KINOBAḺIAN 28:20 - Alkitab Singog In Mongondow Masa In Tanaa

²⁰ Bo nongibotdon in ki Yakub, “Aka ki Tuhan motuḷung bo mogoḻiung kon inakó kon binayáan tanaa bo poḷat mobogoi kon inakó in kaanon bo pakeang

KINOBAḺIAN 28:20 ပူးပေါင်းရင်းမြစ်များ

KINOBAḺIAN 28:15

Toropdon, Akuoi in motuḷung bo mogoḻiung kon inimu, kon ondaka in bayáanmu, bo Akuoi in modia kon inimu mobui mangoi kon butámu tanaa. Akuoi in diábí monaḷámai kon inimu modapot in aidan-Kudon bayongan inta ain pinodandi-Ku kon inimu.”

KINOBAḺIAN 31:13

Akuoibí naa in ki Allah inta nokipogontong kon inimu kon Betel. Kon tua iko ain noposindog in batu tompoingat tobatú, poḷat nopobutak in ḷana zaitun kon tudunea. Kon tampat doman tatua iko nongibot kon inakó. Tanaa pobasadiadon bo pobuidon kon butá kinolahiranmu.’ ”

SAMUEL 2 15:8

Sin kon dodai in akuoi nogutunpa kon Gesur butá in Siria, nodandi in akuoi kon mayá moibada kon i Tuhan kon Hebron aka ogoi-Nea in akuoi mobui kon Yerusalem.”

TAWARIKH 1 4:10

Táe ki Yabes in nosambayang kon i Allah inta sinumba in intau in Israel, kainia, “Oo Allah, barakataidon in akuoi bo pobanatdon in butáku. Oḻiungaidon in akuoi bo poyayúdon in bodito sinbá diá moyoyiga in akuoi.” Bo inindogogan i Allah in igumnea tatua.

MAZMUR 116:14

Akuoi in mogintompodbí kon dandiku kon i-Nia kon tayowon in bayongan in umat-Nea.

MAZMUR 116:18

Akuoi in mogintompodbí kon dandiku kon i Tuhan, kon tayowon in bayongan in umat-Nea

MAZMUR 119:106

Inta dinandiku pinodoyon kon ibot in intompodankubí, kon kumadai kon atorang-Mu inta moadil.

MAZMUR 132:2

Dikabí kaasí koḻiongan in sumbanea kon ini-Mu Tuhan, bo dandinea kon ini-Mu Inta Totok in moropot, Allah i Yakub.

MAZMUR 22:25

Sin diábí pinoompá-Neamai in intau inta dinorot, bo diábí nopokooyámai kon roriganea. Sia in diábí nonoḻikud kon intau tatua, táe noibogbí nokidongog aka sia mopoigum in totuḷung kon i-Nia.

MAZMUR 56:12

Akuoi in mopirisaya kon i-Nia, dá diábí in akuoi moondok, intau in diábí mokopongonu kon inakó.

MAZMUR 61:5

Biódon mako in akuoi kinoouput in kobiaganku mogutun kon ḷoḷaigan-Mu, sinbá moaman kon bonu in oḻiung in koḻikip-Mu.

MAZMUR 61:8

Igumon mako momarenta in sia modapot in mononoi saḷaku datu inta piniḻí-Mu, o Allah, Oḻiungaidon in sia in tabi bo kososatia-Mu.

MAZMUR 66:13

Akuoi in modiabí kon kuruban payongon kon Baḷoi-Mu bo mogintompod kon dandiku kon ini-Mu,

MAZMUR 76:11

Umpaka intau mita inta totok in moḻingá modayow kon ini-Mu, bo inta sinumorúpa in momaké in kaeng karong tomponuot nonogumatoi.

YESAYA 19:21

Ki Tuhan in mokipogontongbí kon bangusa in Mesir, bo mosia in monotaaudon bo mosumba kon i-Nia, poḷat doman modia kon kuruban bo sosumba kon i-Nia. Mosia in mopoyaputbí in dandi kon i-Nia takin mongibot bo mogaid kon tua.

YOHANES 1:16

Moḷoben totok in tabi-Nea; diá in gogainea Sia in momarakat kon i naton.

OUMAN IN RASUL MITA 18:18

Onda intua ki Paulus nogutunpa kon Korintus tongonumai nosinggai. Diá noonggot kon tua sia in nogumandon kon intau mita inta mopirisaya kon tua kon mayádon takin i Priskila bo i Akwila kon Siria in sia. Kon Kengkrea, ki Paulus nokibangkuḷugdon in buoknea sin mogintompod kon dandinea kon i Tuhan.

TIMOTIUS 1 6:8

Dá, aka oyúonpa in kaanon bo pakeang yo mobaḻídon intua.

SAMUEL 1 1:11

Onda intua ki Hana nodandi, kainia, “O Tuhan Inta Totok in Mokawasa, indoiaipa kaasí in mogogundoi-Mu naa! Indoiaipa in rorigaku. Toropdon in mogogundoi-Mu bo dikapa koḻiongan! Aka ogoian-Mu in adí ḷoḷaki in mogogundoi-Mu naa, yo ogoikubí in sia kon ini-Mu kinoouputbí in kinobiagannea. Dandionku doman kon buoknea in diábí gonsi-gonsingan.”

SAMUEL 1 1:28

tuamai in adí tanaa in posarakankudon mobaḻí kapunyaan i Tuhan kon bonu in kobiagannea.” Nopaḷut mako kon tua mosia noibada kon i Tuhan.

SAMUEL 1 14:24

Kon singgai tatua intau mita in israel moḻemédon popisí in gogoyon, sin ki Saul in nongibotdon nanaa, “Kutukondon in intau inta mokaan kon onuka kon singgai in naa kon dodai in akuoi diápa motuḻí kon musungku.” Tuamai in diá tobatúmai in intau in nongaan in tosinggai tua.