MATIUS 4:24 - Alkitab Singog In Mongondow Masa In Tanaa

²⁴ Onu in inaidan i Yesus tua noisiardon kon bayongan ḻipú kon Siria, dá diniadon monia pinobayá kon i-Nia in bayongan intau inta nongotakit noonggotdon. Noyagi-yagimai in takit, oyúon in kinotoḷangan in dimukud moraat, oyúon takit in manuk, oyúon in diá mokobayá, mosia nopia mita i Yesus.

MATIUS 4:24 ပူးပေါင်းရင်းမြစ်များ

SAMUEL 2 8:6

Onda intua ki Daud noposindog in ḷoḷaigan mita in tontara kon bonu in butá monia, bo motoguondok in mosia bo moguboḻi kon pajak kon inia. Ki Tuhan in nopountung kon i Daud kon ondakabí in bayáannea poparangan.

DATU MITA IMITÁNEA 10:1

Datu bobay kon butá in Syeba nokodongogdon kon habar soaḷ ki Salomo. Dá namangoi in sia kon Yerusalem sin monungkuḷ kon i Salomo takin nobogoi in tangkí mita inta mongobogat raion.

DATU MITA IMITÁNEA 4:31

Sia in totu-totuubí kon totok in mopandoi noiḻiu kon bayongan in intau. Sia in noiḻiubí kon i Etan intau in Ezrahi, ki Heman, ki Kalkol bo ki Darda adí mita i Mahol. Tangoi i Salomo ponangoi-nangoiandon totok kon ondakabí kon butá mita kon diugmai in dodatuan nea.

TAWARIKH 1 14:17

Dá pinonango-nangoiandon in tangoi Daud kon bayongan tampat, bo binaḻídon i Tuhan in bayongan bangusa moondok kon i Daud.

TAWARIKH 1 29:2

Bahan mita pakéon kon baḷoi tatua takin pakakatnea mita in sinadiakudon muna onda inta kinomampuanku sinadia. Akuoi in noposadiadon in buḷawan, saḷaka, bitú uatoi, kayu, batu mita koboḻi bo batu mita permata, batu mita inta noyagi-yagimai in batangannea sin mobaḻí ḷambá mita bo nobayong totok in batu pualam.

IḶUAIAN 15:26

Guman i Tuhan, “Totu-totuudon dudui kon i-Nakó, bo aidaidon in onu inta ontongon-Ku mopia; duduiaidon in bayongan parenta-Ku. Aka aidan monimu intua, yo moiko in diábí hukumon-Ku poumáan in takit ná inta pinouma-Ku kon intau mita in Mesir. Akuoibí in ki Tuhan inta nonompia kon i monimu.”

MATIUS 12:22

Onda intua diniadon kon i Yesus in intau inta kinotoḷangan in dimukud moraat. Intau tatua bilog bo bobó sia inundaman i Yesus, dá nokosingog bo nokoontongdon.

MATIUS 14:1

Kon wakutu intua nodapotdon in habar mita kon i Herodes, datu in Galilea soaḷ bayongan inta inaidan i Yesus.

MATIUS 15:22

Kon tua noiangoi in tobatú bobay intau in Kanaan inta nongkon ḻipú kon tua, bo nomaḷú, “Kotabipa in akuoi naa Tuhan Adí i Daud! Sin ki adíku bobay kinotoḷangan in dimukud moraat. Bo moyoyiga totok in sia.”

MATIUS 17:15

“Tuhan, kotabipa kaasí in ki adíku, sin sia in notakit, takit in manuk, bo totok in moyoyiga. Sia saḷaḷu moitubá bo tantú doman moḷabú kon tubig.

MATIUS 17:18

Bo ki Yesus in noguman kon dimukud moraat inta sinumoḷang kon adí tatua, ‘Ḷuai!’ Bo dimukud moraat tatua in iḷumuai, dá dodaipa doman tatua adí tatua in nopia.

MATIUS 4:23

Ki Yesus minaya-mayá mako in bayongan ḻipú kon Galilea. Sia in sinumuot bo notundú kon bonu in baḷoi pososambayangan poḷat nopotaau in Habar Mopia soaḷ naonda in ki Allah mamangoi momarenta saḷaku Datu. Kon tua Sia nongundam doman kon bayongan panyaki in intau mita inta kon tua.

MATIUS 8:28

Noiyaputmai in ḷoḷan kon ḻipú intau in Gadara, namangoidon kon i Yesus in intau taya dua inta kinotoḷangan in dimukud moraat, taya dua naa nongkon tampat poḷoḷobongan. Taya dua tua in totokdon in mokoondok sahingga intau mita diá mokobaḻí in mongin daḷan tatua.

MATIUS 8:33

Bo moḷoḷukad mita kon boké tatua in noḷagui. Naonda in nodapotmai kon kotá nodait inouman monia in onu inta aindon nobaḻí. Inouman doman monia in intau mita inta kinotoḷangan in dimukud mita moraat tua.

MATIUS 8:6

“Tuang, bobantungku noitosiug mako kon baḷoi sin notakit diá mokobayá. Bo sia in moyoyigadon totok.”

MATIUS 9:26

Habar kon soaḷ inta nobaḻí tatua noiwayadon kon bayongan in ḻipú kon tua.

MATIUS 9:35

Natuata in inaidan i Yesus kon wakutu in Sia minaya-mayá mako in bayongan kotá bo ḻipu-ḻipúannea. Sia in nobogoi in totundú kon bonu in baḷoi mita pososambayangan bo nopoyaput in Habar Mopia kon naonda in ki Allah momarenta saḷaku Datu. Sia in nongundam doman kon bayongan takit bo yoyiga.

MARKUS 1:28

Dá habar soaḷ ki Yesus ḷagidon noiwaya kon bayongan butá in Galilea.

MARKUS 1:32

Naonda in noungkoḷomdon singgai, intau mita nopodondon mangoi kon i Yesus in intau nongotakit bo inta kinotoḷangan in dimukud moraat.

MARKUS 2:3

Koyogotpa in Sia mosingog, indoianmai intau taya opat namangoi kon i Yesus kobuḻi-buḻig in intau ḻempeng.

MARKUS 2:4

Táe popisí in mobarong totok in intau, dá diá in mosia noiyaput kon i Yesus, dá noponik in mosia bo nomukat kon atop in baḷoi inta kon tombutungmai i Yesus. Onda intua sinuntundon monag monia in intau ḻempeng tatua pinoyotakin in boḷad tosiugannea.

MARKUS 2:9

Onda degá in mogampa-gampang, moguman, ‘Dosamu inampungandon’, andeka moguman, ‘Pobangondon, bingkat in boḷad pinosiuganmu bo bayádon’?

LUKAS 2:2

Naa in pinomangkoian pinogiapan kon intau mita, wakutu in ki Kirenius nobaḻí gubernur kon butá in Siria.

LUKAS 4:14

Onda intua ki Yesus minayádon bui in Galilea, bo Sia in umuran kon bonu in kawasa in Roho i Allah. Habar soaḷ ki Yesus noisiardon kon bayongan ḻipú tatua.

LUKAS 4:38

Onda intua ki Yesus in nonaḷámai kon baḷoi pososambayangan tatua bo minayá kon baḷoi i Simon. Kon tua ki guyá i Simon notakit pinonikan in patú bo irimintonow, dá pinoguman monia kon i Yesus in soaḷ tatua.

LUKAS 5:15

Táe habar soaḷ ki Yesus totokdon noisiar kon ḻipu-ḻipúannea, sahingga in nobayongdon intau in namangoi sin mokidongog kon onu in poguman-Nea bo mokiundam doman kon bayongan takit monia.

LUKAS 5:24

Táe tanaa mako in poniata-Kudon kon i monimu kon ki Adí Intau oyúonbí in kawasa-Nea mongampung kon taḷá kon dunia naa.” Onda intua Sia in noguman kon intau ḻempeng tatua, “Pobangondon, bo buatdon in tosiuganmu, bo pobuidon!”

LUKAS 7:17

Habar tatua noibaya-bayádon mako kon bayongan ḻipú kon Yudea bo kon diugneamai.

YOHANES 10:21

Táe oyúon doman in noguman: “Intau inta kinotoḷangan in dimbuḷó in diábí mosingog natua! Eta dimbuḷó mokoundam kon intau bilog sahingga in mokoontong?”

OUMAN IN RASUL MITA 10:38

Bo kinotaauanbí domandon monimu kon ki Allah ain nomiḻí kon i Yesus intau in Nazaret tua bo nobogoi kon i-Nia in Roho i Allah bo kawasa. Kinotaauan domandon monimu kon ki Yesus tuata inta minayá in ḻipu-ḻipúannea bo nogaid kon inta mopia poḷat nongundam kon bayongan in intau inta kinawasa in Ibilis, sin ki Allah in umuran kotaki-takin-Nea.

OUMAN IN RASUL MITA 15:23

Takin totabá mita monia tua mosia nokidia in surat inta nanaa in bonunea, “Horomat kon bayongan utat inta nongkon ḻipú mita inta deeman Yahudi inta nogutun kon Antiokhia, Siria bo Kilikia. Bo horomat doman nami, rasul mita bo itoi in jamaat takin bayongan in jamaat kon Yerusalem.

OUMAN IN RASUL MITA 15:41

Mosia in minayá noḻibu kon Siria bo Kilikia; kon tua mosia umuran moginropotmai kon gina in bayongan intau inta mopirisaya kon i Tuhan Yesus.

OUMAN IN RASUL MITA 28:9

Naonda in dinongogdon in intau mita kon tua in onu inta ain nobaḻí tatua dá namangoidon in intau mita bo nodia kon intau mita inta notakit kon pulau tatua. Bo mosia komintan inundaman.

OUMAN IN RASUL MITA 8:7

Sin inontongdon monia tontaní in dimukud mita moraat iḷumuai nongkon intau inta sinoḷangannea tatua takin kumarak. Ná doman tua, nobayong doman totok in intau inta ḻempeng bo intau mita pelong in nopia.

YOSUA 6:27

Ki Tuhan umuran kotaki-takin i Yosua, bo tangoi i Yosua kino tango-tangoiandon kon butá tatua.