KORINTUS 1 9:16 - Alkitab Singog In Mongondow Masa In Tanaa

¹⁶ Sin akuoi in mopoyaput in Habar Mopia, deemanbí tongá mokikoontong kon intau. Táe ki Allahbí in nopotabá kon i nakó. Tuamai baradosaanbí in akuoi aka diá popoyaputku in Habar Mopia tatua!

KORINTUS 1 9:16 ပူးပေါင်းရင်းမြစ်များ

YESAYA 6:5

Bo akuoi in noguman, “Mobodito! Diádon in kamang kon inakó, sin bibigku in nokotor popisí in dosa, bo akuoi in nogutun kon sigad in bangusa inta natua doman. Umpaka natua, takin mataku tontaní akuoi ain nokoontong kon i Datu, ki Tuhan Inta Totok in mokawasa!”

YEREMIA 1:17

Posadiadon, Yeremia! Bayádon bo potaaudon kon i monia, bayongan inta pinoki aid-Ku kon inimu. Dika moondok kon i monia, sinbá diá baḻíon-Ku in iko totok in moondok aka moyogintayowan mako monia.

YEREMIA 20:7

Tuhan, Iko in nodondouḷug kon inakó bo akuoi in kinodondouḷugandon. Iko in moropo-ropot in akuoi bo nopokuyungdon kon inakó. Akuoi in irupa-rupamai in bayongan intau, siningkuḻe nongkon doḷo-doḷom dapot in ḷoḷabungnea.

YEREMIA 20:9

Táe aka kon bonu in ginaku akuoi in moguman, “Biódon mako ki Tuhan in ḻiongonkudon, doídon in akuoi mosingog podoyon kon tangoi-Nea,” dá koyowmu in naonda bo tuḷú inta moborambang kon bonu in dodobku. Aindon sinungkuḷanku pinondam, táe diá mokoigon in akuoi.

AMOS 3:8

Aka singa bo moganggor, yo ki inebí in diá moondok? Aka ki Tuhan Inta totok in moḷantud bo mosingog, yo ki inebí in tongá kibio-biómai bo diá mopotaau-taau mako in koyow-Nea?

AMOS 7:15

Táe ki Tuhan in nogamá kon inakó nongkon pogogaidanku, bo nopotabá kon inakó nopotaau in koyow-Nea kon intau in Israel.

MATIUS 25:16

Simpaḷ inta notarima kon ḻima noribu tua minayá, bo nopobaraguna in doit inta inogoi tatua dá nokouḻí in sia kon ḻima doman noribu bui.

LUKAS 9:62

Táe ki Yesus in notubag, “Pomuḷoi in intau inta momangkoidon momajeko, bo mobobuipa ná tumi, yo sia tua in diábí patus mobaḻí umat i Allah.”

OUMAN IN RASUL MITA 4:20

Sin diábí motaau in kami in mogogai mopotaau kon onu inta ain inontong bo dinongog nami tontaní.”

OUMAN IN RASUL MITA 9:15

Táe ki Tuhan in noguman kon i Ananias, “Bayádon! Sin sia tua ain bidon piniḻí-Ku mobantung kon i-Nakó mopotaa-taau mako in Habar Mopia soaḷ Akuoi kon bangusa mita ibanea inta deeman intau in Yahudi bo kon datu mita bo kon intau mita in Israel.

OUMAN IN RASUL MITA 9:6

Táe tanaa mako in poguman-Ku kon inimu pobangondon bo tuotdon in kotá. Bain kon tua bo poguman-Ku kon inimu mongo onu in pokiaid-Ku kon inimu.”

SURAT I PAULUS KON JAMAAT RUM 1:14

Sin tuabí in musti aidanku kon bayongan in bangusa: intau nomangarti andeka inta diápa nomangarti, inta nosikoḷa andeka inta diápa nosikoḷa.

SURAT I PAULUS KON JAMAAT RUM 15:17

Popisí in akuoi bo ain notobatú i Kristus Yesus, dá mosanangdon totok in ginaku, sin motaaudon in akuoi mogaid kon oaidan tatua kon i Allah.

SURAT I PAULUS KON JAMAAT RUM 4:2

Aka soaḷ mita inta inaidannea tatua bo nobaḻí dodoyonan pinotarimaan i Allah kon inia saḷaku intau inta mokosanang kon gina-Nea, dá oyúon doman in dodoyonannea dumodia. Táe sia in diábí motaau dumodia kon tayowon i Allah.

KORINTUS 1 4:15

Umpaka ribuandon intau in Keresten guru monimu, táe kon bonu in pirisaya monimu kon i Kristus, tongábí akuoi in nobaḻí ki amá monimu sin akuoibí naa in nopoyaput in Habar Mopia kon i monimu nodapot in nopirisayadon moiko kon i Kristus.

KORINTUS 1 9:12

Ka intaupa ibanea in motaau moigum kon onukadon kon i monimu, yo apa doman in kami naa, táe doíbí in akuoi? Maníka bo tanggungonkudon tontaní in yagi-yagi dika in oyúon in mobaḻí ḷabot kon popoyaputanku in Habar Mopia soaḷ ki Kristus.

KORINTUS 1 9:14

Ná doman tua ain bidon sinantú i Tuhan kon intau inta mopoyaput in Habar Mopia nongkon i Tuhan, in musti mokouḻí kon barakat nongkon oaidannea tatua.

KORINTUS 2 2:12

Kon wakutu in noiyaputdon kon Troas sin makusud mopoyaput in Habar Mopia soaḷ ki Kristus, akuoi in inogoian i Tuhan in daḷan mogaid kon tua.

KOLOSE 4:17

Bo potaaudon kon i Arkhipus in naa, “Iḷapataidon kopiraan in oaidan inta pinoki aid i Tuhan kon inimu sin mobantung kon i Tuhan.”

SAMUEL 1 12:23

Soaḷ akuoi, poigumon mako akuoi in diá modapot in mogaid kon dosa kon i Tuhan sin diádon nosambayang kon kopontingan monimu. Táe akuoi in umuranbí motundú kon inimu kon soaḷ mita inta mopia bo inta noitutui.