MAZMUR 89:41 - Alkitab Singog In Mongondow Masa In Tanaa

⁴¹ Inumpag-Mu in dinding mita in kotánea, benteng mita in binaḻí-Mudon apug.

MAZMUR 89:41 ပူးပေါင်းရင်းမြစ်များ

NEHEMIA 5:9

Bo Gumanku bui, “Aidmu tua in diábí mopia! Mustibí in moiko mobiag takin motoguondok kon i Allah. Dá musung naton inta diá ko Tuhan tua in diá ogoian monimu in kasampatan moningkuḻe kon inaton.

MAZMUR 74:10

Modapot in toonu, o Allah, musung in morebeg kon ini-Mu? Modapot degá in mononoi mosia in moningkuḻe kon tangoi-Mu?

MAZMUR 79:4

Kami in tororebeg mako in bangusa mita topodiugmai, kinosingan monia bo siningkuḻe monia in kami.

MAZMUR 80:13

O Allah, nongonu sin inumpag-Mubí in tondoknea, dá pomuḷoi in intau inta moitaḻib motaaudon mosipú kon bungainea?

YESAYA 10:6

Akuoi in nopotabá mangoi kon Asyur sin monubu kon bangusa-Ku inta nonaḷámai kon i-Nakó bo nopomuká kon torú-Ku. Akuoi in nopotabá in Asyur sin mogagow bo monakow bo moritak kon bangusa-Ku naonda bo ḷobud kon daḷan.”

YESAYA 5:5

Nanaa in aidan-Ku kon gobá in anggur-Ku tatua: Tondok inta pinoḻibu in rabuton-Ku, dinding inta pinogoḻingoi kon inia in umpagon-Ku, bo pinomayá-Ku mako in mahaḷuk moraat momoguyaat bo moritak-ritak mako kon inia.

YEREMIA 24:9

Akuoi in mopoboditobí kon i monia námai tua modapot in bayongan in bangusa kon sinangkub in dunia mobaḻídon moondok. Kon ondakabí in pobogoian-Ku kon i monia, mosia in singkuḻeonbí, binaḻí kokosingan bo rebegonmai. Tangoi monia in pakéon mobaḻí kutukan.

YEREMIA 29:18

Mosia in aḷo-aḷowan-Kubí mako in parang, gogoy, bo yampoi in takit modapot in bayongan in bangusa kon sinangkub in dunia in mokoningkimbí in mokoontong kon kaadaan monia. Kon ondakabí in poporaritan-Ku kon i monia, intau in mokoningkimbí bo moondok in mokoontong kon onu inta nobaḻí kon i monia. Mosia in singkuḻeonbí, bo tangoi monia in pakéon mobaḻí kutukan.

YEREMIA 42:18

Ná doman in Akuoi, ki Tuhan Allah in Israel nopobutak in torú bo rogi-Ku kon intau inta nogutun kon Yerusalem, yo natua doman in Akuoi mopobutak in rogi-Ku kon i monimu inta mayá in Mesir. Intau in mokoningkimbí in mokoontong kon i monimu; singkuḻeonbí in moiko, bo tangoimu in pakéonbí saḷaku kutukan. Moiko in diá bidon mokoontong bui kon butámu tontaní.”

YEREMIA 44:12

Bo aka intau in Yohuda inta ki agatnea oyúon in tantú moibog mayá in Mesir sin mogutun kon tua, yo moyopúbí komintan in mosia. Mosia komintan, moḷoben mointok, in matoibí kon Mesir kon bonu in parang andeka popisí in gogoy. Intau in mokoningkimbí in mokoontong kon i monia bo moningkuḻe kon i monia. Tangoi monia in pakéonbí saḷaku kutukan.

YEREMIA 44:8

Nongonu sin moiko in nogaidbí kon inta mokopomuká kon torú-Ku? Moiko in namangoi bo nogutun kon Mesir, butá inta deeman moiko in kitogi, bo moiko in mosumba kon berhala bo moposumba in kuruban kon dewa mita in butá tatua! Degá moibog in moiko morimumud kon awakmu tontaní sinbá singkuḻeon in moiko in bayongan in bangusa kon dunia bo tangoimu in pakéondon mobaḻí kutukan?

YEREMIA 50:17

Ki Tuhan in noguman, “Intau in Israel in naonda bo paanan in domba inta inaḷowan bo pinorarit in singa. Dungkuḷ totok mosia in sinubu i datu in Asyur, bodongka ki Nebukadnezar datu in Babel nonotop kon tuḷan mita monia.

OMBAḶ 2:5

Ki Tuhan nobaḻí naonda bo musung; binoutnea in Israel nodapot in norumbun. Irimumud-Nea in dinding mita takin komaḻig, bo nodugang kon ajar in gina kon intau in Yohuda.

OMBAḶ 5:1

Toropdon, kaasí Tuhan, onu inta nobaḻí kon inami. Bobuidon in kami, bo indoiaika in kohohina nami.

DANIEL 9:16

Iko in noduḷudon kon inami in dungkuḷmai, tuamai in dikadon bui tumorú kon Yerusalem, kotá-Mu tontaní, tombuḷud-Mu inta motusi. Popisí in dosa nami bo aid moraat in mogoguyang nami, dá bayongan in intau kon diugmai nami in mopoompámai kon Yerusalem bo kon umat-Mu.

ULANGAN 28:37

Kon butá mita tampat pinoporaritan i Tuhan kon i monimu, intau mita in mokoningkimdon in mokoontong kon i monimu; moiko in pomiaandon monia ibo-ibog bo poḷat kosingan.