KORINTUS 1 4:6 - Alkitab Singog In Mongondow Masa In Tanaa

⁶ Utatku mita! Onu inta mopia, nodaitdon inaidan naminda i Apolos kon i monimu. Makusudnea kon tua, onu inta inontongdon monimu kon inaminda motaau monimu balajaron mangaḻe in singog tanaa, “Tantú kumadai kon atorang inta oyúon.” Aka natua yo diábí in intau in dumodia bo mopohinamai kon intau ibanea.

KORINTUS 1 4:6 ပူးပေါင်းရင်းမြစ်များ

MAZMUR 146:3

Dikadon mongamang kon mongongawasa, kon intau inta diá mokoposaḷamat.

MAZMUR 8:4

Aka indoianku in ḷangit inta pinomia-Mu, buḷan bo tundi inta pinoukat-Mu,

YESAYA 2:22

Dá, dikabí umandoḷ kon intau inta mato-matoi naa, sin sia in diábí in mangaḻenea.

OUMAN IN RASUL MITA 18:24

Wakutu intua, noiangoi domandon kon Epesus in tobatú intau in Yahudi inta nongkon Aleksandria, ki Apolos in tangoinea. Sia naa in intau inta totok mopandoi mosingog bo totok in nonotaau kon bonu in Buk Motusi,

OUMAN IN RASUL MITA 19:1

Wakutu in ki Apolos kon Korintuspa, ki Paulus in koyogot domandon minaya-mayá mako in ḻipu-ḻipúannea inta totok nongoyayú kon daerah tatua bo sia in noiyaputdon kon Epesus. Kon tua noyodungkuḷ in sia in tongonumai intau inta nopirisayadon kon i Yesus.

SURAT I PAULUS KON JAMAAT RUM 12:3

Ki Allah in nobogoidon in totabi-Nea kon i-Nakó. Manangka intua utat mita akuoi in mononggina kon i monimu nanaa: Donaaibí in moiko morasa kon lebedon moḷantud nongkon kaadaanmu sabanarnea. Táe naa in aidai: mokopoompá kon raian bo nilaidon in kaadaan monimu tontaní. Nilai in kaadaan monimu tontaní podudui in komampuan inta inogoi i Allah kon inia, sin sia in mopirisaya kon i Yesus.

KORINTUS 1 1:12

Nanaa in makusudku, kon sigad monimu oyúon in noguman, “Akuoi in dumoduduibí i Paulus,” bo oyúon doman in moguman, “Akuoi in dumoduduibí i Apolos,” bo ibanea doman in moguman, “Akuoi in dumoduduibí i Petrus,” bo ibanea mako in moguman kon, “Akuoi naa in dumoduduibí i Kristus.”

KORINTUS 1 1:19

Sin kon bonu in Buk Motusi, ki Allah in noguman nanaa, “Poyayingon-Ku in kapandoian intau mita inta mongopandoi, bo onu in kinotaauan in intau mita inta norosikoḷa, daiton-Ku popoḻiong.”

KORINTUS 1 1:31

Nanaa in pinais kon Buk Motusi, “Intau inta moibog dumodia, maníka in sia dumodia kon onu inta aindon inaidan i Tuhan.”

KORINTUS 1 13:4

Intau inta motabi kon tumpaḷa intau, monahangbí kon yagi-yagi bo mopia in gina. Diá in porasaan mointoi, diá kumaḷakuang bo diá doman mododia.

KORINTUS 1 3:19

Sin kabijaksanaan in intau kon dunia naa diábí in baraguna kon i Allah. Kon bonu in Buk Motusi in pinais nanaa, “Ki Allah in mojebak kon intau mita inta mongobijaksana podudui in pandoinea tontaní.”

KORINTUS 1 3:21

Tuamai in dikabí moduí kon intau, sin bayongan yagi-yagi in nodait bidon inogoi kon i monimu.

KORINTUS 1 5:2

Umpaka nogaidon kon natua, táe umuranpabí doman in moiko dumodia. Sabanarnea in bá moajarbí in gina monimu, bo poḷatdon poḷuai in intau natua nongkon sigad monimu.

KORINTUS 1 5:6

Moiko in diábí motaau in dumodia. Dinongogdon monimu degá in singog nanaa, “Ragi topiḻik mokokutad kon bayongan topong aidan kukis!”

KORINTUS 1 8:1

Yo tanaa in soaḷ kaanon inta inogoi saḷaku sosumba kon berhala. Oo, totuubí in kain intau, “Kita in komintan bidon nongopandoi.” Táe pandoi tatua in nokopobaḻídon kon intau mokaḷakuang, táe aka tabi, yo mokobiag kon intau.

KORINTUS 1 9:23

Tongábí bá moiyaput in Habar Mopia nongkon i Allah kon bayongan intau, dá inaidanku intua komintan, sinbá moitakin doman mokouḻí kon barakat in akuoi.

KORINTUS 2 10:12

Oo! Totuubí kon kami in diábí mokobaḻí mopoyobanding ande mokipotongkai kon intau mita inta norai kon mosia tua in moḷantu-ḷantud. Nobodok totok in mosia! Mosia in mogaid kon ukuran monia tontaní bo ponilai kon i monia tontaní podudui in ukuran inta inaidan monia tua.

KORINTUS 2 10:15

Kami in diábí dumuí tontaní sin oaidan in intau ibanea inta ain noiḻimpat kon sigad inta ain sinantú i Allah kon i nami. Táe kami in tantú mogaid kon bonu in sigad inta ain sinantú i Allah kon i nami, bo kami tantú moharap mako kon bá umuran modugang in pirisaya monimu kon i Kristus. Sinbá kami in motaau mogaid kon oaidan inta moiḻiu kon oaidan mita tatua kon sigad monimu.

KORINTUS 2 10:7

Indoiaidon kopira onu inta nobaḻí kon tayowonmai monimu nion. Aka oyúon intau in moyakindon totu-totuu kon sia tua in kapunyaan i Kristus, yo musti in sia morai kon bonu in ginanea kon kami doman naa in kapunyaanbí doman i Kristus, naonda bo sia.

KORINTUS 2 11:4

Sin tarukiraankumai moiko in tongábí kibio-biómai aka oyúon in intau mamangoi bo mopotaau in habar soaḷ ki Yesus, táe ki Yesusbí tolaeng, deemanbí ki Yesus inta ain pinotaau muna nami kon i monimu. Bo tarimaan doman monimu in roho bo “habar mopia” inta totu-totuubí kon diá notongkai in Roho i Allah bo Habar Mopia inta ain muna sinarima monimu nongkon i nami.

KORINTUS 2 12:19

Motaaubí singogon nami kon noonggot bidon moiko in umuran nosangka mako kon i nami, kon kami tantú mobela kon oaid nami inta diá mopia kon tayowon monimu. Kon tayowon i Allah bo kinotaauanbí i Kristus. Kami moguman kon i monimu, kon bayongan naa, uḻe, utat mita inta kinotabiku, inaidan nami naa lantaranbí bá mobiag bo modugang in pirisaya monimu.

KORINTUS 2 12:20

Sin moḻia-ḻiaw in ginaku, dikabo naonda in akuoi mamangoi, koangoiankumai moiko diádon ná inta iharapku mako, ná doman tua in akuoi, koangoianmai monimu, diádon ná inta iharap mako monimu. Sin dikabo mobobayowanmai in moiko, mosiintoian, dumodia, tongá moibog morai kon kopontingan tontaní bo mopotombauk.

KORINTUS 2 12:6

Sin aka kuma bo moibog doman in akuoi moduí kon rupa-rupa, yo akuoi in doíbí umambungangaḷ mosingog kon uboḷ; ondabí in totuu, tuabí in poguman. Táe tahangonkupabí, sinbá dika bo anggapon monia in akuoi kon noiḻiudon kon onu inta ain inontong bo inta dinongog monia kon i nakó.

KORINTUS 2 4:15

Tua komintan in lantaranbí kopontingan monimu. Sin aka mobayong in intau monotaau kon totabi i Allah, yo mobayong doman in mopoyaput in sukur kon i Allah; dá ki Allah in dayowon totok.

KOLOSE 2:18

Donaaibí pomayá mako monimu in porugionmai in intau mita inta ki ubo-uboḷmai inumompá kon dodia bo inta mosumba kon malaekat mita. Intau tatua in moḷoḷatú takin raiannea mita inta modunia bo dumodia kon inta oontongon mita monia,

TESALONIKA 1 1:5

Sin kami in nopoyaput in Habar Mopia kon i monimu deemanbí pinodoyon kon pandoi nami, táe pinodoyonbí kon kawasa in Roho i Allah inta umuran kotaki-takin nami. Bo totokbí iyakin nami kon totuubí in Habar Mopia tatua. Kinotaauan bidon monimu in kobobiag nami wakutu in kotaki-takinpa monimu. Kami in umuran noramuji in nogaid sin kopontingan monimu.

TIMOTIUS 2 2:10

Tuamai akuoi in notababí in notanggung kon tua komintan lantaran kopontingan in intau mita inta ain piniḻí i Allah, sinbá mosia in mokouḻí doman kon kasaḷamatan inta inaidan i Kristus Yesus bo takin kamuliaan inta mononoi.