MATIUS 5:39 - Alkitab Singog In Mongondow Masa In Tanaa

³⁹ Táe Akuoi in moguman kon inimu: Donaai moiko motuḻí kon intau inta nopoaid in moraat kon inimu. Táe nanaabí in aidai, aka ki ine in monokap kon putongimu koḷanan, yo ogoi doman in putongimu koḷoigi.

MATIUS 5:39 ပူးပေါင်းရင်းမြစ်များ

DATU MITA IMITÁNEA 22:24

Dá ki Nabi Zedekia in minayádon dinimiug kon i Mikha bo nonokap kon pogotnea poḷat noguman, “Diábí doman Roho i Tuhan monaḷámai kon inakó bo momaké kon inimu?”

AYUB 16:10

Bukáan in intau mita koḷobenon in bibig monia sin moningkuḻe kon inakó; akuoi iḻibutan bo putongiku in sinokap.

AMSAL 20:22

Dikabí mopotuḻí in moraat kon inta moraat; popirisayadon kon i Tuhan, Siabí in motuḷung.

AMSAL 24:29

Dika moguman, “Tuḻíankubí in onu inta ain pinopoaidnea kon i nakó!”

YESAYA 50:6

Inogoiku in ḻikudku kon intau inta nomongkug kon inakó; bo putongiku kon intau inta norabut kon kumiku. Akuoi in diábí nopoḷagui in pogotku kon tungkuḷ in akuoi siningkuḻe bo dinuyáan.

OMBAḶ 3:30

Umpakabí sinokap bo ginosil, yo tua komintan in tarimaandon naton.

IMAMAT 19:18

Dika mopotuḻí in yaat in ginamu bo dika moyaat in gina kon intau ibanea, táe kotabibí in tumpaḷa intau ná kototabimu kon awakmu tontaní. Akuoi in ki Tuhan.

MIKHA 5:1

Ki Tuhan in noguman, “Ei Betlehem Eprata, iko in kotá tobatú inta nointok kon Yohuda! Táe nongkon inimu posindogon-Kubí mangoi in pongawasa kon Israel inta kinobaḻiannea in nongkon dungkuḷpabímai.”

MATIUS 5:40

Bo kon intau inta moibog mopongadu kon inimu kon hakim, sin sia moibog in ḷambungmu, yo ogoidon doman in jubahmu.

LUKAS 22:64

Inoḻingoian monia in daing mata-Nea bo pinoḻibóan nanaa, “Pogumanka mongo ki ine in nomongkug kon ini-Mu?”

LUKAS 6:7

Mototundú mita kon agama bo intau in Parisi umuran mako motayak kon taḷá i Yesus sinbá oyúon in baḻíon monia dodoyonan popongaduan kon i-Nia. Tuamai in mosia umuran monaridi mako mongo ki Yesus mongundam kon intau aka singgai in Sabat.

YOHANES 18:23

Ki Yesus in notubag, “Aka Akuoi in nosingog kon noitaḷá, yo pogumanka kon naa onu in noitaḷá tua! Táe aka noitutuibí in siningog-Ku tua, nongonu sin iko nonokapbí kon i-Nakó?”

KORINTUS 1 6:7

Naaibí in tongá soaḷ mopongadu in pelekara kon intau inta deeman Keresten; sedangkan kon sigad monimu bo momuká in yogenggeng, yo mangaḻenea kon tua in tobatú bidon kelemahan monimu. Sin maníka bo tombogaan andeka porugion in tumpaḷa intau!

TESALONIKA 1 5:15

Ḷukadai sinbá diá in mosituḻían intau kon soaḷ mita inta moraat. Umuran poramuji in mogaid kon inta mopia kon intau mita.

IBRANI 12:4

Sin wakutu in moiko moramuji totok in moḷawang kon inta diá mopia, diápabí dodai onda in moiko in nobakuat dapot iḷuaian dugú.

YAKOBUS 5:6

Moiko in mohukum bo moḻimod kon intau mita inta diá kotaḷá, bo mosia in diá momaḷawang kon i monimu.

PETRUS 1 3:9

Inta moraat donaaibí tuḻían onu inta moraat, ande aka sibáan yo donaaibí monuḻí monibá. Táe poigumbí sinbá barakatan i Allah in intau mita inta nomia natua kon i monimu. Sin ki Allah in nogoiní kon i monimu, sinbá motarima in moiko kon barakat-Nea.