KINOBAḺIAN 29:32 - Alkitab Singog In Mongondow Masa In Tanaa

³² Ki Lea in sidiadon bo nopononggadídon in adí ḷoḷaki tobatú. Gumannea, “Ki Tuhan ain noindoi kon rorigaku, bo tanaa ki buḷoiku in motabidon kon inakó.” Bo sinangoianneadon in adí tatua ki Ruben.

KINOBAḺIAN 29:32 ပူးပေါင်းရင်းမြစ်များ

KINOBAḺIAN 16:11

Diádon moonggot bo iko in mopononggadí in adí ḷoḷaki tobatú; tangoiaidon in sia ki Ismael, sin dinongogdon i Tuhan in ombaḷmu.

KINOBAḺIAN 29:31

Naonda inontong i Tuhan kon ki Lea in diá totok kinotabi i Yakub ná tabinea kon i Rahel, dá binaḻídon i Tuhan sia bobay inta motaau mopononggadí in adí, táe ki Rahel in binaḻí-Nea bantó.

KINOBAḺIAN 31:42

Aka kuma bo akuoi diá iḷukadan i Allah in mogoguyangku, ki Allah inta sinumba i Abraham bo i Ishak, dá tantú akuoi ain bidon pinotabámu minayá takin diá nodia kon onu bo onu. Táe ki Allah ain noindoi kon rorigaku bo oaidan inta ain inaidanku, bo kogobíi Sia ain nobogoi in kaputusan-Nea.”

KINOBAḺIAN 35:22

Kon tungkuḷ in mosia kon tampatpa tatua ki Ruben nosiugdon noyotakin i Bilha, ki buḷoi amánea inta bobantung tatua. Soaḷ tatua kinodongogan i Yakub, bo sia in totok sinumorú. Ki Yakub kogadí kon ḷoḷaki mopuḷú bodoyowá.

KINOBAḺIAN 35:23

Ki adí mita i Lea in ki Ruben (adí guya-guyang i Yakub), ki Simeon, ki Lewi, ki Yohuda, ki Isakhar bo ki Zebulon.

KINOBAḺIAN 37:29

Naonda in ki Ruben minayádon bui in parigí tatua bo diádon inontongnea in ki Yusup kon tua, binerakneadon in ḷambungnea, sin norobonoḷ in ginanea.

KINOBAḺIAN 42:22

Ki Ruben in notubag, “Kinotaauan bidon monimu kon koḻipod ain pinogumanku kon i monimu sinbá adí tatua donaai yagi-yagionmai. Táe moiko in doí mokidongog. Dá tanaa kinopatoiannea in potuḻídon kon inaton.”

KINOBAḺIAN 42:27

Kon tampat pinogogaian monia wakutu in doḷom, tobatú kon sigad monia tua nobuká kon karong in gandumnea sin mopokaan in keledainea. Bo nouḻíneadon in doitnea kon tudu in gandum tatua.

SAMUEL 2 16:12

Degá bo umuranbí indoian mako i Tuhan in roriga tanaa bo momarakat kon inakó nobaḻí toḻiu in odi-odi tatua.”

TAWARIKH 1 5:1

Ki Ruben naa in adí guya-guyang i Yakub. Táe popisí in ki Ruben naa in ain nopoonagmai kon kahoromatan in pahang tobatú i amánea, dá haknea saḷaku adí guya-guyang in ginamádon nongkon inia bo inogoi kon i Yusup. Umpaka natua táe inta totok in moropot kon sigad in buí Yakub in deemanbí suku i Yusup táe sukubí i Yohuda. Nodapot inta muna-munamai totok nobaḻí datu kon bayongan umat in Israel in nongkon sukubí i Yohuda tua.

MAZMUR 106:44

Táe ki Tuhan in nokidongog kon karak monia, Sia in nonaridi kon susa monia.

MAZMUR 25:18

Tondudutdon in roriga bo susahku, bo ampungaidon kaasí in bayongan in dosaku.

IḶUAIAN 3:7

Bo ki Tuhan noguman, “Inontong-Kudon in roriga in umat-Ku kon Mesir, bo dinongog-Ku domandon in mosia mopoigum sin poḷúat nongkon pinononggataan kon i monia. Ain bidon kinotaauan-Ku in roriga monia.

IḶUAIAN 4:31

Dá nopirisayadon in mosia, bo naonda in dinongog monia kon ki Tuhan ain noḷongow kon bangusa Israel bo noindoidon kon bayongan roriga monia, mosia in sinumungkud bo nosumba.

PINOGIAPAN 1:5

Naadon in tangoi in intau mita inta piniḻí nongkon umat sin mobantung kon i Musa bo kon i Harun bo inta mobaḻí itoi kon sukunea-sukunea, naa in mosia tua: Suku Itoi Ruben ki Elizur adí i Syedeur Simeon ki Selumiel adí i Zurisyadai Yohuda ki Nahason adí i Aminadab Isakhar ki Netaneel adí i Zuar Zebulon ki Eliab adí i Helon Epraim ki Elisama adí i Amihud Manasye ki Gamaliel adí i Pedazur Benyamin ki Abidan adí i Gideoni Dan ki Ahiezer adí i Amisyadai Asyer ki Pagiel adí i Okhran Gad ki Elyasap adí i Rehuel Naptali ki Ahira ki adí i Enan

LUKAS 1:25

Ki Elisabet nosingog nanaa, “Pangabisannea sinuḷungan i Tuhan in akuoi, ininggamáan-Nea in onu inta mokooyá kon inakó.”

ULANGAN 26:7

Bo kami nokuani nopoigum in totuḷung kon ini-Mu, Tuhan, ki Allah in mogoguyang nami. Inindongogan-Mu in kuani nami bo noindoi kon roriga, susa takin kobobiag nami inta mokotabidon.

ULANGAN 27:13

Kon dodai in siningog in kutuk, suku Ruben, Gad, Asyer, Zebulon, Dan bo Naptali musti simindog kon tudu in Buḷud in Ebal.

SAMUEL 1 1:11

Onda intua ki Hana nodandi, kainia, “O Tuhan Inta Totok in Mokawasa, indoiaipa kaasí in mogogundoi-Mu naa! Indoiaipa in rorigaku. Toropdon in mogogundoi-Mu bo dikapa koḻiongan! Aka ogoian-Mu in adí ḷoḷaki in mogogundoi-Mu naa, yo ogoikubí in sia kon ini-Mu kinoouputbí in kinobiagannea. Dandionku doman kon buoknea in diábí gonsi-gonsingan.”

SAMUEL 1 1:20

Bobay tatua in nonogusian bo nopononggadí in adí ḷoḷaki tobatú. Sinangoiannea ki Samuel, gumannea, “Sia in pinoigumkudon kon i Tuhan.”