KINOBAḺIAN 42:38 - Alkitab Singog In Mongondow Masa In Tanaa

³⁸ Táe ki Yakub in noguman, “Diá! Ki Benyamin diábí motaau diaan monimu; ki guya-guyangnea ain minatoi bo tanaa dongkadon sia in oyúon. Dika-dika sia in mobodito doman kon binayáan tatua. Akuoi naa ain nogoguyang, bo robonoḷ in gina inta popoangoi monimu tua in mokopopisídon kon kopatoianku.”

KINOBAḺIAN 42:38 ပူးပေါင်းရင်းမြစ်များ

KINOBAḺIAN 37:33

Kinotaauan i Yakub in jubah tatua, bo sia in noguman, “Totuu, jubah i adíku in naa! Pasti sia dinomokdon in mahaḷuk mokokaan kon intau. Kaasí, ki adíku ki Yusup ain minatoi pinoguraat in mahaḷuk tatua!”

KINOBAḺIAN 37:34

Ki Yakub nomerak kon pakeangnea sin norobonoḷ totok in ginanea bo sia in nogiḷambung norondí. Pomuḷoi in singgai sia in mogamuimai mongombaḷ sin kinopatoian i adínea tatua.

KINOBAḺIAN 37:35

Bayongan i adínea, ḷoḷaki bo bobay namangoi nohibur bo nodondouḷug kon inia, táe sia in doí dondouḷugan, Gumannea, “Modapot in matoi umurankubí ombaḷan in sia.” Natuata in nobaḻí, ki Yakub umuran nongombaḷ sin ki Yusup ki adínea tatua.

KINOBAḺIAN 42:13

Tubag monia, “Kami naa in mopuḷú bodoyowá mogutat, Tuangku, kami naa in adí toamáan kon butá in Kanaan. Tobatú kon sigad nami ain minatoi bo inta muit tanaa mako in kotaki-takin i amá nami.”

KINOBAḺIAN 42:37

Bo ki Ruben in noguman kon i amánea, “Posarakaidon kon inakó in ki Benyamin, Papa; bain diaanku bui in sia mangoi, aka diá, ki Papa motaaubí moḻimod kon i adíku ḷoḷaki doyowa tua.”

KINOBAḺIAN 42:4

Táe ki Benyamin diá inogoi i Yakub minayá noyotakin monia sin sia moondok dika-dikabo mobodito in ki adínea tatua. Ki Benyamin naa in toamá bo toináan i Yusup.

KINOBAḺIAN 43:13

Diadon in ki ai-ai monimu tua, bo ḷagidon pobui mangoi.

KINOBAḺIAN 44:20

Kami ain notubag, ‘Ki Amá nami ain nogoguyang bo ki ai-ai nami pinononggadí kon dodai in ki amá nami ain noguyang. Ki guya-guyang toináan i ai-ai nami tua ain minatoi, dá tanaa dongkadon sia in nobiagpa in kon sigad i nayadua, bo ki papa totok in motabi kon inia.’

KINOBAḺIAN 44:22

bo kami ain noguman kon adí tatua in diábí motaau moyoguat takin i amánea; sin aka sia moyoguatdon takin i amánea dá ki amánea in matoi bidon.

DATU MITA IMITÁNEA 2:6

Yo, adíku, popoaidon kon inia in onu inta inanggapmu mopia; tongá donaai pomayámu mako in sia matoi motompia mako natua.

AYUB 41:32

Sia in nonaḷámai kon ḻiod in sioḷ inta monindar, dagat binaḷuiannea nobaḻí burá inta mobudó in batangannea.

MAZMUR 71:18

O Allah, dika taḷaan in akuoi, modapot in mogoguyang in akuoi bo ubanan, sinbá akuoi in mopotaau in kawasa bo kototoyang-Mu kon bayongan in buí inta moiduduimai.

MAZMUR 90:10

Kobiagan nami in tongá pitu nopuḷú notaong, aka kami moropot, yo waḷu nopuḷú notaong. Táe tongábí susa bo roriga in mouḻí nami; naonda in mobiag motoyong, kami in diádon.

MOHOHUTUBA 1:14

Akuoi in nokoontongdon kon bayongan aid in intau kon dunia naa. Pirisayabí, bayongan tua diábí in mangaḻenea, naonda bo moḷongasi modomok kon tompot.

MOHOHUTUBA 2:26

Ki Allah nobogoi in hikmat, pongotahuan bo kasanangan kon intau inta mokosanang kon gina-Nea. Táe intau baradosa in pinotabá-Nea mogaid motayak kon pakéon bo mosipun kon onu inta nouḻí sin ogoi kon intau inta mokosanang kon gina i Allah. Dá, tua komintan diá in mangaḻenea naonda bo modomok kon tompot.

YESAYA 38:10

“Gumanku, bagu notombotak in umur akuoi in mustidon mayá, monimpod kon ki agat in kobiaganku kon dunia in intau minatoi.

YESAYA 46:4

Akuoi in umuranbí ki Allahmu modapot in moiko mogoguyang; bo umuran moḷukad kon i monimu modapot in moiko ubanan. Akuoi in nopobaḻí kon i monimu bo umuran moḷukad, Akuoi in motuḷungbí bo moposaḷamat kon i monimu.