MATIUS 25:31 - Alkitab Singog In Mongondow Masa In Tanaa

³¹ “Aka ki Adí Intau mamangoi saḷaku Datu bo sinakinan in malaekat mita, yo Sia in ḻimitú kon tampat pomarentaan-Nea.

MATIUS 25:31 ပူးပေါင်းရင်းမြစ်များ

MAZMUR 9:7

Musung nami in nodaitdon iyopú, kotá mita monia irimumud-Mu; diádon in monorop bui kon tua.

ZAKHARIA 14:5

Moiko in moḷaguibí mongin ḷopá inta nomotak kon tombuḷud tatua nobaḻí doyowa. Moiko in moḷaguibí ná mogoguyangmu kon tungkuḷ in ḻinug kon dodai in ki Uzia datu in Yohuda. Bo namangoidon in ki Tuhan Allahku, sinakinan in bayongan in malaekat.

MATIUS 16:27

Diádon moonggot bo ki Adí Intau takin malaekat-Nea mita in mamangoi takin kawasa i Amá-Nea. Kon dodai intuata Sia motuḻidon kon pomuḷoi in intau podudui in oaidnea.

MATIUS 19:28

Guman i Yesus kon i monia, “Popirisayadon: Kon Dunia Mobagu i Allah, Adí Intau in ḻimitúdon kon tampat pomomarentaan-Nea inta momulia. Kon wakutu intua moiko murí-Ku mita in ḻimitú doman kon ḻimonik in mopuḷú bodoyowá in tampat pomomarentaan bo mohakim kon mopuḷú doman bodoyowá nosuku kon Israel!

MATIUS 25:6

Naonda in noonggotdon kon doḷom dinongogmai oyúon in singog noguman nanaa, ‘Nonikaan niondon! Tontomudon in sia!’

MATIUS 26:64

Ki Yesus nogabat, “Natuata in gumanmu. Táe pirisayadon: pinangkoidon kon tanaa mako, moiko in mokoontong kon i Adí Intau in ḻimitú kon dotá in koḷanan i Inta Totok in Mokawasa bo mamangoi mongin ḻimonik in goḷom mita kon ḷangit!”

MARKUS 14:62

Tubag i Yesus, “Akuoi in Sia tua, bo moiko komintan in mokoontongbí kon i Adí Intau ḻimitú kon dotá in koḷanan i Allah Inta Totok in mokawasa bo mamangoi mongin goḷom kon ḷangit!”

MARKUS 8:38

Sin ki inekabí in mooyá popisí Akuoi bo popisí in singog-Ku kon yua-yuak in intau mita inta diá mosatia bo binaradosa naa, yo ki Adí intau mooyá doman popisí in intau tatua aka Sia mamangoidon bui kon bonu in kamuliaan i Amá-Nea takin malaekat mita mokudus.”

LUKAS 22:69

Táe bá poguman-Kudon kon i monimu, kon tanaa mako, ki Adí Intau in ḻimitú bidon mako kon dotá in koḷanan i Allah Inta Mokawasa.”

LUKAS 9:26

Sin intau inta mooyá in mongaku kon sia tua in dumodudui-Ku bo mooyá in mogaid kon onu inta ain sinundú-Ku, yo ki Adí Intau mooyá doman in mongaku kon sia in dumodudui-Ku kon wakutu in moiangoi in Sia takin kawasa-Nea bo kawasa i Amá bo in malaekat mita inta motusi!

YOHANES 1:51

Ki Yesus noguman doman, “Totuu, popirisayadon! Iko mokoontongbí kon ḷangit mobukat bo malaekat mita i Allah moponik-moponag mamangoi kon i Adí Intau.”

OUMAN IN RASUL MITA 1:11

bo noguman kon i monia, “Ei, intau mita in Galilea, nongonu sin moiko in simindogbí mako kon nion bo ḷumangag mako kon ḷangit? Ki Yesus inta inontong monimu nobingkat namonik in soroga tua in mamangoibí bui. Bo koangoi-Nea bui in notongkaibí ná inta inontong monimu tanaa.”

TESALONIKA 1 3:13

Aka natua yo irigonan i Tuhan in gina monimu, sahingga in modaritdon totok in kobobiag monimu bo diá bidon in inta diá mopia in aidan monimu kon tayowon i Allah, ki Amá naton, kon wakutu in ki Tuhan naton ki Yesus mamangoi bui moyotakin in bayongan intau inta ain nobaḻí umat-Nea.

TESALONIKA 1 4:16

Bambí itoi in malaekat mobaḷu bo torompet i Allah in irupondon saḷaku toḻibag, bain tua bo mamangoi in ki Tuhan Yesus nongkon soroga. Bo intau mita inta mopirisaya kon i-Nia inta ain minatoi in biagondon muna.

IBRANI 1:8

Táe ki Allah in noguman kon i Adí-Nea nanaa: “Ḷoḻitúan pomomarentaan-Mu, umuranbí mononoi! Moadil totok in pomomarenta-Mu.

IBRANI 9:28

Natua doman in ki Kristus, tongábí komintan pinosumba saḷaku kuruban pinotobut kon dosa in intau mobayong. Sia in mamangoipabí bui, táe deeman bidon mamangoi mogimpaḷut kon persoalan dosa, táe dongka bidon moposaḷamat kon intau mita inta mogoḷat mako kon koangoian-Nea bui.

YUDAS 1:14

Ki Henokh, buí impitunea nongkon i Adam, tungkuḷ intua nokoimontan doman in nopotaau in koyow i Allah soaḷ intau mita tatua. Ki Henokh in noguman nanaa, “Indoiai, ki Tuhan in mamangoi takin ribuan malaekat-Nea mita inta mokudus

WAHYU 1:7

Indoiai, Sia in mamangoi inoḻiungan in goḷom! Bayongan intau mokoontongbí kon i-Nia, noitakin doman in mosia inta nonakuḷ kon i-Nia. Bayongan in intau kon dunia naa komintanbí mogamui lantaran Sia. Nopasti bidon intua! Amin!

WAHYU 20:11

Nopaḷut mako kon tua, akuoi in nokoontong kon tobatú tampat pomomarentaan inta nobudó bo inta noḷoben bo Sia in iḻimitú kon tua. Ḷangit bo butá noinggamá nongkon tayowon-Nea, sahingga in diádon bui koontongan.

WAHYU 3:21

Mosia inta mountung, ogoi-Ku ḻimitú takin-Ku kon tampat pomomarentaan-Ku, notongkai doman ná Akuoi inta ain nountung bo tanaa mako in iḻimitú noyotakin i Amá-Ku kon tampat pomomarentaan-Nea.

SAMUEL 1 2:10

Musung mita i Tuhan in morimumud motontopong, mosia in moondok; nongkon ḷangit in Sia monggotup. Ki Tuhan in mohakim kon bayongan in dunia naa, bo mobogoi in kawasa inta momulia kon i datu inta piniḻí-Nea.”