MATIUS 13:33 - Alkitab Singog In Mongondow Masa In Tanaa

³³ Onda intua ki Yesus nongonguman doman kon poumpamaan nanaa kon i monia. “Aka ki Allah mamangoi momarenta, yo ná umpama ragi inta ginamá in bobay, bo pinobauk kon topong torigu opat nopuḷú noliter nodapot in kinumutad komintan!”

MATIUS 13:33 ပူးပေါင်းရင်းမြစ်များ

KINOBAḺIAN 18:6

Ki Abraham iḻimikat sinumuot kon ḷoḷaigannea bo noguman kon i Sara, “Koḷamemetdon bo pogamá kon topong tokarong inta totok in nopira, bo pogaidaipa kon roti inta noḻimbung.”

SAMUEL 2 13:6

Onda intua nosiug in ki Amnon kon tosiugan naonda bo notakit. Naonda in ki Datu Daud namangoi noindoi kon inia, ki Amnon in noguman kon inia, “Amá, poangoipa in ki Tamar mamangoi sin momia kon kukis kon tayowonku kon naa; bá moibog in akuoi mongaan.”

AYUB 17:9

Intau inta mopia bo inta diá kotaḷá, moyakindon totok kon kobobiagnea mokosanang kon i Allah.

AMSAL 4:18

Daḷan in intau moraat in mosindip ná kon sindip in doḷom. Mosia in moipintud bo moḷabú diá butungonmai monia. Noyotoḻikud kon tua in daḷan inta bayáan in intau mopia in naonda bo kinobukaan in mata in singgai; koonggot-koonggot kobayag-kobayag, modapot in imbuitnea mobayagdon totok.

HOSEA 6:3

Tuamai in koḻigai in kita moḷongasi totu-totuu monotaau kon i Tuhan. Sia in notantúbí kon mamangoi kon i naton naonda bo koangoi in bayag doḷo-doḷom, bo naonda bo uyan inta nomuntad kon butá kon imbuit in pongonguyan.”

MATIUS 13:24

Ki Yesus in bui nongonguman kon i monia, kon tobatú poumpamaan, kai-Nia, “Aka ki Allah momarenta, yo naonda bo intau inta nogambor kon bibit inta mopia kon gobánea.

MARKUS 13:20

Aka kuma bo diádon impoḷokan i Allah i wakutunea tatua, dá diábí in tobatúmai in mosaḷamat. Táe popisídon in umat-Nea, dá impoḷokan i Allah in wakutu-Nea.

LUKAS 13:21

Sia naonda bo ragi inta ginamá in tobatú bobay bo pinobauk kon topong opat nopuḷú noliter, bo kinaui nodapot in kinumutad komintan.”

YOHANES 15:2

Pomuḷoi in tanga kon i-Nakó inta diá momomungai, pongkóon-Nea, bo pomuḷoi in tanga inta momungai, gaatannea in daunnea bo daritan-Nea sinbá modugangdon modatog in bungainea.

GALATIA 5:9

Nanaa kain singog in intau, “Ragi topiḻik nokokutad kon bayongan topong inta pomiaan kukis.”

PILIPI 1:6

Ki Allahbí in nomangkoi kon oaidan mopia tatua kon inimu, bo moyakinbí in akuoi, kon tantú-Neabí ingguputan in oaidan-Nea tatua modapot kon singgai ki Kristus Yesus in mamangoidon bui.

PILIPI 1:9

Naabí in sambayangku kon i monimu: Igumon mako doa, moiko in totu-totuudon motabi kon i Allah bo kon tumpaḷa intau bo umuran doman modugang in pongotahuan monimu kon soaḷ inta mopia bo pororai inta mobijaksana.

PETRUS 2 3:18

Umurandon kobiag in moiko kon bonu in totabi i Tuhan Yesus Kristus, Tuhan bo Mopoposaḷamat naton. Poramuji totok sinbá moiko modugangdon monotaau kon soaḷ Sia. Dinayo-dayowdon in ki Allah nongkon tanaa mako modapot in kopaḷutannea! Amin. Horomat nami, Ki Petrus

HAKIM MITA 6:19

Dá nobuidon in ki Gideon bo nodungú kon bembé batánea tobatú, bo nogamá kon topong mopuḷú nokilo, onda intua nomia kon roti inta diá iragian. Nopaḷut mako kon tua ponoyá tatua binonunea kon karansi, bo tubignea in kon bonu in kuyon, bo bayongan intua dinianea bo inoḷudnea kon malaekat i Tuhan inta nogoḷat mako kon siungon in kayu terpentin tatua.

SAMUEL 1 1:24

Naonda in ki Samuel ginuatdon kon teté, inatod i inánea in sia kon Baḷoi i Tuhan kon Silo. Kon dodai intua nointokpa totok in sia. Ki Hana in nodia domandon kon sapi koḷakian tobatú inta umurdon toḷu notaong, gandum mopuḷú nokilo, bo botutu kuḻit tobatú inta nopuḻing in anggur.