MATIUS 21:35 - Alkitab Singog In Mongondow Masa In Tanaa

³⁵ Táe mototomoyó mita kon gobá tatua nodomok kon bobantung mita inta pinotabá i togi gobá. Tobatú in binongkug monia, bo tobatú doman iḻimod monia, yo ibanea mako in sinoko-arab in batu.

MATIUS 21:35 ပူးပေါင်းရင်းမြစ်များ

DATU MITA IMITÁNEA 18:13

Degá diápa kinodongogan i Amá kon tungkuḷ in ki Izebel noḻimod kon nabi mita i Tuhan, yo 100 nongkon i monia in binuniku kon bonu in angob – 50 in intau in kon bonu in angob tobatú – bo nobogoi in kaanon bo inumon?

DATU MITA IMITÁNEA 18:4

Kon dodai in ki Izebel noḻimod kon nabi mita i Tuhan, ki Obaja naa in notuḷung kon mogatut in nabi takin nobuni kon i monia kon bonu in angob – 50 in intau in kon angob tobatú – bo mobogo-bogoi in kaanon kon i monia.)

DATU MITA IMITÁNEA 19:10

Ki Elia notubag, “O Tuhan, Allah Inta Totok in mokawasa, akuoi in umuran mogaid tongábí kon ini-Mu. Táe umat in Israel in iḻimimpat kon dodandian monia takin-Mu. Mosia in nongokai kon mezbah-Mu mita bo noḻimod kon nabi-Mu mita. Dongkadon akuoi in naa, bo tanaa in tayakondon monia ḻimodon in akuoi!”

DATU MITA IMITÁNEA 19:2

Dá ki Izebel in nokidia in habar tanaa kon i Elia, “Igumon mako dewa mita in mohukum, poḷat bo moḻimod kon inakó, aka ikoḷom kon oras ná tanaa akuoi in diá mopoaid kon inimu ná inta pinopoaidmu kon nabi mita in Baal tatua.”

DATU MITA IMITÁNEA 22:24

Dá ki Nabi Zedekia in minayádon dinimiug kon i Mikha bo nonokap kon pogotnea poḷat noguman, “Diábí doman Roho i Tuhan monaḷámai kon inakó bo momaké kon inimu?”

TAWARIKH 2 16:10

Tosingogon i Nabi Hanani tatua nokotorú totok kon i Asa nodapot in pinobonunea kon ponjara in nabi tatua. Kon dodai intua ki Asa in nopororigadon kon tongonumai in rayatnea.

NEHEMIA 9:26

Táe umat-Mu in nomarontak bo diá motoindudui kon ini-Mu, nonaḷámai kon hukum bo atorang-Mu, noḻimod kon nabi mita inta nopotoingat kon i monia, bo inta nopotabá kon i monia mamangoi bui kon ini-Mu, ki Allahnea. Oo Tuhan, pomuḷoi doman mako Iko in singkuḻeon monia,

YEREMIA 2:30

Diábí in mangaḻenea in pohukuman-Ku kon i monimu sin moiko in doíbí motarima kon toboḷow. Ná singa inta koyogot in tumorú, natuata in moiko moḻimod kon nabimu mita.

YEREMIA 26:8

Noḻikat naonda in nopaḷut mako in akuoi nopotaau in bayongan koyow i Tuhan ná inta pinarenta-Nea, dinomok monia in akuoi poḷat nomaḷú “Iko in mustibí matoi!

YEREMIA 37:15

Sinumorú totok in mosia kon inakó, bo nomarenta sinbá bongkugon in akuoi bo kurungon kon baḷoi i Yonatan, momomais in negara. Baḷoi tatua in binaḻídon ponjara.

MATIUS 21:34

Naonda i wakutuneadon mosipú kon bungainea, pinotabánea in bobantungnea mita minayá kon mototomoyónea mita sin mogamá kon silainea.

MATIUS 21:36

Dá ki togi gobá nopotabá bui kon bobantungnea ibanea, moanto-antó nongkon inta muna, táe mosia pinomia doman monia ná yobayat mita monia muna.

MATIUS 5:12

Koḷunganga bo kopiadon in gina monimu, sin moḷoben in mouḻímu kon soroga, sin nabi tungkuḷ intua in pinogutú doman monia natua.”

OUMAN IN RASUL MITA 7:52

Eta oyúon nabi in diá pinogutú in mogoguyangmu mita? Sinbá kotaauan monimu, nodait monia iḻimod in totabá mita i Allah koḻipod, inta namangoi sin mopotaau in koangoian in Simpaḷ i Allah inta totok in mobanar, inta aindon doman irupa-rupamai monimu poḷat iḻimod.

WAHYU 6:9

Noiduduimai kon tua ki Adí in Domba tatua in nomukatdon kon meterai iḻimanea. Bo inontongku kon ḻimonag in meja pototuduan kon sosumba oyúon in dimukud mita in intau inta minatoi iḻimod sin popisí nopotaau in koyow i Allah inta ain pinirisaya monia.