MATIUS 16:18 - Alkitab Singog In Mongondow Masa In Tanaa

¹⁸ Bo Akuoi in moguman doman kon inimu, iko in ki Petrus, kon tudu in batu karang tanaa posindogon-Ku in jamaat-Ku; bo diábí in mokotaḷow umpakabí popatoi!

MATIUS 16:18 ပူးပေါင်းရင်းမြစ်များ

KINOBAḺIAN 22:17

Akuoi mobogoi in barakat kobarongon totok kon inimu bo baḻíon-Ku in buímu moantó naonda bo tundi kon ḷangit bo ná kobayong in bungayon kon bingkí in dagat. Ki adí bo ki ompumu in monaḷowdon kon musung mita monia.

SAMUEL 2 18:4

Bo ki datu in noguman, “Mopia, taaudon kon inimu.” Onda intua sinimindog in sia kon diug in ngara in kotá, bo tontara mita in nopipid iḻumuai kon bonu in paanan-paanannea inta sinilai tumongoribu bo tumogogatut in intau.

AYUB 38:17

Nokoimontandon degá in intau nopoontong kon inimu in ḷoḷuang kon tayowon in dunia in intau minatoi inta sindip totok?

MAZMUR 107:18

Mosia in doídon kon bayongan in kokaanon, singgai kopatoian monia in nodiugdon.

MAZMUR 127:5

Pia in kamang totok in intau inta oyúon in tongkaaḷ piot mita ná tatua! Sia in diábí taḷowon, kon dodai in moyogintayow in musung kon pongadilan.

MAZMUR 129:2

“Akuoi in pinogutú in musung pinangkoi kon nobagupa in akuoi, táe mosia in diábí nokotaḷow kon inakó;

MAZMUR 69:12

Akuoi in nopogidaing in karong nobaḻí tomponuot nonogumatoi, táe sinigid monia in akuoi.

MAZMUR 9:13

Sin kotoropan-Nea in intau inta kinoantugan in roriga bo diábí koḻiongan-Nea in kuani monia; intau inta mogaid kon inta moraat in hukumon-Nea.

AMSAL 24:7

Intau bodok in diábí mokodoḷop kon hikmat. Sia in diábí mokosingog kon onu bo onu aka intau koyogot in mongonguman kon inta moponting.

YESAYA 28:16

Tuamai, ki Tuhan Inta Totok in moḷantud noguman nanaa, “Akuoi in mogukat kon dodoyonan inta moropot bo motorindog kon Sion; batu orotan tobatú inta moḷoben in mangaḻenea inta pinaisan: ‘Ki ine in morigon in pirisayanea, diábí umundok popisí in taḷowon.’

YESAYA 28:6

Ki Tuhan in mobogoibí in aid moadil kon hakim mita, bo barani kon intau mita inta pinoki ḷukadan in kotá bá diá tubuon.

YESAYA 38:10

“Gumanku, bagu notombotak in umur akuoi in mustidon mayá, monimpod kon ki agat in kobiaganku kon dunia in intau minatoi.

YESAYA 54:17

Táe batúan in sonjata inta sinontaḷ sin moḷawang kon inimu, in diábí motuoi. Bo bayongan in inta pinonapud kon bonu in pongadilan in poniatamubí kon diá totuu. Akuoi in mobogoibí in tombuinag kountungan kon mogogundoi-Ku mita,” natuata in singog i Tuhan.

YUNUS 2:6

Akuoi in iḷumanduk noidapot kon apad in tombuḷud, kon dunia inta bonawangnea kinunsían modapot in singgai tumi. Dimukudku in moḷopídon totok kon bonu in awakku, bo kinotoropankudon bo nokuani kon ini-Mu. Dá noiyaputdon in sambayangku kon ini-Mu, kon bonu in Baḷoi-Mu inta mokudus. Bo pinopoponik-Mudon in akuoi nongkon bonu in dagat, o Tuhan Allahku!

MATIUS 10:2

Naa in tangoi monia mopuḷú bodoyowá tua: Ki Simon (inta dinonoi ki Petrus) bo ki Andreas ki utatnea, ki Yakobus ki adí i Zebedeus bo ki Yohanes ki utatnea.

MATIUS 11:23

Bo iko Kapernaum, degá kainimu kamai iko in diaanbí mamonik in ḷangit? Diápa, sedang bo moiko in pogonagbí kon naraka! Sin aka soaḷ mita inta mokoherang inta ain nobaḻí kon yua-yuak monimu bo nobaḻí kon Sodom, yo kotá tatua in umuranpabí oyúon nodapot in masa in naa.”

MATIUS 18:17

Aka sia bo doípa doman mokidongog kon tonggina monia tatua, yo poyaputdon intua komintan kon jamaat. Bo anggapdon in sia naonda bo intau inta diá nonotaau kon i Allah andeka naonda bo intau inta mononagi kon pajak.”

MATIUS 4:18

Kon tungkuḷ in ki Yesus minayá nongin bingkí in Danow Galilea, Sia in nokoontong kon intau taya dua mogutat, ki Simon (inta dinonoi ki Petrus) bo ki Andreas ki utatnea. Tua in tangoi monia. Mosia in koyogot mobukayad kon landará kon danow sin tuabí in oaidan monia, modomok kon toyá.

MATIUS 7:24

“Pomuḷoi in intau inta nokidongog kon singog-Ku bo aidannea intua komintan, yo sia tua in ibarat intau inta mopandoi, inta noposindog in baḷoinea kon tudu in batu.

YOHANES 1:42

Ki Simon dinia i Andreas minayá kon i Yesus. Ki Yesus inimindoi kon i Simon, bo noguman: “Iko ki Simon, ki adí i Yohanes. Iko in tangoiondon ki Kepas.” (Kepas notongkai in Petrus, mangaḻenea buḷud batu.)

OUMAN IN RASUL MITA 2:47

Mosia in umuran modayow kon i Allah. Kobobiag monia in totuu mokosanang kon gina in bayongan intau. Pomuḷoi in singgai tantú dugangan i Tuhan in kobayong monia, intau mita inta posaḷamaton-Nea.

OUMAN IN RASUL MITA 20:28

Manangka intua yo mokopopiadon in moiko bo umuran moḷukad kon awak monimu bo poḷat doman ḷukadai in bayongan umat i Allah inta ain pinosarakan i Allah kon i monimu sinbá ḷukadan. Sin moiko nion ain sinantú in Roho i Allah mobaḻí moḷoḷukad bo mononompia kon umat i Allah inta ain sinobut-Nea in dugú i Adí-Nea tontaní.

OUMAN IN RASUL MITA 8:1

Bo nopia doman gina i Saulus kon pinoḻimodan kon i Stepanus tua. Kon singgaipa doman tatua jamaat kon Yerusalem totokdon in aḷo-aḷowan mako monia bo pogutúon sahingga in bayongan intau inta mopirisaya koḻikud in rasul mita, komintan nongoibaya-bayá mako kon bayongan ḻipú kon Yudea bo kon Samaria.

KORINTUS 1 15:55

“Ei popatoi, kon onda in kinountunganmu? Ei popatoi, kon onda in bisamu?”

GALATIA 2:9

Bo naonda in nokoontong kon totabi inta inogoi i Allah kon i nakó, dá ki Yakobus, ki Petrus, bo ki Yohanes inta nobaḻídon itoi kon jamaat, nopirisayadon kon ki Allahbí in nobogoi oaidan tanaa kon inakó. Sahingga in nodati in mosia kon i naminda i Barnabas saḷaku tanda yoyobayatan. Bo nosatuju bidon in kami kon kami in mayá mopohabar in Habar Mopia kon yua-yuak in intau mita inta deeman Yahudi, bo mosia in mayá kon sigad in intau mita in Yahudi.

EPESUS 3:10

Makusud i Allah tua in bá tanaa mako jamaat-Nea, mopotaau in bayongan yagi-yagi soaḷ kabijaksanaan i Allah kon pomarenta mita bo kon bayongan inta nongawasa kon soroga.

EPESUS 5:32

Modaḷombí totok mangaḻe in tontagá tanaa, makusudnea in hubungan i Kristus bo jamaat.

KOLOSE 1:18

Siata uḷu in awak-Nea, bo awak-Nea tua inta sinangoi jamaat. Sin Siabí tua in pangkoi in kobiagan jamaat tatua. Sia doman tua in Adí guya-guyang, inta muna-munamai biniag bui nongkon kinopatoian, sahingga in Sia nobaḻí totok moponting nongkon bayongan yagi-yagi.

TIMOTIUS 1 3:15

sinbá aka akuoi diápa ḷagi moiangoi, yo kotaauanmudon naonda in kobobiag naton saḷaku ki adí mita i Allah, mangaḻenea kon naa jamaat i Allah inta nobiag. Jamaat tanaa inta nobaḻí oigi pinonuḻid bo dumodudui kon totundú inta totuu nongkon i Allah.

TIMOTIUS 1 3:5

Sin aka intau tatua diá motaau monompia kon tombonu in baḷoinea tontaní, yo naondabí in sia monompia kon jamaat i Allah?

IBRANI 12:28

Tuamai, kita in musti umuran mopoyaput in sukur kon i Allah, sin kita in motarima kon tobatú dodatuan inta diá modandú nongkon i-Nia. Kita in musti mopoyaput in sukur bo moibada kon i Allah takin mohoromat bo moondok, podudui in onu inta kinoibog-Nea tontaní.

WAHYU 11:15

Bo malaekat impitunea in nogirup kon torompetnea, dá kinodongogandon in singog mita inta mongoḷangon totok nongkon soroga noguman, “Kawasa momarenta kon dunia naa, masai naa kinadaiandon i Tuhan naton, bo i Datu mopoposaḷamat inta pinodandi-Nea. Sia bidon in momarenta modapot in mononoi!”

WAHYU 21:14

Dinding in kotá tatua in pinosindog kon tudu in batu mopuḷú bodoyowá. Bo batu mita tatua in sinoko paisan tangoi in rasul mopuḷú bodoyowá. Mosia tua in rasul mita i Adí in Domba tatua.