in baragunanea kon i monia, sin wakutu in dinongog monia diá pinirisaya monia intua.

PETRUS 1 1:25

táe pirman i Tuhan in mononoibí.” Pirman tatua in Habar Mopia inta ain pinotaau kon inimu.

PETRUS 1 4:6

Manangka intua Habar Mopia pinotaau domandon kon intau mita inta ain minatoi. Makusudnea bá mosia in adilon doman ná intau mita inta koawakpa, bo roho monia in mobiagdon podudui kon ibog i Allah.

WAHYU 5:11

Noiduduimai oyúon in inontongku bui. Akuoi in nokodongog kon singog in malaekat inta ribuan sedang bo jutaanbí in kobayongnea. Mosia in sinimindog iḻimibu kon tampat pomomarentaan bo kon mahaḷuk opat tatua takin itoi mita tatua.