KINOBAḺIAN 25:20 - Alkitab Singog In Mongondow Masa In Tanaa

²⁰ Ki Ishak in umurdon opat nopuḷú notaong tungkuḷ in sia nonika takin i Ribka, ki adí i Laban, inta ki adí i Betuel, intau in Aram nongkon Mesopotamia.

KINOBAḺIAN 25:20 ပူးပေါင်းရင်းမြစ်များ

KINOBAḺIAN 22:23

inta nobaḻí ki amá i Ribka. Taya waḷu tuata in ki adí i Milka kon i Nahor, ki utat i Abraham.

KINOBAḺIAN 24:15

Kon dodai in sia yogotpa mosambayang tua, ki Ribka, mongodeaga tobatú inta totok in moḷunat bo diápa doman dodai onda in nosiug takin ḷoḷaki, noiangoidon kon parigí tatua kodia-dia in buyung inta kopota-potaannea. Sia in ki adí i Betuel, guranganea in ki Nahor bo ki Milka; ki Nahor tua ki guya-guyang i Abraham. Ki Ribka minayá in parigí tatua bo nomonu kon buyungnea, bodongka nobui.

KINOBAḺIAN 24:29

Ki Ribka naa oyúon in ki guya-guyangnea inta tangoinea ki Laban. Sia in nokodongog kon ouman i ai-ainea soaḷ onu inta pinoguman in bobantung tatua. Sia in nokoontong doman kon ḷambá kon ngiung bo ḻingkit kon poguḻingkitan i ai-ainea tatua. Dá noribatuk iḻumuai kon baḷoi in ki Laban sin mayá mokipodungkuḷ kon bobantung i Abraham tatua inta simindogpa mako takin untanea kon diug in parigí.

KINOBAḺIAN 24:67

Nopaḷut mako kon tua ki Ishak nodia kon i Ribka sinumuot kon ḷoḷaigan i Sara, ki inánea, bo sinonibuḷoineadon in ki Ribka. Ki Ishak motabi totok kon i Ribka; dá noḻipoidon in susa i Ishak popisí in kinopatoiandon i inánea.

KINOBAḺIAN 25:26

Kon tungkuḷ adí induanea pinononggadí, ḻimanea nokadai kon singkod i Esau. Tuamai in sia sinangoian ki Yakub. Ki Ishak in umurdon onom nopuḷú notaong tungkuḷ in ki adínea doyowa tatua pinononggadí.

KINOBAḺIAN 27:43

Dá tanaa, aidaidon onu in pogumanku kon inimu. Ḷagidon bayá kon i guya-guyangku ki Laban kon Haran,

KINOBAḺIAN 28:2

Bayádon in Mesopotamia, kon motoḷuadí i Betuel, ki ḷakimu, bo potonibuḷoidon takin adí bobay i Laban, ki utat i inámu.

KINOBAḺIAN 28:7

Kinotaauannea doman kon ki Yakub in dinumuduidon kon tosingogon i amá bo i inánea bo minayádon in Mesopotamia.

KINOBAḺIAN 31:20

Ki Yakub in nonguboḷ kon i Laban takin diá noguman mosia in minayá.

KINOBAḺIAN 31:24

Kon tungkuḷ in doḷom ki Allah namangoi kon i Laban kon bonu in togoindopnea, bo noguman, “Pokoingat dika mokoimontanmai iko mopogogondok kon i Yakub takin tosingogon tongáka totontagá.”

KINOBAḺIAN 33:18

Kon binayáan nongkon Mesopotamia, noyaputdon in ki Yakub takin nosaḷamat kon kotá in Sikhem kon butá in Kanaan, bo noposindog in ḷoḷaigan kon dotá in pomukaan kon kotá tatua.

KINOBAḺIAN 35:26

Ki adí mita i Zilpa, bobantung i Lea in ki Gad bo ki Asyer. Adí mita tatua noilahir kon Mesopotamia.

KINOBAḺIAN 35:9

Naonda in ki Yakub nobui nongkon Mesopotamia, ki Allah bui nokipogontong kon inia bo nomarakat kon inia.

KINOBAḺIAN 46:15

Mosia tua in ki adí mita i Lea kon i Yakub inta pinononggadí kon Mesopotamia, koḻikud intua ki adínea doman bobay inta tangoinea ki Dina. Dá bayongan buí i Yakub nongkon i buḷoinea ki Lea kobayongnea in toḷu nopuḷú botoḷú.

LUKAS 4:27

Natua doman in kon tungkuḷ i Nabi Elisa, tungkuḷ intua nobayong in intau Israel in kinotugatan in panyaki kuḻit inta mokorongó, táe diábí tobatúmai in kon sigad monia tua in inundaman, koḻikudbí in ki Naaman intau in Siria tua.”

ULANGAN 26:5

Onda intua kon tayowon i Tuhan Allahmu, musti in iko mopoyaput in tosingogon mita tanaa: ‘O Tuhan, mogoguyangku naa intau in Aram inta nodondaḷoi. Sia nodia kon koluarganea minayá in Mesir bo nogutun kon tua nobaḻí mokokiangoi. Kon tungkuḷ in minayá intua mosia tongá topiḻik, táe mosia in nobaḻí bangusa inta moḷoben bo moropot.