MATIUS 10:38 - Alkitab Singog In Mongondow Masa In Tanaa

³⁸ Bo ki ine in doí momotaan kon kayu pinoyotaḻempang bo dumudui kon i-Nakó, sia doman tua in diábí patus mobaḻí dumodudui-Ku.

MATIUS 10:38 ပူးပေါင်းရင်းမြစ်များ

MATIUS 16:24

Bo ki Yesus in noguman kon murí-Nea mita, “Pomuḷoi intau inta moibog dumudui kon i-Nakó, sia in musti monaḷámai kon oaidannea tontaní bo momotaan kon roriganea, bo dumudui kon i-Nakó.

MATIUS 27:32

Naonda in mosia kon ḷuai in kotá, mosia noyodungkuḷ in tobatú intau inta nongkon Kirene ki Simon in tangoinea. Pinakisa monia in intau tatua pinoki potaanan in kayu pinoyotaḻempang inta popopakúan kon i Yesus.

MARKUS 10:21

Dá ki Yesus inimindoi kon intau tatua takin tabi bo noguman nanaa, “Dongkadon tobatú in paraḷumu aidan. Bayádon potaḷui in bayongan kapunyaanmu; bo ogoi kon intau nobogá in boḻinea tatua, dá mokouḻídon iko kon kapunyaan kon soroga. Onda intua angoidon dudui kon i-Nakó.”

MARKUS 8:34

Onda intua ki Yesus nogoiní kon intau moantó inta noyotakin murí-Nea mita bo noguman kon i monia, “Intau inta moibog dumudui kon i-Nakó musti ḻiongonnea in kopontingannea tontaní bo momotaan kon kayu pinoyotaḻempang bo umuran dumudui kon i-Nakó.

LUKAS 14:27

Intau inta doí momotaan kon kayu pinoyotaḻempang bo dumudui kon i-Nakó, sia tua in diábí motaau mobaḻí dumodudui-Ku.

YOHANES 19:17

Ki Yesus iḷumuai takin kopota-potaan in kayu pinoyotaḻempang popopakúan kon i-Nia bo nopobayá in tampat inta sinangoian “Tampat in Ḷungkaká”. (Kon bonu in bahasa Ibrani sinangoian Joljuta.)