KINOBAḺIAN 49:29 - Alkitab Singog In Mongondow Masa In Tanaa

^29-30 Onda intua ki Yakub nongoyow kon i adínea mita, “Diádon moonggot in akuoi bo matoidon ná mogoguyangku. Ḷobongdon in akuoi kon símai monia kon bonu in angob kon Makhpela, kon dotá in pomukaan kon Mamre kon butá in Kanaan. Ki Abraham ain notaḷui kon angob bo gobá kon diugneamai nongkon i Epron intau in Het sin baḻíon tampat poḷoḷobongan.

KINOBAḺIAN 49:29 ပူးပေါင်းရင်းမြစ်များ

KINOBAḺIAN 15:15

Iko tontaní moumur in kobiaganmu, bo matoi takin pia in gina, bo ḷobongon.

KINOBAḺIAN 23:16

Noibog in ki Abraham kon boḻi inta sinantúnea tatua. Sia in nogiapdon kon doit saḷaka inta pinoguman i Epron inta opat nogatut tatua, podudui in pogogiapan in intau mita mopopotaḷui. Bo inuboḻianneadon kon i Epron, takin koonto-ontong in bayongan intau in Het kon tua.

KINOBAḺIAN 23:17

Natuata in ouman gobá i Epron inta kon Makhpela kon dotá in pomukaan kon Mamre, nobaḻí kapunyaan i Abraham. Butá tatua in gobá bo angobnea takin bayongan kayu inta ibanea nobaḻí sigadnea mita.

KINOBAḺIAN 23:20

Natuata in gobá takin angobnea inta koina kapunyaan intau in Het, nobaḻídon kapunyaan i Abraham inta binaḻídon butá poḷoḷobongan.

KINOBAḺIAN 23:9

sinbá ogoineadon taḷuionku in Angob in Makhpela inta noiukat kon bingkí in gobánea. Poigumdon bá potaḷuineadon tua kon inakó kon naa takin koonto-ontong i Utat mita. Boḻinea daitonkubí ogoi kotompodon, sinbá butá tatua in mobaḻídon kapunyaanku.”

KINOBAḺIAN 35:27

Bo noyaputdon in ki Yakub kon i Ishak ki amánea, kon tampat pinogutunannea kon Mamre kon diug in Hebron. (Koḻipod ki Abraham inta ki ḷakinea, nogutun doman kon tua).

KINOBAḺIAN 47:30

Ibogonku in ḷobongonbí in akuoi kon tampat inta pinoḷobongan kon mogoguyangku; diádon in mayatku nongkon butá tanaa bo ḷobongdon kon tampat poḷoḷobongan kon i monia.” Bo ki Yusup notubag, “Aidankubí onu inta pinoguman i amá tatua.”

KINOBAḺIAN 49:28

Tuata in suku Israel inta mopuḷú bodoyowá, bo tosingogon inta siningog i amá monia bo poḷat nobogoi in barakat pangabisan kon i monia kon batúannea.

KINOBAḺIAN 49:33

Naonda in ki Yakub nopaḷut nobogoi in koyow kon i adínea mita, inumuḻidon in sia bodongka minatoi.

KINOBAḺIAN 50:12

Natuadon ki adí mita i Yakub nomia kon onu in tongkoyow i Yakub kon i monia.

KINOBAḺIAN 50:13

Mosia in nodia kon mayatnea pinobayá in Kanaan bo iḷobong kon bonu in angob in Makhpela, kon dotá in pomukaan kon Mamre, kon gobá inta ain sinaḷui i Abraham kon i Epron intau in Het tatua, sin baḻíon poḷoḷobongan.

SAMUEL 2 19:37

Mopaḷut mako, pomayádon mako in bobantung mobui kon baḷoiku bo matoi kon diug in pinoḷobongan kon guyangaku, táe naa in ki adíku ki Kimham. Ogoidon in sia dumudui kon i Tuang datu bo popoaidon kon inia onu inta mopia kon mata i Tuang Datu.”

IBRANI 12:23

Moiko in sinumakin kon tobatú pinoyodungkuḷan inta morame totok – pinoyodungkuḷan in adí mita guya-guyang i Allah, inta pinaisdon in tangoi monia kon bonu in soroga. Moiko in namangoi sinumayow kon i Allah hakim in bayongan intau naa. Moiko in sinumayow kon roho mita intau mopia inta ain sinompurna.