KINOBAḺIAN 31:19 - Alkitab Singog In Mongondow Masa In Tanaa

¹⁹ Kon dodai intua ki Laban kon tampat ponggonsingan kon bubuḷ in domba, koyogot doman monggonsing kon bubuḷ in dombanea mita, bo kon dodai intuata ki Rahel nonakow kon patong kapunyaan i amánea.

KINOBAḺIAN 31:19 ပူးပေါင်းရင်းမြစ်များ

KINOBAḺIAN 24:38

táe mustibí nongkon sigad in ginaḷumku, buí i amáku. Dá koḻikatdon bayá in ḻipú tatua.’

KINOBAḺIAN 31:20

Ki Yakub in nonguboḷ kon i Laban takin diá noguman mosia in minayá.

KINOBAḺIAN 31:30

Kinotaauankubí kon iko nobuat tatua popisí in iko moibogdon totok mobui. Nongonu sin iko nonakowbí kon patong moḷoḷukad kon i motoḷuadíku?”

KINOBAḺIAN 31:32

Soaḷ patong tatua, aka mouḻímu in tobatú intau kon naa inta ain nonakow yo intau tatua hukumon matoi. Tayakdon, mongo oyúon in kapunyaanmu kon naa. Aka oyúon, yo gamádon. Bo intau mita naton in mobaḻí sakusi.” Diábí kinotaauan i Yakub kon ki Rahelbí tua in nonakow kon patong tatua.

KINOBAḺIAN 31:34

Táe munadon ginamá i Rahel in patong tatua bo pinopobonunea kon botutu inta pinopobongkoḷ kon unta, bo sia iḻimitúdon mako kon bongkoḷ tatua. Ki Laban nomirikisa kon tombonu in ḷoḷaigan i Rahel, táe diá doman nouḻínea in patong tatua

KINOBAḺIAN 31:35

Bo ki Rahel in noguman kon i amánea, “Donaaidon ki papa tumorú, akuoi in diádon motaau simindog motomu kon i papa, sin akuoi inangoinea.” Ki Laban totokdon nonaridi in notayak, táe diá nouḻínea in patong tatua.

KINOBAḺIAN 35:2

Bo ki Yakub in noguman kon buḷoi, adí ginaḷumnea bo kon bayongan intau inta kotaki-takinnea, “Kita in mobuatdon nongkon naa bo mayá in Betel. Kon tua akuoi in moposindogdon in mezbah kon i Allah inta ain notuḷung kon inakó kon dodai in kinoantugan in roriga bo inta ain noḷukad kon inakó kon ondaka in binayáanku. Dá ḷumbúdon in patong dewa mita ibanea mako inta kodia-dia monimu; aidaidon in upacara pondaritan kon awak bo pakédon in pakeang inta modarit.”

KINOBAḺIAN 38:13

Ki Tamar nokouḻí kon habar kon ki Yohuda ki nunutonnea tua mamangoi in Timna sin monggonsing kon bubuḷ in dombanea mita

SAMUEL 2 13:23

Doyowa notaong noiduduimai kon tua ki Absalom nomia kon bobutungan pinonggonsingan kon bubuḷ in domba kon Baal-Hazor, kon diug in kotá in Epraim, bo nogoiní in sia kon bayongan adí ḷoḷaki i datu.

DATU MITA 2 23:24

Kon mopoaid in hukum mita inta pinais kon bonu in buk inta nouḻí i Imang Moḷoben ki Hilkia kon Baḷoi Tuhan, bayongan in mogogoiní kon dimukud bo mononoḻindap in pinoguntun i Datu Yosia nongkon Yerusalem bo nongkon bayongan in Yohuda, bo iḷumbúnea in bayongan dewa in tonibuḷoi, berhala, bo pakakat mita inta pinaké kon posumbaan kon dewa mita.

YEHEZKIEL 21:21

Datu in Babel in sinimindog kon diug in dopí totundú in daḷan tatua. Sinbá kotaauannea mongo onda in daḷan inta bayáannea, dá nopoigum in sia kon totundú kon berhala mita, monguḻingkó kon bobong pinobonuan kon piot bo monaridi kon poat in mahaḷuk inta bagu pinokuruban.

HOSEA 3:4

Natuabí doman in bangusa in Israel; noonggotdon totok in mosia in musti mobiag takin diá in datu andeka itoi, takin diá in kuruban andeka tugu mita mokaramat, takin diádon in berhala mita andeka ajimat mita inta mopotaau in onu inta noibunipa kon singgai moidudui.

YOSUA 24:2

Onda intua ki Yosua noguman kon i monia komintan, “Indongogaipa onu inta pinoguman i Tuhan, Allah Israel kon inimu, ‘Tungkuḷ intua mogoguyangmu nogutun kon ḷoḷan in Ongkag in Eprat, bo nosumba kon dewa mita. Tobatú kon sigad monia tua tangoinea in ki Terah, ki amá i Abraham bo i Nahor.

HAKIM MITA 18:31

Patong berhala inta pinomia i Mikha tatua umuranbí kon Lais kon dodai in Ḷoḷaigan i Tuhan kon Silo.

SAMUEL 1 15:23

Sin moḷawang kon parenta i Tuhan notongkaibí in mosihir in koraatnea, bo gina inta mododia notongkaibí in koraatnea ná nosumba kon ilah ibanea, Popisí in ki Tuang Datu ain noḷawang kon parenta i Tuhan, dá diádon akúon i Tuhan kon ki Tuang in datu.”

SAMUEL 1 19:13

Nopaḷut mako kon tua ki Mikhal nogamá kon patong dewa in tonibuḷoinea bo inukatnea kon tosiugan i Daud. Bo kon dotá in uḷuannea inukatannea in oḷunan inta nongkon bubuḷ in bembé, bodongka dinaingannea in daing.

SAMUEL 1 25:2

Kon kotá in Maon oyúon in ḷoḷaki tobatú nongkon inanakan i Kaleb, tangoinea in ki Nabal. Sia tua in kobutá ponombobiagon kon diug in kotá in Karmel. Sia tua in nobiag nooyúon totok bo kodomba 3.000 bo bembé 1.000. Ki Abigail ki buḷoinea, mopandoi bo moḷunat, táe ki Nabal in mokaḷakuang bo moromú in dodianea. Kon singgai tobatú ki Nabal koyogot in monggonsingmai kon bubuḷ in dombanea kon Karmel.