MATIUS 5:16 - Alkitab Singog In Mongondow Masa In Tanaa

¹⁶ Natua doman bayagmu musti monindar kon tayowon in intau, sinbá ontongon monia in oaidmu mita inta mopia bo modayow kon i Amámu inta kon soroga.”

MATIUS 5:16 ပူးပေါင်းရင်းမြစ်များ

IḶUAIAN 34:35

bo inontong monia pogot i Musa nonindar. Dá inoḻingoianneadon bui in pogotnea modapot in sia tumuotdon bui sin moyosingogdon bui i Tuhan.

AMSAL 4:18

Daḷan in intau moraat in mosindip ná kon sindip in doḷom. Mosia in moipintud bo moḷabú diá butungonmai monia. Noyotoḻikud kon tua in daḷan inta bayáan in intau mopia in naonda bo kinobukaan in mata in singgai; koonggot-koonggot kobayag-kobayag, modapot in imbuitnea mobayagdon totok.

YESAYA 58:8

Dá bayag in monimbayagdon kon inimu naonda bo modiug mobayag, bo kekebmu mita in ḷagidon mopia. Akuoi in moyotakinmubí sin moposaḷamat kon i monimu. Koangoian-Ku in mogoḻiungbí kon i monimu nongkon bayongan in tampat.

YESAYA 61:3

sin mobogoi in pia in gina bo ḷunganga in gina kon intau inta morobonoḷ in gina bo nonogumatoi; sin momaḷui kon inta mokoajar kon gina monia mobaḻí dondong dodayow. Mosia in nádon pangkoi in kayu tobatú inta pinomuḷa tontaní i Tuhan. Mosia in mogaidbí kon onu inta mopia bo mobanar, dá ki Tuhan in poḷantudon.

MATIUS 23:5

Onu inta inaidan monia in tangábí popoontong kon intau. Mosia in momaké in tali moḷoben inta pakéonmai mosambayang bo inta rumbainea mongoḷanggó mita!

MATIUS 23:9

Bo dikadon in moiko monangoi ki ‘Amá’, kon i inekadon in kon dunia naa sin tongábí tobatú in ki Amámu, Sia tuata inta kon soroga.

MATIUS 5:45

aka moiko mogaid kon natua yo moiko in mobaḻí ki adí mita i Amámu inta kon soroga. Sin ki Allah in mobogoi mata in singgai-Nea kon intau moraat bo kon intau mopia bo Sia doman inta mobogoi in uyan kon intau inta mobanar bo kon intau inta mouboḷ.

MATIUS 6:16

“Aka moiko bo mopuasa, yo donaaibí popokantara kon pogotmu ná intau mita inta mongomunapik. Imonia in popokantarabí kon pogot monia, sinbá kotaauan in intau kon mosia in koyogot mopuasa. Poguman-Ku kon inimu, tuadon bungainea kon i monia.

MATIUS 6:9

Tuamai aka moiko bo mosambayang yo singogdon naa: ‘O Allah, Amá nami inta kon soroga, tongábí Iko in ki Allah inta sinumba bo inta dayo-dayowon nami.

MATIUS 9:8

Intau moantó inta nokoontong kon onu inta nobaḻí tatua noondok bo nodayow kon i Allah inta ain nobogoi in kawasa ná domai tua in koḷoben kon intau.

LUKAS 11:2

Dá kai Yesus doman, “Aka moiko bo mosambayang yo singogdon nanaa, ‘Amá, Tongábí Iko in ki Allah. Poigumon mako Iko in sumbaan bo horomaton. Ikobí in Datu nami. Poigumon mako Iko momarenta kon dunia.

YOHANES 15:8

Aka moiko momungai modatog, yo ki Amá-Ku in pomuliaan; bo moiko in totu-totuudon mobaḻí murí-Ku mita.

OUMAN IN RASUL MITA 9:36

Kon ḻipú tatua oyúon doman in bobay, tangoinea in ki Tabita. Sia in tobatú intau inta mopirisaya kon i Yesus. (Aka kon Yunani, ki Dorkas in tangoinea.) Sia in umuran mogaid kon inta mopia bo umuran moibog motuḷung kon intau mita inta nobiag nobogá.

KORINTUS 1 14:25

Onu inta noibuni kon bonu in ginanea komintanbí poontong, sahingga in mokopoompá kon dodia in sia bo moibog mosumba kon i Allah. Sia in mobaḻí mopirisaya totok kon ki Allah in umuranbí kotaki-takin monimu.

KORINTUS 2 9:13

Bo nongkon oaid mopia inta ain pinoontong monimu tua, mobayong intau in Keresten kon Yudea modayow kon i Allah popisí ontongon monia in kototoindudui monimu kon Habar Mopia soaḷ ki Kristus inta duduiandonmai monimu tua. Bo modayow doman in mosia kon i Allah, sin popisí in kopopia in gina monimu moibog mosila-silai mako kon i monia bo kon intau mita ibanea, onu in oyúon kon inimu.

GALATIA 1:24

Dá mosia totokdon in nodayow kon i Allah sin akuoi in nopirisaya domandon kon tua.

EPESUS 2:10

Ki Allahbí in nomia kon i naton, bo pinongin i Kristus pinomia-Nea in kita, sinbá kita in mogaid kon soaḷ mita inta mopia inta ain sinadia-Nea kon i naton.

EPESUS 5:8

Moikopa tontaní koḻipod in mobiag doman kon sindip. Táe tanaa moiko in nobaḻídon umat i Tuhan, mangaḻenea kon tua, moiko in kon bonudon in bayag. Tuamai moiko in mustidon mobiag kon bonu in bayag.

TESALONIKA 1 2:12

Kami umuran mononggina bo mobogoi in moginrigon kon gina monimu bo mondodak sinbá moiko in moidudui kon inta kinoibog i Allah. Inoiní-Nea in moiko sinbá mobaḻí umat kon Dunia-Nea inta Mobagu bo mokorasa kon kawasa-Nea inta moḷoben.

TIMOTIUS 1 2:10

Táe ḷambáanbí in oaid mita inta mopia, inta patus kon bobay mita inta moibada kon i Allah.

TIMOTIUS 1 5:10

bo kinotaauan doman in intau kon umuranbí in sia nogaid kon inta mopia, ná umpamanea, ain nonompia kon i adínea mita, motabi kon tumpaḷa intau, moibog mobogoi in kaanon kon intau mita mopirisaya. Moibog doman motuḷung kon intau mita inta nobiag nobogá, pokoknea mosia in totu-totuudon nogaid kon onu inta mopia.

TIMOTIUS 1 5:25

Ná doman tua in oaid mita mopia baḷúbí koontongan, bo inta diá mogampang koontongan in diábí umuran moiadop.

TIMOTIUS 1 6:18

Ponorop domandon kon i monia sinbá mosia in mopoontong in aid inta mopia. Kobayongdon in mogaid kon inta mopia, mokopopia kon gina bo moibog mobogoi.

TITUS 2:14

Sia tuata inta ain noposarakan in awak-Nea sin mopoḷuat kon i naton nongkon bayongan inta moraat, bo kita in baḻíon-Nea tobatú umat inta noiḷuatdon nongkon kawasa in dosa bo tongádon mobaḻí umat-Nea inta morajing mogaid kon inta mopia.

TITUS 2:7

Bo kon bayongan in yagi-yagi, oaidmu in musti mobaḻí dodayanan inta mopia kon i monia. Aka motundú in iko yo mustibí mokopojujur bo totu-totuu motundú.

TITUS 3:14

Tundúdon in intau mita naton mogaid kon soaḷ mita inta mopia sinbá mosia in motaau mopooyúon in bayongan kaparaḷuan inta paraḷu pakéon, sinbá oyúondon in baraguna monia tua.

TITUS 3:4

Táe ki Allah, Mopoposaḷamat naton ain nopoontong in tabi bo kopopia in gina-Nea kon i naton.

IBRANI 10:24

Bo kita in mustibí mosiindoian, sinbá umuran motaau mosiponoropan kon bá motabi kon tumpaḷa intau bo momia doman kon soaḷ mita inta mopia.

PETRUS 1 2:12

Kopiaan in oaidmu kon sigad in intau mita inta diápa nonotaau kon i Tuhan, sahingga in aka singogon monia kon iko in intau moraat, yo koontongandon monia in oaidmu inta mopia, dá modayowdon in mosia kon i Allah kon singgai koangoian-Nea.

PETRUS 1 2:9

Táe moiko nion in bangusa inta kinopiḻían, imang mita inta mobantung kon datu, bangusa inta mokudus, umat inta kapunyaan i Allah. Ain piniḻí bo inoiní i Allah in moiko iḷumuai nongkon sindip bo mayá tumuot kon bayag-Nea inta momulia, takin makusud bá moiko in mopotaa-taau mako in habar in bayongan inta pinomia i Allah inta diá in poḻiuan tua.

PETRUS 1 3:1

Ná doman tua in moiko, bobay mita, kodu-koduduibí kon i buḷoi monimu, sinbá aka oyúon in kon sigad monia in diá mopirisaya kon habar nongkon i Allah, yo oaid monimu tua in mokopobaḻí kon i monia mopirisaya. Diá bidon paraḷu in moiko mosingog kon onu bo onu kon i monia,

PETRUS 1 3:16

Táe koaḷusbí in pototubag takin horomat. Ginamu in musti totu-totuu motuḻid, sinbá aka poponapudan uboḷ in moiko lantaran nobiag notompia saḷaku dumodudui i Kristus, dá intau inta noponapud in uboḷ tatua kon inimu buibí mooyá tontaní.

PETRUS 1 4:11

Intau inta mopoyaput in habar, sia mustibí mopoyaput in habar nongkon i Allah, intau inta mobantung kon intau ibanea, mustibí pakéonnea in ropot inta nongkon i Allah, sinbá kon bayongan in yagi-yagi ki Allah in dayowon pongin i Yesus Kristus. Sia tua in kitogi kamuliaan bo kawasa inta mononoi. Amin.

PETRUS 1 4:14

Kopiabí in gina monimu aka singkuḻeon sin popisí in mopirisaya kon i Kristus, tua in mangaḻenea Roho momulia inta Roho i Allah in umuranbí kotaki-takin monimu.