IMAMAT 5:8 - Alkitab Singog In Mongondow Masa In Tanaa

⁸ Ḷagapan mita tatua in mustibí diaan kon i imang. Ki imang in musti muna moposumba in ḷagapan inta ain sinantú baḻíon kuruban potobut kon dosa. Sigogow in ḷagapan tatua musti pitoion, táe diábí kobontowon.

IMAMAT 5:8 ပူးပေါင်းရင်းမြစ်များ

IMAMAT 1:15

Imang musti modia kon ḷagapan tatua pobayá in mezbah, bodongka pitoian in sigogownea bo uḷunea tubáan kon tudu in mezbah. Dugú in ḷagapan tatua musti romputon poḷuai kon símai in mezbah.

IMAMAT 1:17

Onda intua koḻikip in ḷagapan tatua musti yabion táe dika dapot in moyotontaní in awaknea. Bo ḷagapan tatua musti tubáan kon tudu in mezbah. Rongingi in kuruban sinubá tatua mokosanang kon gina i Tuhan.

SURAT I PAULUS KON JAMAAT RUM 4:25

Ki Yesus tua in pinosarakandon kon intau mita sin ḻimodon sin potobut kon bayongan dosa naton. Tongá Sia in biniagdon bui i Allah sinbá kita in buidon moyodame takin i Allah.

PETRUS 1 3:18

Sin ki Kristus tontaní in tongábí doman komintan minatoi popisí in dosa mita intau. Tobatú intau inta diá kotaḷá; minatoi popisí in intau inta kotaḷá. Ki Kristus in nogaid kon tua sinbá kita in motaau-Nea diaan mayá kon i Allah. Sia in iḻimod kon kaadaan saḷaku intau, táe biniag bui kon bonu in Roho.