KORINTUS 1 2:6 - Alkitab Singog In Mongondow Masa In Tanaa

⁶ Umpaka, natua yo umuranbí doman oumanon in soaḷ kabijaksanaan i Allah kon sigad in intau mita inta totu-totuudon nopirisaya. Táe deemanbí kabijaksanaan in dunia, andeka kabijaksanaan pongawasa mita masa in tanaa, inta kawasanea in moinggamábí.

KORINTUS 1 2:6 ပူးပေါင်းရင်းမြစ်များ

AYUB 1:1

Kon butá in Us nogutun in ḷoḷaki tobatú tangoinea in ki Ayub. Sia in nosumba kon i Allah bo mosatia kon i-Nia. Sia in intau inta mopia in gina bo diábí nogaid kon onu inta moraat tongopiḻikmai.

AYUB 12:19

pinoompá-Nea in imang mita bo guhanga mita.

AYUB 12:21

Pinokopo oyá-Neamai in intau inta ihoromatmai; ginamá-Nea in hak monia mongawasa.

MAZMUR 146:4

Aka mosia matoi, mosia in buibí mobaḻí butá; singgai doman tatua bayongan in tomayá monia modait.

MAZMUR 33:10

Ki Tuhan in nopogogai kon bayongan in tomayá mita in bangusa mita, Sia in nonginggamá kon niat monia.

MAZMUR 37:37

Tondudutka in intau mopia bo motuḻid in gina; intau inta moibog in dodamean mopiabí in kobiagannea moiduduimai.

YESAYA 40:23

Binaḻí-Nea in mongongawasa mita diá kodaya, bo intau mita moḷoben kinobuḻian in kawasanea.

MATIUS 13:22

Bibit inta noḷabú kon yua-yuak in díat, tua in mangaḻenea, intau inta nokodongog kon Pirman tatua tongá mohawatir kon kapunyaan kon dunia naa bo moibog mobiag mooyúon. Ibog monia kon in dunia tua in monisí kon Pirman tatua, dá diá momungai.

MATIUS 19:21

Tubag i Yesus kon inia, “Aka iko bo moibog motompod totok, yo bayádon potaḷui komintan onu inta kon inimu bo silaidon tua komintan kon intau mita inta bogá dá iko in mokouḻídon kon kapunyaan kon soroga, onda intua angoidon kon naa bo dudui kon i-Nakó!”

MATIUS 5:48

Manangka intua moiko in musti mogaid kon inta totok in mopia ná ki Amámu inta kon soroga ain nogaid kon inta totok in mopia.”

LUKAS 16:8

Dá pinuji i tuangnea in bendahara inta diá mojujur tatua popisí in mobayong in akaḷnea; sin intau mita inta modunia in mopando-pandoi monompira kon oaidan monia dika in intau mita inta nobiag kon nobayag.”

KORINTUS 1 1:28

Ki Allah in nomiḻí kon inta inanggap noompá, nohina, andeka inta inanggap diá moponting in dunia naa.

KORINTUS 1 12:8

Oyúon intau in nokouḻí kon totabi mosingog kon inta mopia, oyúon doman in nokouḻí kon totabi motundú kon soaḷ ki Allah.

KORINTUS 1 14:20

Utatku mita! Dika ná pororai in mongoadí. Aka kon soaḷ mita inta mongoromú, dá musti ná pororai in mongoadí in moiko. Táe aka kon soaḷ pororai, yo poraibí ná intau inta nogurangdon.

KORINTUS 1 2:1

Utatku mita! Wakutu in akuoi namangoi kon i monimu nopotaau in tomayá mita i Allah inta diápa kinotaauan in bayongan intau kon dunia naa, diábí in akuoi nopomaké in kapandoian tontaní andeka noguman kon inta diá totuu.

KORINTUS 1 2:13

Tuamai, aka kami bo moginsilang kon kaadaan i Allah kon intau mita inta ain kinawasa in Roho i Allah, yo kami in diábí mosingog podudui in kabijaksanaan in intau, táe pinoduduibí kon onu inta ain sinundú in Roho i Allah.

KORINTUS 1 2:8

Diábí tobatúmai in pongawasa in dunia naa in nokotaau kon soaḷ kabijaksanaan tatua. Sin aka kinotaauandon monia, yo tantú diábí pinopopakú monia kon kayu pinoyotaḻempang in ki Tuhan inta momulia tua.

KORINTUS 1 3:1

Utatku mita, sabanarnea akuoi in diábí motaau moyosingog takin monimu naonda bo takin intau mita inta ain kinawasaan Roho i Allah. Sin moiko nion diápa motoindudui kon i Allah bo diápa doman noguyang in pirisaya monimu kon i Kristus.

KORINTUS 2 1:12

Noḷunganga totok in gina nami, sin noyakin bidon in kami kon kobobiag nami kon dunia naa – apapa doman hubungan nami bo i monimu – tantúbí nami sinompia takin gina motuḻid bo nobayag. Tua komintan in inaidan nami, deemanbí pinodoyon kon kapandoian raian in intau, táe pinodoyonbí kon ropot inta pinonotabi i Allah.

KORINTUS 2 13:11

Naa in tongginaku pangabisan kon i monimu utatku mita, mokoposanangdon kon gina bo poramujidon sinbá umuran mobiag mosompurna. Umuran kon gina-gina mako in tongginaku mita naa. Umuran motobatú kon gina bo kon raian bo umuran mototabian. Sin ki Allah inta nobaḻí dodoyonan totabi bo kobiagan inta mopia, umuran kotaki-takin monimu.

KORINTUS 2 4:3

Aka Habar Mopia inta pinoyaput nami tua bo diápa doman komangaḻean, yo dongka bidon intau mita inta tantú mongin daḷan popatoi in diá momangaḻe kon tua.

KORINTUS 2 4:4

Sin ilah moraat inta mongawasa kon dunia naa in tantú mogoḻingoi kon raian in intau mita inta diá mopirisaya. Siabí tua in tantú mogoḻingoi kon i monia sinbá diá mokoontong kon bayag in Habar Mopia soaḷ kawasa i Kristus inta moḷoben, inta nobaḻí oḻinow i Allah.

EPESUS 2:2

Wakutu intua moiko in dinumudui kon kabiasaan mita in dunia naa; tua in mangaḻenea moiko in dinumudui kon mongongawasa kon baḷangon, tuata in roho inta masai naa nongawasa kon gina in intau mita inta diá motoindudui kon i Allah.

KOLOSE 1:28

Ki Kristusbí tatua inta pinotaau nami kon intau mita. Kami nomaké in kabijaksanaan bo pongotahuan in mononggina bo motundú kon i monia, sinbá pomuḷoi in intau motaau diaan kon i Allah saḷaku intau inta noguyangdon in pirisaya, sin mosia ain notobatú i Kristus.

KOLOSE 4:12

Salam doman nongkon i Epapras. Sia naa intau doman nongkon sigad monimu. Mosia naa in mogogaid doman kon oaidan i Kristus inta umuran mosatia in mosambayang sin kopontingan monimu. Sia totok in mopoigum kon i Allah sinbá mobaḻídon moropot in koyakinan monimu, bo totu-totuudon moguyang in moiko sinbá totu-totuu domandon dumudui kon ibog i Allah.

IBRANI 5:14

Aka kaanon notogat, tua in ogoi kon intau inta noguyangdon in raiannea bo inta nobayongdon in kinoyitakannea bo inta kinorasaannea, sahingga motaaudon in sia mopoyoposi kon onu inta mopia bo onu inta moraat.

IBRANI 6:1

Tuamai, koḻigai bá mobalajardon in kita kon totundú moiduduimai naa soaḷ naonda in kobobiag saḷaku intau in Keresten inta moguyangdon in pororai. Donaaidon tongá umuran mopobui-buimai kon totundú inta muna. Musti mogogai in mogaid kon inta diá in baragunanea bo musti mopirisaya kon i Allah,

YAKOBUS 3:15

Kabijaksanaan natua in deemanbí nongkon soroga. Tua in nongkon duniabí, nongkon ibog in intau, bo nongkon dimbuḷó!

YAKOBUS 3:2

Kita komintan in mokakit in mogaid kon inta noitaḷá. Táe intau inta diá dodai onda in nosingog kon noitaḷá, sia tua intau nosompurna, inta mokokawasa kon bayongan in awaknea.

PETRUS 1 5:10

Táe naonda in moiko nokorasa kon roriga motoyong, yo ki Allah tontaní in moposompurna kon i monimu. Potorindogon-Nea bo iropotan in moiko. Sin Sia in Allahbí inta totok mopia in gina, inta ain nogoiní kon i monimu sinbá moitakin doman mokorasa kon kopia-Nea inta mononoi pongin i Kristus.