MATIUS 5:7 - Alkitab Singog In Mongondow Masa In Tanaa

⁷ Pia in kamang in intau inta mopia in gina; sin mosia i motarima doman kon kopopia i Allah.

MATIUS 5:7 ပူးပေါင်းရင်းမြစ်များ

SAMUEL 2 17:28

Nodia in mosia kon palo, rumping, bo boḷosak kon i Daud bo intaunea mita, bo gandum doman, makeang, topong, gandum inta inangag, kasang, berenebon, biluk, keju, susu inta bagupa pinugut bo tongonumai in domba. Kinotaauan monia kon ki Daud bo intaunea mita tatua in ginogoidon, moyogang bo moḷopí sin nongkon bobayáan kon padang gurun.

SAMUEL 2 22:26

Tuhan, Iko in mosatia kon intau inta mosatia bo mopia kon intau inta mopia.

MAZMUR 112:4

Bayag in monindar kon bonu in sindip kon intau mita inta mojujur, kon intau inta moadil, inta motabi bo mopia in gina.

MAZMUR 112:9

Sia in mosila-silaibí mako kon kapunyaannea, bo mobogoi in oogoi kon intau nobogá; sia in umuranbí mogaid kon inta mopia, tuamai in sia nongawasa bo ihoromat.

MAZMUR 18:25

Dá ki Tuhan in notuḻí kon oaidku inta noitutui sin kinotaauan-Nea kon akuoi in diábí kotaḷá.

MAZMUR 37:26

Sia in umuranbí mopoḷuan bo mobogoi, bo ki adínea mita in nobaḻí barakat kon inia.

AMSAL 11:17

Intau inta mopia in gina in modiabí kon kauntungan kon inia tontaní; intau inta moromú in mokoporugimaibí kon inia tontaní.

AMSAL 11:25

Intau inta mokakit mobogoi in umuranbí mobarong in kaoyúonannea, intau inta moibog motuḷung in tuḷunganbí doman.

AMSAL 14:21

Ki ine in mopoompámai kon intau ibanea, mogaid kon dosa; ki ine in mopia in gina kon intau bogá yo mosanang in ginanea.

AMSAL 19:17

Motuḷung kon intau bogá notongkaibí in nopoḷuan kon i Tuhan; bain ki Tuhan doman in motuḻí kon tua.

YESAYA 57:1

Intau mopia bo motoindudui minatoi, diá in nomangaḻe andeka nonaridimai. Naonda in minatoi, mosia in noiḷagui nongkon bodito bo nogogai takin dame.

DANIEL 4:27

Tuamai in aka motaau dá ki Tuangku in dumuduipa kon tonggina in bobantung naa. Dikadon in ki Tuangku mogaid kon dosa, táe aidaidon in onu inta mopia bo moadil, bo kotabidon in intau nobiag nobogá. Takin natua ki Tuangku in umuranbí mobiag mopia-pia mako.”

HOSEA 1:6

Onda intua ki buḷoiku tatua nopononggadí bui in adí nami nogindua, adí bobay. Ki Tuhan in noguman kon inakó, “Hosea, tangoiai in ki adímu tatua ‘Inta diá Kinotabi’, sin Akuoi in diá bidon motabi bui kon bangusa in Israel, bo totokbí in diá mongampung kon i monia.

HOSEA 2:1

Tuamai oiní in tumpaḷa intau takin tangoi “Umat i Allah” bo “Kinotabi i Tuhan.”

HOSEA 2:23

Pomiaan-Ku motompia in kobobiag in umat-Ku bo motantúdon in mosia in mogutun kon butá monia. Kon i monia inta sinangoi ‘Inta Diá Kinotabi’ poontong-Kubí kon mosia in kotabi-Ku, bo kon i monia inta sinangoi ‘Deeman Umat-Ku’ in tangoion-Kudon, ‘Moiko in Umat-Ku’. Mosia in motubagbí, ‘Ikobí in ki Allah nami.’ ”

MIKHA 6:8

Diá! Ki Tuhan in noponiatadon kon i naton onu inta mopia. Igum-Nea kon i naton in tongábí mopoaid in inta moadil, umuran moponiata in totabian, bo takin ompá in gina mobiag motobatú takin i Allah naton.

MARKUS 11:25

Bo aka moiko mosambayang, táe oyúonpa intau diá kinosanang in ginamu, yo ampungaipa muna in intau tatua, sinbá ampungan doman i Amámu inta kon soroga in bayongan dosamu. [

LUKAS 6:35

Sabanarnea in deemanbí natua! Nanaabí in musti aidan monimu: Kotabibí in saturumu bo aidai in onu inta mopia kon i monia, bo popoḷuanaibí in mosia, táe donaai potayakan kon kauntungan in mosia. Aka natua in aidan monimu, yo moiko in motarimabí kon bungai in oaidmu inta moḷoben totok bo moiko in mobaḻí doman ki adí mita i Allah Inta Totok in moḷantud. Sin Sia in mopiabí doman kon intau mita inta diá motaau mosukur kon i Allah bo kon intau mita moraat.

SURAT I PAULUS KON JAMAAT RUM 11:30

Koḻipod in moiko diá motoindudui kon i Allah. Táe tanaa in pinoniatadon i Allah kon moiko in pinilatandon nongkon taḷá monimu, sin popisí in intau Yahudi diá motoindudui.

KORINTUS 1 7:25

Sabanarnea akuoi in diábí notarima kon parenta i Tuhan kon soaḷ intau mita inta diápa nokipobuḷoi. Táe saḷaku intau inta mopirisaya inta ain inogoian-Nea in totabi inta motaau pirisayaanmai, dá mononggina in akuoi.

KORINTUS 2 4:1

Kami nogaid kon oaidan tanaa popisíbí in totabi i Allah. Tuamai in diábí moḻia-ḻiaw in gina nami.

EPESUS 4:32

Táe mokopopia kon gina kon tumpaḷa intau, bo moiko in musti domandon mototabian, bo mosiampungan naonda bo ki Allah inta ain nongampung kon i monimu pinongin i Kristus.

KOLOSE 3:12

Utat mita, moiko nion in umatbí i Allah inta ain sinotabi bo piniḻí-Nea mobaḻí kapunyaan-Nea tontaní. Tuamai in musti popoontong doman monimu in totabian, pia in gina, diá motosiḷantud, pososingog moaḷus bo mobahasa kon tumpaḷa intau bo mosabar aka koantugan in roriga.

TIMOTIUS 1 1:13

umpakabí tungkuḷ intua akuoi naa in umuran moponapud in diá totuu bo momogutú poḷat doman moningkuḻe kon i-Nia. Táe sinotabibí i Allah in akuoi, sin dodai intua akuoi in diápa mopirisaya, sahingga in diábí kinotaauanku onu in pinomiaku tatua, noitutui ande noitaḷá.

TIMOTIUS 1 1:16

Táe popisíbí in kaadaanku natua, dá sinotabi i Allah in akuoi bo bá moniatadon in kososabar i Kristus Yesus kon inakó, intau inta totok in binaradosa. Bo naadon in mobaḻí contoh kon bayongan in intau inta aka mopirisayadon kon i-Nia bo inta mokouḻí kon kobiagan mopia bo mononoi.

IBRANI 4:16

Tuamai, koḻigai in kita dika moondo-ondok in mayá kon tayowon i Allah inta nomarenta takin pia in gina. Motabibí in ki Allah kon i naton bo ogoian-Neabí in barakat, sahingga motarimabí in kita kon totuḷung-Nea aka kon wakutuneadon.

IBRANI 6:10

Sin ki Allah in moadilbí. Diábí koḻiongan-Nea in onu inta ain inaidan monimu kon i-Nia, bo tabi inta pinoontong monimu kon i-Nia wakutu in notuḷung kon utat mita inta tumpaḷa mopirisaya kon i Kristus tungkuḷ intua bo masa in tanaa.

YAKOBUS 2:13

Sin diábí poontong i Allah in tabi-Nea kon intau inta diá nonotaau in totabian. Táe tabibí in moḷobe-ḷoben nongkon hukuman!

YAKOBUS 3:17

Táe intau inta nokouḻí kon kabijaksanaan nongkon i Allah, yo sia in muna-munamai totok modarit, onda intua moibog in sia kon dodamean, mobahasa mako, bo motoindudui. Moḷoben in tabinea bo oaidnea mongopia. Diábí in sia momiḻí kon intau bo diábí tongá ki ubo-uboḷmai mopia.

PETRUS 1 2:10

Koḻipod moiko in deemanbí umat i Allah, táe masai in naa moiko in nobaḻídon umat i Allah. Koḻipod moiko in diá kinotabi i Allah, táe masai naa moiko ain notarima kon totabi-Nea.