MAZMUR 71:22 - Alkitab Singog In Mongondow Masa In Tanaa

²² Akuoi in modayowbí kon ini-Mu takin gambus, sin Iko in mosatia, o Allahku. Akuoi in moibogbí mopodondong in dondong dodayow kon ini-Mu takin kecapi, o Allah mokudus in Israel.

MAZMUR 71:22 ပူးပေါင်းရင်းမြစ်များ

DATU MITA 2 19:22

Kinotaauanmu degá mongo ki ine in sinibáanmu bo pinopoompámumai tatua? Akuoi, Allah in Israel, Allah inta motusi! Mokaḷakuang totok in dodiamu kon i-Nakó.

MAZMUR 138:2

Tumungkud in akuoi tumayow kon Baḷoi-Mu inta motusi poḷat modayow kon tangoi-Mu, sin Iko in mosatia bo umuran motabi. Iko in mopounabí in dandi-Mu nongkon onu in pinoguman in intau soaḷ Iko.

MAZMUR 144:9

Akuoi in mopodondong in dondong mobagu kon ini-Mu, o Allah, bo mokuti kon kecapi poḷat modondong.

MAZMUR 25:10

Intau inta motoindudui kon dodandian bo hukum-Nea, yo kotabi-Neabí in mosia takin satia.

MAZMUR 33:2

Posukurdon kon i Tuhan takin kecapi, modondong kon i-Nia takinan in musik.

MAZMUR 43:4

Dá akuoi in mopobayádon in mezbah i Allah, kon tayowon i Allah pangkoi in kopiaanku. Akuoi in modondongbí bo mopogogitog in kecapi, sin modayow kon ini-Mu, o Allah, Allahku.

MAZMUR 56:4

Kon dodai in noondok in akuoi, akuoi in nongamang kon ini-Mu.

MAZMUR 78:41

Mopobui-buimai in mosia monungkuḷ kon i Allah, moposusamai kon i Inta Mokudus, ki Allah in Israel.

MAZMUR 89:1

Dondong topotundú i Etan, intau in Ezrahi.

MAZMUR 89:18

Iko in nopountung kon inami nádomai tua, popisíbí in kopopia-Mu tua dá nountung in kami.

MAZMUR 98:3

Kinotoropan-Nea in tabi bo kososatia-Nea kon Israel, umat-Nea. Bayongan in bangusa kon sinangkub in butá ain nokoontong kon kinountungan i Allah naton.

MAZMUR 98:4

Poronggiowdon kon i Tuhan, ei sinangkub in butá! Dayowdon in ki Tuhan pongin dondong bo giow pia in gina.

MAZMUR 98:5

Podondongdon in dodayow kon i Tuhan, takin mokuti kon kecapi.

YESAYA 12:6

Ponggoḷokapdon ei intau mita in Sion, podondongdon takin sanang in gina. Ki Allah mokudus in israel totuu kon momulia, Sia in nogutun kon yua-yuak monimu.”

YESAYA 43:3

Sin Akuoibí, in ki Tuhan, Allahmu, ki Allah mokudus in Israel, mopoposaḷamatmu. Mesir in ogoi-Ku nobaḻí tontobutmu, Sudan bo Syeba in nobaḻí toḻiumu.

YESAYA 5:16

Táe ki Tuhan Inta Totok in mokawasa nopoontong in koḷoḷoben-Nea pinongin nogaid kon onu inta nobanar. Sia in mopoontongbí in kototusi-Nea pongin monisig kon bangusa-Nea.

YESAYA 5:19

Gumanmu, “Pomayádon ki Tuhan Allah in Israel in ḷagidon mogaid kon onu in koibog-Nea! Pomayádon mako Sia in mogaid kon tomayá-Nea, sinbá ontongon naton bo monotaau.”

YESAYA 5:24

Moiko in nondoídon kon totundú i Tuhan Inta Totok in mokawasa, bo noningkuḻe kon parenta i Allah inta mokudus in Israel. Tuamai, ná onda bo wawa bo bonok noingkag nodait nopokak kon bonu in tuḷú, natua doman in uakatmu mita mobongkogdon, bungangmu mita moingkag bo modait irupon in tompot.

YESAYA 57:15

Sin nanaa in guman i Allah, Inta Totok in moḷantud bo mokudus, inta nongawasa modapot in mononoi, “Akuoi in nogutun kon tampat inta moḷantud bo inta motusi, táe kon yua-yuakbí doman in intau mita inta moompá in dodia bo inta nomanasaḷ in nogaid kon dosanea mita, sin mopoguḻí bui kon ibog bo kamang monia.

YESAYA 60:9

Tuata in kapaḷ mita inta namangoi sinumubu nodia kon umat i Allah nobui nongkon butá moyayú. Saḷaka bo buḷawan dinianea noyotakin sin modayow kon i Tuhan Allahmu; kon i Allah in Israel Inta Totok in motusi, inta nomaḻí kon umat-Nea ihoromat.

MIKHA 7:20

Kon umat-Mu, buí i Abraham bo i Yakub, poontong-Mubí in kososatia-Mu bo tabi-Mu inta diá in obotnea tua ná inta pinodandi-Mu kon mogoguyang nami dungkuḷmai.

SURAT I PAULUS KON JAMAAT RUM 15:8

Torop in naa, ki Kristus ain nobantung kon intau in Yahudi sin mopoontong kon ki Allah in mogaidbí kon onu inta ain pinodandi-Nea kon mogoguyang naton.