MATIUS 1:12 - Alkitab Singog In Mongondow Masa In Tanaa

^12-16 Mosia nobiag kon wakutu in hukum kon Babel. Nongkon masa inta bayongan intau Israel iḷumbú kon Babel noidapot i masa kinolahiran i Yesus tanaa in tangoi mita inta pinais: Ki adí Yekhonya ki Sealtiel, ki adí i Sealtiel ki Zerubabel, ki adí i Zerubabel ki Abihud, ki adí i Abihud ki Elyakim, ki adí i Elyakim ki Azur, ki adí i Azur ki Sadok, ki adí i Sadok ki Akhin, ki adí i Akhin ki Elihud, ki adí i Elihud ki Eleazer, ki adí i Eleazer ki Matan, ki adí i Matan ki Yakub, ki adí i Yakub ki Yusup ki buḷoi i Maria. Bo ki Maria tuata inta nopononggadí kon i Yesus inta sinangoi ki Kristus.

MATIUS 1:12 ပူးပေါင်းရင်းမြစ်များ

DATU MITA 2 24:14

Ki Datu Yoyakhin, ki inánea, ki buḷoinea mita, pogawainea mita, bo itoi mita in Yohuda – kobayong monia komintan in 7.000 in intau inta ihoromat – dinomok bo dinia pinobayá in Babel. Noitakin doman in intau mita inta mopandoi mogaid bo mononontaḷ kobayongnea in 1.000 in intau, komintanbí intau mita inta moropot bo inta mongobarani moparang. Intau mita buí in datu, bo intau mita inta ihoromat in dinia doman minayá in pinoḷumbúan – kobayong monia tua in 10.000 in intau. Gogió bo bayongan in intau inta nogutun kon Yerusalem in dinia; inta kinotaḷáan in dongkadon rayat inta nobiag nobogá totok.

DATU MITA 2 25:27

Kon singgai nogindoyowa nopuḷú bo pitu kon buḷan impuḷú bodoyowá kon taong intoḷu nopuḷú bo pitu naonda in ki Yoyakhin dinia kon pinoḷumbúan, ki Ewil-Merodakh in nobaḻí datu in Babel. Kon taong tatua doman pinoontongneadon in tabinea kon i Yoyakhin, bo pinoḷuaineadon kon ponjara,

TAWARIKH 1 3:17

Naadon in buí i Yoyakhin, datu inta dinomok in intau in Babel kon parang. Ki adínea ḷoḷaki in taya pitu: ki Sealtiel,

EZRA 3:2

bo ki Yesua ki adí i Yozadak takin totakinnea imang mita bo ki Zerubabel ki adí i Sealtiel takin ginaḷumnea, noposindog bui in mezbah i Allah in Israel. Dá notaaudon in mosia motubá kon kuruban kon tudunea, podudui ná inta topotundú mita inta pinais kon bonu in hukum i Musa, mogogundoi i Allah.

EZRA 5:2

Nokodongogmai kon koyow in nabi doyowa tatua, ki Zerubabel ki adí i Sealtiel bo ki Yesua ki adí i Yozadak ḷagidon nomangkoi bui noposindog in Baḷoi Tuhan kon Yerusalem, binantungan in nabi doyowa tatua.

NEHEMIA 12:1

Naa in tangoi mita in imang mita bo intau mita in Lewi inta nobui nongkon pinoḷumbúan noyotakin i Zerubabel ki adí i Sealtiel bo i Imang Moḷoben ki Yesua:

YEREMIA 22:24

Ki Tuhan in noguman kon i Datu Yoyakhin, ki adí ḷoḷaki i Yoyakin datu in Yohuda, “Podoyon kon i-Nakó, Allah inta nobiag, poguman-Ku kon umpaka iko nion aka kon i-Nakó naonda bo sising meterai kon ḻima koḷanan-Ku, táe iko in rabuton-Kubí

YEREMIA 22:28

Akuoi ki Yeremia in noguman, “Degá ki Datu Yoyakhin in nobaḻídon naonda bo kuyon noḷosi inta iḷumbú bo kinodoídon? Tua degá in mangaḻenea kon sia bo ki adínea mita in untunon bo ḷumbúon kon butá inta diá kinotaauan monia?”

YEREMIA 22:30

“Intau tatua ain sinantú kon kobuḻian in adínea mita bo umuran mosisí in kon kobiagannea. Nongkon buínea diábí in mokodapot kon inta mopia in kon bonu in pomarentaan kon Yohuda saḷaku datu buí i Daud. Akuoi ki Tuhan, ain nosingog.”

HAGAI 1:1

Kon taong induanea kon pinomarentaan i Datu Darius kon Persia, kon singgai imitánea kon buḷan noginggonom, ki Tuhan in nosingog pinongin i Nabi Hagai. Koyow i Tuhan tatua inogoi kon i Zerubabel ki adí i Sealtiel, gubernur in Yohuda, bo kon i Imang moḷoben Ki Yosua ki adí i Yozadak.

HAGAI 1:12

Onda intua ki Zerubabel bo ki Yosua takin bayongan umat in Israel inta ain nobui kon pinoḷumbúan kon Babel, in dinumudui kon tosingogon mita i Hagai, totabá i Tuhan tua. Mosia in nogaid kon onu inta pinarenta i Tuhan kon i monia, popisí in moondok kon i Tuhan.

HAGAI 1:14

Natuata in aid i Tuhan nobogoi in ibog kon i Gubernur Zerubabel, kon i Imang Moḷoben ki Yosua takin bayongan in intau inta ain nobui nongkon pinoḷumbúan, sinbá mosia komintan in mogaid moposindog bui in Baḷoi i Tuhan Inta Totok in mokawasa, ki Allah monia.

HAGAI 2:2

Ki Tuhan in nopotabá kon i Hagai noyosingog i Gubernur Zerubabel, i Imang Moḷoben ki Yosua, takin rayat sin mopotaau in koyow tanaa,

HAGAI 2:23

Kon singgai tatua iko Zerubabel, mogogundoi-Ku, in baḻíon-Ku pomarenta podoyon kon tangoi-Ku. Sin ikobí inta ain piniḻí-Ku.” Ki Tuhan Inta Totok in Mokawasa ain nosingog.

MATIUS 1:17

Koantónea komintan pinangkoi kon i Abraham noidapot kon i Daud, mopuḷú bo opat nopobuían, bo pinangkoi nongkon i Daud noidapot in dinia kon Babel mopuḷú bo opat doman nopobuían, natua doman nongkon Babel noidapot kon i Kristus mopuḷú bo opat doman nopobuían.

LUKAS 3:27

inta ki adí i Yohanan, ki adí i Resa, inta ki adí i Zerubabel, adí i Sealtiel, inta ki adí i Neri,