MAZMUR 94:23 - Alkitab Singog In Mongondow Masa In Tanaa

²³ Sia in mohukum kon intau moraat podudui in aidnea inta moraat, bo nomompon kon bibig monia popisí in dosanea. Ki Tuhan Allah naton in momomponbí kon i monia.

MAZMUR 94:23 ပူးပေါင်းရင်းမြစ်များ

DATU MITA 2 19:7

Baḻíonbí i Tuhan in ki datu Asyur tua mokidongog kon habar in tompot dá mobuidon in sia kon butánea tontaní, bo ḻimodon in sia kon tua.”

ESTER 7:10

Natuata in nobaḻí ki Haman pinobambé kon oigi inta ain pinosindognea kon i Mordekhai. Nopaḷut mako kon tua noinggamádon in torú i datu.

ESTER 9:25

Táe ki Ester in minayá kon tayowon i datu, bo ki datu in nobogoi in parenta pinais inta nokopopisí kon tomayá moraat inta inaidan i Haman in bui noiuma kon inia tontaní, dá sia bo ki adínea mita in pinopobambé kon oigi pobobambéan.

MAZMUR 109:20

Tuhan, popoḷabúdon in hukuman kon i inta mopoponapud kon inakó, kon intau inta moguman kon uboḷ soaḷ akuoi.

MAZMUR 12:3

Mosia komintan mosiuboḷandon, mosiakaḷan pongin tosingogon inta mopia in kodongogan.

MAZMUR 55:23

Posarakaidon in inta mokoḻia-ḻiaw kon ginamu kon i Tuhan, dá Sia in moduḷu kon inimu; sin intau mojujur in diábí pomayá-Nea mako in taḷowon.

MAZMUR 64:8

Táe ki Allah in nopopiotbí in piot-Nea kon i monia, bo indoianmai notompaḻí in mosia.

MAZMUR 7:16

Sia in mongaḻi kon bubú koḷabúan in intau ibanea, táe siabí tontaní in moibonu kon tua.

AMSAL 1:31

Tuamai, korasaanbí monimu in bungai in aidmu mita bo tomayámu mita inta moraat.

AMSAL 14:32

Intau moraat moyopú popisí in aidnea moraat, intau mopia ḷukadan in aidnea inta motuḻid.

AMSAL 2:22

Táe intau moraat bo binaradosa in pogambat kon ḷuai i Allah nongkon butá tatua, naonda bo bonok irabut nongkon butá.

AMSAL 5:22

Dosa in intau moraat in naonda bo poyogaḷap inta modomok kon intau tatua.

AMSAL 5:23

Sia in matoi popisí in doí tongginaan. Dondunguḷnea nodia kon inia kon kogoguyaatan.

YEREMIA 36:31

Iko, buímu bo pojabatmu mita in hukumon-Ku popisí in dosa mita inta inaidan monimu. Akuoi in mopoangoibí kon i monimu in bayongan bodito inta ain pinonindoyó-Ku kon inimu, sin pinomayá iko andeka intau inta nogutun kon Yerusalem bo kon Yohuda diábí nopandungmai kon sindoyó-Ku mita.”

YEHEZKIEL 18:24

Táe aka intau mopia bo diádon mogaid kon inta mopia, modapotbí in momangkoidon momia kon inta moraat bo bayongan in aid inta mokorongó inta biasamai aidan in intau moraat, yo degá umuran in sia mobiag? Diá! Nongkon bayongan in aidnea inta mopia yo diá bidon tobatúmai in toropon bui. Sia in matoibí popisí in nogaidon kon dosa bo diá motoindudui kon i-Nakó.

DANIEL 7:24

Tungoi mopuḷú tatua in datu mopuḷú inta nomarenta kon dodatuan tatua. Onda intua datu tobatú ibanea in moiangoi; sia in moyoposibí totok in datu mita inta muna, bo sia in monaḷowbí kon datu taya toḷu.

DANIEL 9:26

Kon imbuit in sempo tatua itoi inta piniḻí i Allah tatua in hukumonbí, bokaka diábí in sia kotaḷá. Dá namangoidon in tobatú tontara i datu inta moropot, bo nonurub kon Yerusalem takin Baḷoi i Tuhan. Singgai tumi tua in mamangoibí naonda bo ḷunud inta nodia kon parang bo korimumudan, ná inta ain sinantú i Allah.

HAKIM MITA 9:57

Bo ki Tuhan nohukum doman kon intau mita in Sikhem popisí in aid monia inta moraat. Tua mita in noitombutung kon ná onu inta ain siningog i Yotam ki adí i Gideon soaḷ mosia tua kon wakutu in nogodi-godimai kon i monia.