MATIUS 7:14 - Alkitab Singog In Mongondow Masa In Tanaa

¹⁴ Táe daḷan inta mopobayá in tampat inta mokobiag in nointok bo tongá topiḻik in intau inta mokodapot kon tua.”

MATIUS 7:14 ပူးပေါင်းရင်းမြစ်များ

MAZMUR 16:11

Sinundú-Mu kon inakó in daḷan kobiagan; kon ini-Mu akuoi mokouḻí kon pia in gina inta diá in poḻiuan bo pia in gina modapot in mononoi.

AMSAL 8:20

Akuoi in dinumudui kon daḷan inta moadil, bo akuoi in nongin daḷan inta moitutui.

YESAYA 30:21

Aka moiko bo tumabat nongkon daḷan, kon tumimu kodongogan in singog-Nea inta moguman, “Naa in daḷannea; pongin daḷan tanaa.”

YESAYA 35:8

Kon tua in oyúondon in daḷan moḷoben, “Daḷan mokosaḷamat” in tangoinea. Intau binaradosa in diábí moitaḻib kon tua, Intau bodok in diábí mopoḷaḻe kon intau inta tumaḻib kon tua.

YESAYA 57:14

Oyúon in noguman, “Aidaidon bo sadiadon in daḷan kon umat-Ku, Posídon in bayongan in tuḷamboi.”

YEREMIA 6:16

Ki Tuhan in noguman kon umat-Nea, “Sindogdon kon poyotangaan mita in daḷan, bo taridiadon kopira! Ḻibódon in daḷan mita dungkuḷmai, bo onda in mopia-pia kon sigadnea. Duduiaidon in daḷan tatua, sinbá moiko in mobiag moodom.” Táe mosia in noguman, “Diá, kami in doíbí mongin daḷan tatua!”

MATIUS 20:16

Bo ki Yesus in noguman, “Natuabí in mobaḻí, intau inta noitontumi mobaḻí moiuna bo intau inta noiuna in mobaḻí moitontumi.”

MATIUS 22:14

Bo pangabisannea ki Yesus in noguman, “Nobarong in inoiní, táe noyakag in piniḻí.”

MATIUS 7:13

“Tuotdon pongin daḷan inta mointok, sin daḷan inta mopobayá in naraka moḷoben bo mobanat, bo mobarong in intau mongin tua.

MATIUS 7:15

“Mokopoingatdon kon nabi mita inta diá totuu. Nabi inta mamangoi kon inimu naonda bo intau inta mongopia, táe sabanarnea mosia tua intau bí moromú.

MARKUS 8:34

Onda intua ki Yesus nogoiní kon intau moantó inta noyotakin murí-Nea mita bo noguman kon i monia, “Intau inta moibog dumudui kon i-Nakó musti ḻiongonnea in kopontingannea tontaní bo momotaan kon kayu pinoyotaḻempang bo umuran dumudui kon i-Nakó.

LUKAS 12:32

“Moiko inta tongá topiḻik, dikabí moondok! Sin mosanangbí in gina i Amámu in mobogoi in barakat kon i monimu kon bonu in kawasa-Nea.

YOHANES 16:2

Moiko in poḷuaionbí nongkon baḷoi mita in pososambayangan. Bo moiangoibí in wakutunea kon intau inta moḻimod kon i monimu in mosangka kon sia tua in dinumuduibí kon parenta i Allah.

YOHANES 16:33

Naa komintan in poguman-Ku sinbá moiko in mokouḻí kon kobiagan motompia bo moonow sin notobatú-Kudon. Kon dunia naa moyoyangpabí in moiko, táe korotonbí in ginamu, sin Akuoi in diábí taḷowon in dunia naa!”

OUMAN IN RASUL MITA 14:22

Kon kotá mita tatua mosia in minayá noginrigon kon gina in intau mita inta mopirisaya kon i Yesus bo nononggina sinbá umuran mopirisaya kon i Yesus. Nanaa in tonggina monia tua, “Munapabí moantó in roriga mouḻí naton, bain tua bo mokorasa kon kopiaan kon Dunia Mobagu i Allah.”

SURAT I PAULUS KON JAMAAT RUM 12:2

Donaai in moiko dumudui kon ibog in dunia naa. Pomayádon mako in ki Allah in monoimbagu kon i monimu, sinbá mobaḷui in moiko. Sahingga in kotaauandon monimu onu kinoibog i Allah, tuata inta mopia bo inta mokosanang kon gina-Nea bo inta mosompurna.

SURAT I PAULUS KON JAMAAT RUM 9:32

Nongonu sin diá mokodapot in mosia? Soaḷnea moramuji in mosia, táe diá pinodoyon monia kon pirisaya kon i Allah, tongábí pinodoyon monia kon oaid monia tontaní. Dá mosia in noḷabú kon “Batu inta Kopopintudan.”