IMAMAT 8:14 - Alkitab Singog In Mongondow Masa In Tanaa

¹⁴ Nopaḷut mako kon tua ki Musa in nogamá kon sapi koḷakian batánea tobatú sin pakéon pokuruban potobut kon dosa. Ki Harun bo ki adínea mita mopoukat in ḻima monia kon uḷu in mahaḷuk tatua.

IMAMAT 8:14 ပူးပေါင်းရင်းမြစ်များ

MAZMUR 66:15

Posumbaku kon ini-Mu kuruban payongon nongkon biag notompiḻí, bembé domba bo sapi koḷakian, poyoknea in moidamonik kon ḷangit.

YESAYA 53:10

Ibogbí i Tuhan sia in kotugatan in roriga, bo moposarakan in kobiagan nobaḻí kuruban potobut kon dosa. Dá moumur in kobiagannea bo mokoontong kon buínea pongin inia ibog i Tuhan in koaidan.

YEHEZKIEL 43:19

Tongábí imang buí i Zadok nongkon suku Lewi in motaau mamangoi in tayowon-Ku sin mopobayá in oaidan pogundoian. Akuoi, ki Tuhan Inta Totok in moḷantud in nomarenta nokiaid intua. Ogoidon kon i monia in sapi koḷakian tobatú inta batáneapa sin pokuruban potobut kon dosa.

YEHEZKIEL 43:20

Gamádon in dugúnea topiḻik bo popoḻepo kon tungoi mita inta kon siku mita in mezbah tatua, bo kon sikunea opat inta kon dotá in bonunea takin doman sí in mezbah inta noiḻibu. Natuata in pogogaidmu mopotusi in mezbah tatua bo tondíonmudon kon i-Nakó.

YEHEZKIEL 44:27

bodongka mayá in dangkuḷon kon bonu in Baḷoi-Ku, bo moposumba in kuruban sin pondarit kon awaknea sinbá motaaudon bui in sia mopobayá in oaidan kon Baḷoi-Ku, Akuoi, ki Tuhan Inta Totok in moḷantud ain nosingog.

IMAMAT 1:4

Bo sia in musti mopoukat in ḻimanea kon uḷu in biag tatua, dá sosumbanea in tarimaan i Tuhan mobaḻí pongampung kon dosanea.

IMAMAT 16:21

Ḻimanea musti poukatnea kon ḻimonik in uḷu in bembé tatua poḷat mongaku kon bayongan taḷá, dosa bo ḷawang in bangusa Israel. Natuata in pomomamping kon bayongan taḷá in bangusa Israel kon tudu uḷu in bembé tatua. Bo intau tobatú inta ain sinantú musti moguntun kon bembé tatua pobayá in padang gurun.

IMAMAT 16:6

Ki Harun musti moposumba in sapi koḷakian tobatú mobaḻí kuruban potobut kon dosa kon inia bo kon tombonu in baḷoinea.

IMAMAT 4:15

Tongguḷu mita in bangusa musti mopoukat in ḻima monia kon uḷu in mahaḷuk tatua, bodongka moratá kon mahaḷuk tatua kon tampat tatua.

IMAMAT 8:2

“Oinídon in ki Harun bo ki adínea mita bo diadon in pakeang imang, ḷana upacara, sapi koḷakian tobatú inta batánea sin baḻíon kuruban potobut kon dosa, domba koḷakian doyowa, bo tokompé in roti inta diá iragian.

PINOGIAPAN 8:12

Bo intau mita in Israel musti mopoukat in ḻima monia kon uḷu in sapi koḷakian doyowa tatua; sapi tobatú in musti posumba mobaḻí kuruban potobut kon dosa, bo sapi inta tobatú in baḻíon kuruban payongon. Upacara tatua in makusudnea in pondaritan kon intau in Lewi.

SURAT I PAULUS KON JAMAAT RUM 8:3

Onu inta diá koaidan in hukum agama, sin kita intau ilo-ilow, yo tua ain inaidan i Allah. Ki Allah ain nonaḷow kon kawasa in dosa nongkon tabiat in intau takin aid nopotabá mangoi kon i Adí-Nea tontaní, inta namangoi ná kaadaan in intau baradosa, sin momopat kon dosa.

KORINTUS 2 5:21

Sin Sia inta nodarit kon bayongan in oaid inta diá mopia, pinaké domandon i Allah mobaba kon bayongan in dosa naton, sinbá kita in buidon mobiag motompia takin i Allah sin notobatúdon i Kristus.

PETRUS 1 3:18

Sin ki Kristus tontaní in tongábí doman komintan minatoi popisí in dosa mita intau. Tobatú intau inta diá kotaḷá; minatoi popisí in intau inta kotaḷá. Ki Kristus in nogaid kon tua sinbá kita in motaau-Nea diaan mayá kon i Allah. Sia in iḻimod kon kaadaan saḷaku intau, táe biniag bui kon bonu in Roho.