MAZMUR 30:11 - Alkitab Singog In Mongondow Masa In Tanaa

¹¹ Indongogaipa, o Tuhan, bo kotabipa in akuoi. Tuhan tuḷungaipa kaasí in akuoi!”

MAZMUR 30:11 ပူးပေါင်းရင်းမြစ်များ

KINOBAḺIAN 37:35

Bayongan i adínea, ḷoḷaki bo bobay namangoi nohibur bo nodondouḷug kon inia, táe sia in doí dondouḷugan, Gumannea, “Modapot in matoi umurankubí ombaḷan in sia.” Natuata in nobaḻí, ki Yakub umuran nongombaḷ sin ki Yusup ki adínea tatua.

KINOBAḺIAN 45:28

“Ki adíku ki Yusup nobiagpa!” gumannea. “Tongábí tuata in kinoibogku! Akuoi in mustibí mayá bo moindoi kon inia kon dodai in akuoi diápa matoi.”

SAMUEL 2 6:14

Onda intua notayokdon totok in ki Daud takin ḷunganga in gina sin mohoromat kon i Tuhan. Kon dodai intua tongá in sia nomaké in sosapi linen inta nopoḷok inta sinogot kon ogotannea.

TAWARIKH 2 20:12

Ikobí in ki Allah nami! Hukumdon in mosia, sin kami in diádon mokopongonu in monayow kon tontara inta mobayong tatua, inta monubu kon inami. Diábí kotaauan nami mongo onupa in pomiaan nami, tuamai in mamangoi in kami kon ini-Mu mokituḷung.”

TAWARIKH 2 20:3

Noondok in ki Yosapat bo nosambayang in sia nopoigum in totundú i Tuhan. Onda intua sia in nomarenta sinbá bayongan in rayat mopuasa.

TAWARIKH 2 20:9

kon aka mosia in hukumon popisí in dosa mita monia, bo mosia in koantugan in parang, yampoi in takit, andeka malarat in gogoy, mosia in motaaubí mamangoi kon ini-Mu bo simindog kon tayowon in baḷoi pooibadaan tanaa. Kon bonu in roriga monia, mosia in motaaubí mosambayang kon ini-Mu, bo indongogan-Mubí poḷat motuḷung kon i monia.

NEHEMIA 8:10

Pobuidon in tanaa; pongaan bo ponginumdon takin ḷunganga in gina. Ogoidon in tongosilai in kaanon bo anggurmu kon i monia inta diá in kaanon bo inumon. Singgai in naa in singgai inta mokudus kon i Tuhan naton, dá dikadon mokoposusa. Ḷunganga inta inogoi i Tuhan kon i monimu in moginropotbí kon i monimu.”

ESTER 9:22

Sin kon singgai mita tatuata in mosia nonaḷow kon musung mita monia, dá robonoḷ bo nakit in gina monia nobaḷui pia bo sanang in gina. Tuamai mosia in mustibí momia kon ponanoban kon singgai mita tatua pongin bobutungan bo mongaan poḷat mosiogoian in kaanon bo mosilai kon totuḷung kon intau nobiag nobogá.

MAZMUR 149:3

Dayowdon in tangoi-Nea pongin tayok mita, dayowdon in Sia in kecapi bo rebana!

MAZMUR 150:4

Dayowdon in Sia in rebana bo tayok, dayowdon in Sia in kecapi bo bansí.

MAZMUR 27:7

O Tuhan, indongogaipa kaasí aka akuoi mokuani kon ini-Mu, kotabipa in akuoi bo tubagaidon in akuoi!

MAZMUR 30:5

Podondongdon in dondong dodayow kon i Tuhan, ei umat inta motoindudui, bo posukurdon kon i Inta Totok in motusi.

MAZMUR 4:7

Mobarong in intau in moḻibó, “Ki ine in momarakat kon inaton?” Igumon mako koibog-Mupa in kami, o Tuhan.

MOHOHUTUBA 3:4

Ki Allah in nonantú kon wakutu mongombaḷ bo wakutu kumosing, wakutu mogamui bo wakutu motayok,

YESAYA 25:3

Iko in dayowonbí in bangusa mita inta moropot, bo koondok kon kotá mita in bangusa mita inta moromú.

YESAYA 25:8

Ki Tuhan Inta Totok in mokawasa in monginggamábí kon popatoi modapot in mononoi! Sia in momopatbí kon ḷuá nongkon bayongan in pogot, bo mopoyayú in kohohina inta binaba in umat-Nea kon sinangkub in butá. Ki Tuhan ain nosingog, bo tua in notantúbí kon mobaḻí.

YESAYA 61:10

Yerusalem in noguman, “Moḷunganga in ginaku popisí in ki Tuhan, ginaku in mosanang sin ki Allah. Naonda bo nonikaan ḷoḷaki bo bobay nopogiḷambá in inta mongogaga, natuata in pinopopaké i Tuhan kon inakó ḷambung kasaḷamatan bo kountungan.

YESAYA 61:3

sin mobogoi in pia in gina bo ḷunganga in gina kon intau inta morobonoḷ in gina bo nonogumatoi; sin momaḷui kon inta mokoajar kon gina monia mobaḻí dondong dodayow. Mosia in nádon pangkoi in kayu tobatú inta pinomuḷa tontaní i Tuhan. Mosia in mogaidbí kon onu inta mopia bo mobanar, dá ki Tuhan in poḷantudon.

YEREMIA 31:4

Bangusamu in baḻíon-Kubí ponango-nangoian ná dungkuḷmai. Komintanpa doman moiko in mogamábí kon rebana bo motayok takin ḷunganga in gina.

YEREMIA 52:33

Sia in inogoi nomaḷui kon ḷambung in ponjaranea bo nodapot kon singgai noiduduimai kon bonu in sia nobiagpa motaaubí in sia mongaan kon komaḻig, bo pomuḷoi in singgai inogoian in doit pakéonnea kon kobiagan.

LUKAS 15:22

Táe ki amánea nogoiní kon simpaḷnea mita bo noguman, ‘Koḻikat! Podiaaipa mangoi kon ḷambung inta totok in nopira bo popopaké kon inia. Popopakéai doman in sising kon gongguyamúnea bo ḷutudai domandon in sapatu.

YOHANES 16:20

Poguman-Kudon kon i monimu, moiko nion in mongombaḷbí bo mogamui, táe mopiabí in gina in dunia naa. Morobonoḷbí in gina monimu, táe robonoḷ in gina monimu tua in mobaḷuibí ḷunganga in gina.

WAHYU 21:4

Paḻitandon i Allah in bayongan ḷuá kon mata monia. Diá bidon in popatoi. Diá bidon in mokoajar kon gina. Amui ande ombaḷ onu inta mokonakitpa kon gina in diá bidon. Soaḷ mita inta nokoyongandon ain noinggamá.”