KORINTUS 1 13:2 - Alkitab Singog In Mongondow Masa In Tanaa

² Bo umpakabí in akuoi in mopandoi mopoyaput in Habar Mopia nongkon i Allah bo motaau doman totok in soaḷ mita inta nongoibuni, ande nonotaau kon bayongan yagi-yagi bo mopirisaya doman totok kon i Allah, sahingga in motaau mopopamping in buḷud, táe aka diá in tabiku kon tumpaḷa intau, yo diábí in mangaḻe in kobiaganku!

KORINTUS 1 13:2 ပူးပေါင်းရင်းမြစ်များ

MATIUS 13:11

Ki Yesus notubag, “Moiko aindon inogoian in totabi monotaau kon rahasia kon naonda in ki Allah momarenta, táe mosia tua in diábí.

MATIUS 17:20

Ki Yesus in notubag, “Popisí in diá mopirisaya in moiko. Tuamai Akuoi in moguman kon i monimu, ‘Aka oyúon pirisayamu tongá kabí ná koḷoben batoḷ in sesawi’, yo moiko in motaau moguman kon buḷud tanaa, ‘Pomampingdon kon tua!’ Dá buḷud tanaa in dumuduibí doman kon singogmu, bo diábí in tobatúmai in diá motaau monimu aidan. [

MATIUS 21:19

Kon diugmai in daḷan oyúon pangkoi in ara inontong-Nea, dá Sia minayá notayak kon bungainea, táe diá nokouḻí kon tobatúmai koḻikudbí in daunnea mita kon tua. Dá siningog-Nea in pangkoi ara tatua, “Iko in diá bidon mopomunga-mungai!” Bo kon dodaipa doman tatua, pangkoi in ara tatua noingkag.

MATIUS 21:21

Ki Yesus notubag kon i monia, “Poguman-Ku kon i monimu, aka moiko bo totu-totuu mopirisaya bo diá mohawatir, yo moiko in deemanbí tongá motaau mogaid kon ná inta pinomia-Ku kon pangkoi in ara tatua, táe moiko motaaubí doman moguman kon buḷud tanaa, ‘Pobuatdon nongkon tampatmu tanion bo koḷabúdon kon bonu in dagat’; yo mobaḻíbí doman intua.

OUMAN IN RASUL MITA 13:1

Wakutu intua kon jamaat in Antiokhia oyúon in tongonumai in nabi bo guru, naa in tangoi monia tua: Ki Barnabas, ki Simeon inta dinonoi ki Niger, ki Lukius intau in Kirene, ki Menahem inta noyobiag i Datu Herodes, bo ki Saulus.

SURAT I PAULUS KON JAMAAT RUM 11:25

Utat mita! Haraponku mako moiko in diá monganggap kon ain nonotaau kon bayongan in yagi-yagi. Sin oyúon in soaḷ inta kinoibog i Allah, táe diápa kinotaauan in intau. Bo ibogonku in kotaauan monimu intua; nanaa: tongobotak intau in Yahudi mokopotogat kon gina, táe cara monia tua in tongábí modapot in motompodon in kobayong in intau inta deeman Yahudi in mamangoi kon i Allah.

SURAT I PAULUS KON JAMAAT RUM 15:14

Utatku mita! Moyakinbí in akuoi kon totokbí in mobayong inta mopia in nion kon i monimu. Moiko nion in nonotaaubí doman kon bayongan in yagi-yagi bo mokomampubí doman mositongginaan.

SURAT I PAULUS KON JAMAAT RUM 16:25

Dinayo-dayowdon in ki Allah! Sia in mongawasa moginrigon kon pirisaya monimu podudui in Habar Mopia nongkon i Allah inta pinotaauku soaḷ ki Yesus Kristus. Habar inta pinotaauku tua in notongkai in onu inta pinoontong i Allah kon inakó; tuata in soaḷ tomayá i Allah inta noonggotdon totok in kinotaauan intau.

KORINTUS 1 11:4

Ḷoḷaki inta mosambayang ande inta mopoyaput in Habar Mopia nongkon i Allah kon tayowon intau mobarong bo mogi koḷob in uḷu, yo tua in mangaḻenea moningkuḻe kon i Kristus in sia.

KORINTUS 1 12:28

Natua doman in kon jamaat. Tampat in bayongan intau ain bidon sinantú i Allah. Muna in rasul mita; nogindua in nabi mita, nogintoḷu in guru mita bo intau mita inta nogaid kon mokoherang, onda intua intau mita inta inogoian in totabi mongundam bo motuḷung kon intau ande inta mobaḻí duduianmai, ande mosia inta inogoian totabi mosingog kon mokoherang.

KORINTUS 1 13:1

Umpakabí akuoi in nonotaau kon bayongan bahasa, nodapot kon bahasa in malaekat, táe aka diá in tabiku kon tumpaḷa intau, yo singogku mita tatua in tongábí naonda bo dorom inta diá kobonu andeka lonceng inta moḷangon in singognea, táe diá in mangaḻenea.

KORINTUS 1 13:3

Bo umpaka daitonku ogoi kon intau nobogá in kapunyaanku, modapot posarakanku doman in awakku sin tubáan, táe aka diá in tabiku kon tumpaḷa intau, yo tua komintan beresibí diá in baragunanea.

KORINTUS 1 13:8

Diábí in wakutu kon diá mositabian. Sin masa in tanaa oyúon in intau mopandoi mopoyaput in habar nongkon i Allah, táe koonggotannea mogogai in sia. Masa in tanaa oyúon doman intau mopandoi in mosingog kon bonu in bahasa inta mokoherang, táe koonggotannea mogogai domandon in sia. Masa in tanaa nobarong doman intau in nonotaau kon bayongan yagi-yagi, táe koonggotannea yo koḻionganneabí intua komintan.

KORINTUS 1 14:29

Aka oyúon in habar nongkon i Allah in poyaput intau doyowa toḷu, yo musti poyaput, yo intau ibanea in musti mokidongog bo raion kopiaan onu in pinoguman monia tua.

KORINTUS 1 14:39

Tuamai uḻe utatku mita, poramuji mopoyaput in habar nongkon i Allah, bo dika molarang kon intau inta mosingog kon bonu in bahasa inta mokoherang.

KORINTUS 1 14:4

Intau inta momaké in bahasa inta mokoherang, tongábí moginrigon kon pirisayanea tontaní, táe intau inta mopoyaput in habar nongkon i Allah in motuḷungbí kon jamaat sinbá mobiag.

KORINTUS 1 15:51

Tarukira in rahasia tanaa: Kita in diábí matoi komintan, táe kita in daitonbí baḷuian.

KORINTUS 1 16:22

Intau inta diá motabi kon i Tuhan, pomayádon mako baḷáan! Maranatha – Tuhan nami, angoidon!

KORINTUS 1 4:1

Anggapbí in kami naa mogogaid mita kon oaidan i Kristus inta motanggung jawab mopotaau in tomayá mita i Allah inta diápa kinotaauan in bayongan intau kon dunia naa.

KORINTUS 1 7:19

Sin sinunat andeka diá, diábí moponting intua. Dumuduibí kon atorang mita i Allah in moponting.

KORINTUS 1 8:4

Yo soaḷ mokaan kon kaanon inta ain pinosumba kon berhala, sabanarnea in kinotaauanbí naton kon berhala tua in diábí onda. Sin kinotaauanbí doman naton kon tongábí tobatú in ki Allah; diábí in ibanea mako.

KORINTUS 2 12:11

Totuubí kon akuoi in sinumon intau bodok – táe moikobí in nomakisa kon i nakó nobaḻí natua. Sabanarnea moikobí in musti moduí kon inakó. Sin umpaka diá baraguna in akuoi kon i monimu, táe kon bayongan yagi-yagi akuoi in noiḻiubí kon rasul mita inta mongotoyang tua.

GALATIA 5:16

Nanaabí in makusudku: Kobiagdon in moiko podudui kon ibog in Roho i Allah, donaaibí moibog mobiag podudui ibog in intau.

GALATIA 5:22

Tongá intau mita inta kinawasa in Roho i Allah, yo nanaabí in aidan monimu: Oyúon totabian, umuran mosanang in gina bo moonow in gina, oyúon kasabaran, mopia in gina, umuran mopia kon tumpaḷa intau, motoindudui,

GALATIA 6:3

Aka tobatú intau bo nosangka kon sia tua intau moponting, bokaka diábí, yo sia in nonguboḷdon kon inia tontaní.

EPESUS 3:4

bo aka kobacaandon monimu intua, yo komangaḻeandon monimu onu inta noibunipa soaḷ ki Kristus, ná kinomomangaḻeku kon tua.)

EPESUS 6:19

Bo sambayangai doman in akuoi, sinbá wakutu in akuoi mosingog ogoian i Allah in singog mita inta moitutui, bo bá mobarani totok in akuoi mopotaau in onu inta noibunipa kon Habar Mopia tua.

KOLOSE 1:26

habar inta noonggotdon totok in binuni-buni mako i Allah kon bayongan intau, táe tanaa in pinoontong-Neadon kon umat-Nea.

TIMOTIUS 1 3:16

Diábí tobatúmai in motaau momayow, kon moḷobenbí totok in onu inta noibunipa kon agama naton naa: Sia namangoi in dunia naa sinumon rupa intau, bo inakubí in Roho i Allah, bo inontong in malaekat mita. Habarnea pinowayadon kon sigad in bayongan bangusa, bo Sia in pinirisaya in bayongan intau kon dunia naa poḷat sinintak namonik in soroga.

YOHANES 1 4:8

Intau inta diá kototabi, in diábí nonotaau kon i Allah; sin ki Allah tua in tabibí.