MAZMUR 56:8 - Alkitab Singog In Mongondow Masa In Tanaa

⁸ Oyúon degá in kasaḷamatan kon aid moraat monia? Yopúdon in mosia kon bonu in torú-Mu, o Allah!

MAZMUR 56:8 ပူးပေါင်းရင်းမြစ်များ

DATU MITA 2 20:5

buipa bayá kon i Hizkia, datu in umat i Tuhan, bo potaau in koyow tanaa, “Akuoi, ki Tuhan, Allah inta sinumba i Daud mogoguyangmu, ain nokodongog kon sambayangmu bo nokoontongdon kon ḷuámu. Undaman-Kudon in iko; toumá in iko in mayádon kon Baḷoi-Ku.

AYUB 16:20

Akuoi siningkuḻe in yobayatku mita bo kinosingan; koomba-ombaḷ in akuoi bo namangoi kon tayowon i Allah mopoigum in totuḷung.

MAZMUR 121:8

Sia in moḷukad kon inimu kon tungkuḷ in iko mamangoi bo mayá, tanaa mako modapot in mononoi.

MAZMUR 139:16

Iko in nokoontongbí kon inakó kon tungkuḷ in akuoi kon bonupa in bobuḷadían; komintanbí pinais kon bonu in buk-Mu; singgainea mita in sinantú bidon kon tungkuḷ in diápa tobatúmai in pinangkoi.

MAZMUR 39:12

Intau in popisí in taḷánea; ihukum bo sinambok-Mu naonda bo sisik irimumud-Mu onu inta koboḻi kon inia. Totuu, intau in naonda bo tongá pogirupan in tompot.

YESAYA 63:9

Sia tontaní in kinoantugan in roriga monia. Ki Tuhan in diábí nopotabá in totabá andeka duta; Siabí tontaní inta nopoḷuat kon i monia popisí in tabi bo totabi-Nea. Sia in umuranbí momiag kon i monia nongkon tungkuḷpabímai.

YEREMIA 18:23

Táe iko, Tuhan, nonotaau kon bayongan inta sinomayá monia sin moḻimod kon inakó. Tuamai, dika mongampung kon i monia; dika momopat kon taḷá monia. Bongkugdon in mosia modapot in moḷabú. Aidaidon kon i monia podudui in torú-Mu.”

MALEAKHI 3:16

Bo intau mita inta moondok kon i Tuhan in mosigumanan, Ki Tuhan in nokodongog bo nonaridi kon onu inta siningog monia. Intau mita inta nohoromat kon i-Nia bo inta notoguondok kon i-Nia, pinais in tangoinea kon bonu in buk pomomaisan inta kon tayowon-Nea.

MATIUS 10:30

Bá kotaauan monimu, kon bayongan buok kon uḷumu kinotaauan-Neabí in kobayongnea.

KORINTUS 2 11:26

Kon bonu in bobayáanku mobayong totok kodungkuḷanku in soaḷ mita inta mokoondok: oyúon inta mokouma kon ḷunud, moyodungkuḷ in intau moraat, moyogintayow in romú intau in Yahudi bo intau deeman Yahudi, moyotayow in bahaya mita inta mobaḻí kon kotá bo kon ḷuai in kotá, inta bahaya mita kon dagat bo moyotayow in intau mita inta mongaku notobatú kon pirisaya kon i Yesus, bokaka bo diábí.

IBRANI 11:13

Bayongan in intau tatua in umuran nopirisaya umaai in minatoi. Mosia in diábí notarima kon onu inta pinodandi i Allah, táe tongá nokoontong bo notamad nongkon noyayú. Aid monia tua in noponiata kon mosia tua in tongábí intau mokokiangoi inta tongá doman noiandupmai kon dunia naa.

IBRANI 11:38

Dunia naa in deemanbí tampat mopia kon i monia. Mosia maya-mayá mako kon padang gurun bo kon buḷu-buḷudannea bo mogutun kon bonu in angob mita kon bubú mita in butá.

IBRANI 11:8

Popisí in mopirisaya, dá ki Abraham in dinumudui kon i Allah wakutu inoiní i Allah bo pinotabá minayá in butá inta pinodandi i Allah ogoi kon inia. Ki Abraham in minayábí doman umpaka diápa kinotaauannea mongo kon onda in bayáan.

WAHYU 20:12

Bo akuoi in nokoontong kon intau mita minatoi, guyanga-mongoadí sinimindog kon tayowon tampat pomomarentaan tatua. Bo tobatú buk ibanea in binukádon, tuata in Buk Intau Nobiag. Onda intua hukuman pinoḷabúdon kon intau mita minatoi, podudui in oaid monia podudui kon inta ain pinais kon bonu in buk mita tatua.

WAHYU 7:17

Sin ki Adí in Domba inta iḻimitú kon tampat pomomarentaan tatua in mobaḻí gombala monia, bo diaan-Nea in mosia mayá kon bokaká in tubig inta mokobiag. Bo inggamáandon i Allah in bayongan ḷuá kon mata monia.”

SAMUEL 1 19:18

Naonda in ki Daud nokoḷaguidon, minayá in sia kon baḷoi i Samuel kon Rama, bo pinotaaunea in bayongan inta pinomia i Saul kon inia. Onda intua ki Daud bo ki Samuel noyotakin minayá in Nayot bo nogutun kon tua.

SAMUEL 1 27:1

Ki Daud norai kon bonu in ginanea, “Naondaka doman yo kon singgai tobatú in ki Saul in moḻimodbí kon inakó. Dá diábí in daḷan ibanea kon inakó, koḻikudon in moḷagui mayá in butá in Pilistin. Aka natua dá diá bidon tayakon i Saul in akuoi kon Israel, bo akuoi in moaman domandon.”