KORINTUS 1 14:4 - Alkitab Singog In Mongondow Masa In Tanaa

⁴ Intau inta momaké in bahasa inta mokoherang, tongábí moginrigon kon pirisayanea tontaní, táe intau inta mopoyaput in habar nongkon i Allah in motuḷungbí kon jamaat sinbá mobiag.

KORINTUS 1 14:4 ပူးပေါင်းရင်းမြစ်များ

MARKUS 16:17

Naa in tanda mita inta moyotakin kon i monia inta mopirisaya, mosia in moguntun kon dimukud mita moraat podoyon kon tangoi-Ku; mosia in mosingog kon bonu in bahasa inta diá kinotaauan monia.

SURAT I PAULUS KON JAMAAT RUM 14:19

Tuamai koḻigai bá tayakon naton onu inta mokopoangoi kon dodamean bo mosibiagan.

KORINTUS 1 12:10

Intau tobatú inogoian totabi mogaid kon soaḷ mita inta mokoherang, yo ibanea inogoian in totabi mopotaau in tomayá mita i Allah. Bo ibanea doman inogoian in komampuan motaau mopoyoposi onda in totabi inta nongkon Roho i Allah bo onda in deeman. Oyúon inogoian in komampuan mosingog kon bonu in bahasa inta mokoherang, bo oyúon doman inogoian in komampuan moginsilang kon mangaḻe in singog mita tatua.

KORINTUS 1 12:28

Natua doman in kon jamaat. Tampat in bayongan intau ain bidon sinantú i Allah. Muna in rasul mita; nogindua in nabi mita, nogintoḷu in guru mita bo intau mita inta nogaid kon mokoherang, onda intua intau mita inta inogoian in totabi mongundam bo motuḷung kon intau ande inta mobaḻí duduianmai, ande mosia inta inogoian totabi mosingog kon mokoherang.

KORINTUS 1 13:1

Umpakabí akuoi in nonotaau kon bayongan bahasa, nodapot kon bahasa in malaekat, táe aka diá in tabiku kon tumpaḷa intau, yo singogku mita tatua in tongábí naonda bo dorom inta diá kobonu andeka lonceng inta moḷangon in singognea, táe diá in mangaḻenea.

KORINTUS 1 13:2

Bo umpakabí in akuoi in mopandoi mopoyaput in Habar Mopia nongkon i Allah bo motaau doman totok in soaḷ mita inta nongoibuni, ande nonotaau kon bayongan yagi-yagi bo mopirisaya doman totok kon i Allah, sahingga in motaau mopopamping in buḷud, táe aka diá in tabiku kon tumpaḷa intau, yo diábí in mangaḻe in kobiaganku!

KORINTUS 1 14:12

Natua doman in moiko, kinotaauankubí kon moiko in moibogbí doman moramuji motayak kon totabi mita nongkon Roho i Allah. Tongá mopia totok aka moiko moramuji doman mopobaraguna in totabi mita tatua sin pobangon kon jamaat sinbá mobiag.

KORINTUS 1 14:22

Manangka intua totabi inta mosingog kon bonu in bahasa inta mokoherang tua in tandabí kon intau inta diá mopirisaya, deemanbí kon intau inta mopirisaya. Yo totabi mopotaau in tomayá i Allah kon intau in tandabí kon intau inta mopirisaya, deemanbí kon intau inta diá mopirisaya.

KORINTUS 1 14:26

Dá uḻe utat mita, onu in mangaḻe intua komintan? Aka moiko moyosipun sin mosumba kon i Tuhan, oyúon in modondong, oyúon in motundú, oyúon mopoyaput in habar nongkon i Allah, oyúon in mosingog kon bonu in bahasa inta mokoherang bo oyúon doman in moginsilang kon onu inta pinoguman in intau tatua. Táe tua komintan in mustibí aidan sin motundú kon ponompia kon i monia komintan.

KORINTUS 1 14:3

Táe aka intau inta mopoyaput in habar nongkon i Allah, yo tua in mopoyaputbí in habar kon intau; sin moginrigon kon pirisaya monia, mobogoi in ropot bo mohibur kon i monia.

KORINTUS 1 14:5

Mopiabí doman in ginaku aka moiko in motaau moposingog in bahasa inta mokoherang. Táe mopia-piabí kon motaau mopoyaput in habar nongkon i Allah. Sin intaubí inta motaau mopoyaput in habar nongkon i Allah in moponti-ponting nongkon intau inta nonotaau kon bahasa inta mokoherang; koḻikudbí in aka kotaauannea in mangaḻe in bahasa tatua, sahingga in komangaḻean doman in jamaat intua bo modugang morigon in pirisaya monia.