IMAMAT 9:9 - Alkitab Singog In Mongondow Masa In Tanaa

⁹ Ki adí mita i Harun nodia kon dugú in mahaḷuk tatua kon i Harun, bo sia nopoḷodokdon in gongguyamúnea kon dugú tatua, bo poḷat nopoḻepo kon tungoi mita inta kon siku opat in mezbah. Onda intua kiagat in dugú tatua pinopobutakneadon kon datoḷan in mezbah.

IMAMAT 9:9 ပူးပေါင်းရင်းမြစ်များ

YEHEZKIEL 43:15

Yuang intoḷunea tanaa in tampat pototubáan kon kuruban; koḷantudnea in doyowa nometer. Kon sikunea opat oyúon in noiḷontú naonda bo tungoi.

YEHEZKIEL 43:20

Gamádon in dugúnea topiḻik bo popoḻepo kon tungoi mita inta kon siku mita in mezbah tatua, bo kon sikunea opat inta kon dotá in bonunea takin doman sí in mezbah inta noiḻibu. Natuata in pogogaidmu mopotusi in mezbah tatua bo tondíonmudon kon i-Nakó.

IMAMAT 16:18

ki Harun musti ḷumuai bo mayá kon mezbah in kuruban tubáan sin mondarit kon mezbah tatua. Sia in musti mogamá kon dugú in sapi topiḻik bo dugú in bembé bo poḻeponea kon tungoi mita inta kon siku in mezbah.

IMAMAT 4:25

Imang musti mopoḷodok in gongguyamúnea kon bonu in dugú in mahaḷuk tatua bodongka poḻeponea kon tungoi mita kon siku in mezbah bo ki agatnea pobutak kon datoḷan in mezbah.

IMAMAT 4:30

Imang musti mopoḷodok in gongguyamúnea kon dugú in mahaḷuk tatua, bodongka popoḻeponea kon tungoi mita inta kon siku in mezbah bo kiagatnea in popobutak kon datoḷan in mezbah.

IMAMAT 8:15

Onda in tua iratá i Musa bo dugúnea ibanea in gamáannea. Gongguyamúnea tontaní in pinoḷodoknea kon dugú tatua bodongka poḻeponea kon tungoi mita inta kon siku mita in mezbah, sinbá mezbah tatua tongádon ogoi kon i Allah. Dugú ki agatnea in popobutak kon datoḷan in mezbah. Natuata in mopobaḻí motusi kon mezbah tatua bo tongádon ogoi kon i Tuhan.

IMAMAT 9:10

Ḷongó, kombiloi bo tonsilai inta totok in mopia nongkon mahaḷuk tatua tubáannea kon tudu in mezbah, ná inta pinarenta i Tuhan kon i Musa.

IMAMAT 9:12

Onda intua ki Harun noratá kon mahaḷuk tatua mobaḻí kuruban tubáan kon inia tontaní. Ki adí mita i Harun modia mangoi kon dugú in mahaḷuk tatua kon inia, bo ki Harun mopobutak kon siku opat in mezbah tatua.

IMAMAT 9:18

Bo iratánea domandon in sapi koḷakian tobatú bo domba koḷakian tobatú mobaḻí kuruban dodamean kon umat. Ki adí mita i Harun nobogoi in dugú in mahaḷuk tatua kon inia, bo sia in nopobutak kon sí opat in mezbah.

IBRANI 2:10

Totuu kon patus bidon in ki Allah inta nomia kon bayongan in yagi-yagi mopobayá in onu inta imakusud-Nea tontaní. Binaḻí-Nea in ki Yesus mopoposaḷamat inta nosompurna pinodoyon kon daḷan inta totok in moyoyiga. Tua in daya i Allah sinbá mobayong intau in motaau oiníon-Nea mayá in tampat inta mopia totok takin i Yesus. Sin Siabí in nobuká kon daḷan kon i monia sinbá mosia in motaau posaḷamaton.