MATIUS 13:19 - Alkitab Singog In Mongondow Masa In Tanaa

¹⁹ Batoḷ inta noḷabú kon daḷan tua mangaḻenea in intau inta nokodongog kon Pirman kon naonda in ki Allah momarenta, táe diá kinomangaḻean monia. Kon tua namangoidon in Ibilis bo nogagow kon inta ain inambor kon bonu in gina monia.

MATIUS 13:19 ပူးပေါင်းရင်းမြစ်များ

AMSAL 1:7

Sinbá mokouḻí kon pongotahuan inta mopia, yo muna-munamai intau in musti mohoromat bo motoguondok kon i Tuhan. Intau bodok in diábí mohoromat kon hikmat bo doí tundúon.

AMSAL 17:16

Diá baraguna in intau bodok mokopodait kon doit motayak kon hikmat, sin sia in diábí koraian inta mosehat.

YEHEZKIEL 31:18

Pangkoi in kayu tatua in nobaḻí tomponuot kon i datu in Mesir bo bangusanea. Diábí in pangkoi in kayu kon Eden inta totok in moḷantud bo momulia. Táe tanaa, naonda bo pangkoi mita in kayu kon Eden doman, pangkoi in kayu tatua in noponag doman kon dunia in intau minatoi bo moyosipun monia inta diá nonotaau kon i Allah bo takin i monia inta minatoi kon pinoparangan. Akuoi, ki Tuhan Inta Totok in moḷantud ain nosingog.”

MATIUS 12:26

Ná doman tua aka Ibilis moguntun kon Ibilis; yo sia in diádon notobatú, bo sia in nomaḷawang domandon kon inia tontaní, aka natua, yo naondabí in mononoi in dodatuannea tatua.

MATIUS 13:20

Yo aka batoḷ inta noḷabú kon sigad in butá inta mobarong in batu, tua in mangaḻenea, intau inta nokodongog kon pirman tatua, bo baḷunea sinarima takin pia in gina.

MATIUS 13:38

Gobá tua in dunia. Bibit tatua in intau mita inta ain nobaḻí umat i Allah. Yo padang tatua in intau mita inta diá mopia.

MATIUS 4:23

Ki Yesus minaya-mayá mako in bayongan ḻipú kon Galilea. Sia in sinumuot bo notundú kon bonu in baḷoi pososambayangan poḷat nopotaau in Habar Mopia soaḷ naonda in ki Allah mamangoi momarenta saḷaku Datu. Kon tua Sia nongundam doman kon bayongan panyaki in intau mita inta kon tua.

MATIUS 5:37

Aka totuu, yo poguman kon ‘totuu’, bo aka diá, yo poguman doman ‘diá’ – sin onu in noiḻiu kon tua yo nongkon inta moraatbí.”

MARKUS 4:15

Bibit inta noḷabú kon daḷan in ibarat intau inta nokodongog kon habar soaḷ naonda in ki Allah momarenta. Naonda in sia nokodongog, Ibilis namangoi bo nogamá kon onu inta ain pinomuḷa kon bonu in ginanea.

LUKAS 10:9

Tuḷungai bo undamai in intau mita inta notakit kon kotá tatua bo poguman kon intau mita kon tua, ‘Ki Allah in mamangoidon momarenta saḷaku Datu kon yua-yuak monimu.’

LUKAS 9:2

Onda intua nopotabá kon i monia minayá nopotaa-taau mako in Habar Mopia kon naonda in ki Allah mamangoi momarenta saḷaku Datu poḷat mongundam kon intau mita inta notakit.

YOHANES 8:43

Nongonu sin diábí komangaḻean monimu in onu in pinoguman-Ku? Popisíbí in moiko diá mokotahang in mokodongog kon totundú-Ku.

OUMAN IN RASUL MITA 17:32

Naonda intau mita tatua nokodongog kon inta pinoguman i Paulus soaḷ mobiag bui naonda in matoi, oyúon in kon sigad monia in kinumosing. Oyúon doman in noguman, “Kami in moibogpa bui mokidongog kon inimu mosingog kon soaḷ natua.”

OUMAN IN RASUL MITA 18:15

Táe naa bo tongábí bobayowan kon soaḷ onu in sinundú andeka hukum agama inta pinaké kon sigad monimu, dá tua in urusanbí monimu tontaní, akuoi in doíbí mobaḻí hakim kon soaḷ mita natua!”

OUMAN IN RASUL MITA 20:25

Bo tanaa in kinotaauanku bidon kon kita in diá bidon moyodungkuḷ bui. Moiko komintan aindon binayáanku pinopoyaputan in Habar kon naonda in ki Allah momarenta saḷaku Datu.

OUMAN IN RASUL MITA 28:23

Dá mosia bo ki Paulus in nonantú kon tobatú singgai poyodungkuḷan monia. Bo kon singgai inta ain sinantú tatua nobayongdon intau in namangoi kon baḷoi inta pinogutunan i Paulus. Bo nongkon doḷo-doḷompa dapot in ḷoḷabungnea ki Paulus noginsilang bo nopotaau kon i monia soaḷ naonda in ki Allah momarenta saḷaku Datu. Sia in nobaca kon tontagá inta pinais kon buk i Musa, bo buk i nabi mita sinbá mosia in mopirisayadon kon i Yesus inta ain pinotaa-taaunea mako tua.

SURAT I PAULUS KON JAMAAT RUM 1:28

Bo lantaran irasa in intau kon diábí paraḷu in mosia monotaau kon i Allah, dá pinomayá bidon mako i Allah in kogoguyaatan in raian monia, sahingga in nogaidon mosia kon soaḷ mita inta pinoton aidan.

SURAT I PAULUS KON JAMAAT RUM 14:17

Sin aka ki Allah in momarenta kon kobiagan intau, yo soaḷ onu in motaau kaanon ande inumonnea, tua in diábí moponting. Inta moponting in soaḷbí intau inta dumudui kon onu in kinoibog i Allah in mokorasabí kon moonow in gina bo motarima kon kasanangan gina inta inogoi in Roho i Allah, tua in moponting.

SURAT I PAULUS KON JAMAAT RUM 2:8

Táe intau inta tongá morai kon kopontingannea tontaní bo diá doman motoindudui kon i Allah, bo tongá doman umuran dumudui kon inta moraat, intau mita natua in kosakibí totok in gina i Allah.

EPESUS 3:8

Kon sigad in bayongan umat i Allah, yo akuoibí naa in totok in mokooyá. Táe ki Allah ain noponotabi in oaidan tanaa kon inakó; oaidan mopoyaput in Habar Mopia soaḷ kaoyúonan i Kristus inta diá modai-dait;

TESALONIKA 2 2:12

Pangabisannea bayongan in intau inta moibog mogaid kon dosa bo inta diá mopirisaya kon inta totuu bo tongá moibog kon inta moraat in daiton toko hukumon.

IBRANI 2:1

Manangka intua, mustidon totu-totuu in kita kumadai kon totundú mita inta ain dinongog naton, sinbá diá mobaḷui in pirisaya naton.

YOHANES 1 3:12

Donaaibí in kita ná ki Kain, inta nobaḻí ki adí in Ibilis bo noḻimodon kon i utatnea tontaní. Nongonu sin ki Kain in noḻimodbí kon i utatnea? Popisíbí in soaḷ mita inta pinomianea in nongoitaḷá, táe soaḷ mita inta pinomia i ai-ainea in noitutui.

YOHANES 1 5:18

Kinotaauan naton kon bayongan intau inta ain nobaḻí ki adí mita i Allah, in diábí umuran mogaid kon dosa, sin ki Adí i Allah in umuran moḷukad kon inia, bo ki Inta Moraat in diá mokopongonu kon inia.

YOHANES 1 5:20

Kinotaauan bidon naton kon ki Adí i Allah ain namangoi bo ain nobogoi in pongortian kon i naton, sinbá kotaauan naton in ki Allah inta mobanar. Kita in nobiag notobatú takin i Allah inta mobanar bo umuran nobiag notobatú takin i Adí-Nea ki Yesus Kristus. Naadon in ki Allah inta mobanar, bo naadon in kobiagan inta mopia bo mononoi.